ئه‌ڤرۆ نيوز:
ئه‌ڤرۆ ئێڤارى ل پيشه‌سازيا ترۆمبێلان ل دهۆكێ ژ ئه‌نجامێ هه‌رفينا ئاڤاهيه‌كێ ل ده‌مێ سه‌ببه‌كرنێ دو كرێكاران گيانێ خوه ژ ده‌ستدا و 13 كرێكارێن دى برينداربوون.
عيسا نسرى سه‌رۆكێ لقێ دهۆك يێ سه‌نديكا كرێكارێن كوردستانێ دياركر كو پرانيا كرێكاران خه‌لكێ رۆژئاڤا كوردستانێ نه و داخوازا پێكئينانا لژنه‌يه‌كێ كر بۆ دياركرنا ئه‌گه‌رێ روودانێ.
ئه‌ڤرۆ نيوز، فاتما مزوورى:
گه‌له‌ك جاران ژ ئه‌گه‌رێ با و بارانان سێلا تلستارێ مه تێك دچيت و نوزانين بۆ خوه دروست بكه‌ين و د وى ده‌مى دا پێدڤى شاره‌زايه‌كێ وى كارى دبين كو به‌رامبه‌ر كۆژمه‌كێ پاره‌ى وى كارى بۆ مه بكه‌ت، به‌لێ ب رێيا ڤى به‌رنامه‌ى ئێدى پێدڤى كه‌سێ نابى بۆ ئه‌نجامدانا وى كارى.
ب رێيا به‌رنامێ “satellite Director” ته پێدڤى ب چو شاره‌زايان نابيت كو بۆ ته ئاميرێ سێلا سه‌ته‌لايتێ دروست بكه‌ن، ئانكو ب رێيا مۆبايلا خوه يا سيستمێ ئه‌ندرۆيد ب خوه دێ ڤى كارى ئه‌نجام ده‌ى.
ده‌مێ دانلۆدكرن و ڤه‌كرنێ دێ ب ڤى ره‌نگى ل ده‌ف ته ده‌ركه‌ڤيت:
ب ڤێ رێ، ئه‌و جهێ سور هه‌كه سيگنال ئينا دێ زه‌ر بيت، به‌لێ دڤێت ل جهه‌كێ وه‌سان بى GPS ب باشى لێ كار بكه‌ت، به‌لێ هه‌تا راده‌كى ل هه‌موو ده‌ڤه‌رێن كوردستانێ بێ كێشه سيسته‌مێ GPS نوكه كار دكه‌ت.
پشتى ديتنا جهێ درست و ديتنا سينگالى دێ هه‌يڤه‌كا ده‌ستكرد دروست كه‌ى و كليك ل سه‌ر سه‌ته‌لايت كه‌ى هه‌ر وه‌كو د وێنه‌ى دا ديار.
پاشان دێ بۆ خوه هه‌يڤا ده‌ستكرد هه‌لبژێرێ بۆ نمۆنه من هه‌يڤا ده‌ستكرد يا نيل سات يا هه‌لبژارتى.
پاشان دشێين جهـ و سيگنالێ سێلێ ب دروستى ئاشكه‌را بكه‌ين هه‌ر وه‌كو د وێنه‌ى دا هاتيه دياركرن.
پاشان دێ بلنداهى و نزميا سێلێ ده‌ته مه كا يا چاوان بيت ل گه‌ل هنده‌ك پێزانينێن دى، هه‌ر ديسان دشێين ته‌ماشه‌ى ئه‌سمانى بكه‌ين بۆ ديتنا هه‌يڤا ده‌ستكرد.
ئه‌ڤرۆ نيوز:
سه‌رۆكێ ديوانا سه‌رۆكاتيا هه‌رێما كوردستانێ راگه‌هاند كو د كۆمبوونا گشتى يا نه‌ته‌وێن ئێكگرتى دا، بابه‌تێ رزگاركرنا مووسل ته‌وه‌رێ سه‌ره‌كى يێ كۆمبوونێ بوو، ديسان گه‌له‌ك سۆزێن ئابوورى ژى هاتنه دان.
د. فوئاد حسێن سه‌رۆكێ ديوانا سه‌رۆكاتيا هه‌رێما كوردستانێ كو د گه‌ل شاندێ عيراقێ چووبوو كۆمبوونا نيويورك يا نه‌ته‌وێن ئێكگرتى راگه‌هاند: د هه‌موو كۆمبوونێن هاتينه ئه‌نجام دان دا بابه‌تێ رزگاركرنا مووسل ته‌وه‌رێ سه‌ره‌كى بوو، به‌لێ هنده‌ك بابه‌تێن دژى هاتينه به‌حسكرن.
سه‌رۆكێ ديوانا سه‌رۆكاتيا هه‌رێما كوردستانێ زێده‌تر گۆت: “پتريا وه‌لاتيێن رۆژئاڤا دێ پشكدار بن و دڤێت بزانن كا دێ شێن چ بۆ ڤى بابه‌تى كه‌ن”.
دا زانين ژى كو ره‌زامه‌ندى ل سه‌ر پلانا رزگاركرنا مووسل هاتيه كرن و هه‌موو لايه‌ن ژى ل سه‌ر د رازى نه، “دێ شه‌ره‌كێ ئێكلاكه‌ر بيت”.
د. فوئاد حسێن به‌حس ل وێ چه‌ندێ كر كو به‌حس ل ئابوورى عيراقێ ژى هاتيه كرن و سوزێن مه‌زن ل سه‌ر ڤى بابه‌تى هاتينه دان.
ئه‌ڤرۆ نيوز:
سپێده‌هيا رۆژا شه‌مبى 24ى ئيلۆنا 2016ێ ل ئه‌رزه‌رۆما باكوورێ كوردستانێ به‌فرێ هه‌موو باژێر و گۆند و باژێركێن دوروبه‌رێن خوه سپى كرن.
ده‌سپێكا حه‌فتيا بۆرى بۆ جارا ئێكێ ل ئه‌ڤ ساله به‌فر ل چيايێ ئاگرى ل باكوورێ كوردستانێ بارى و ئه‌رزه‌رووم وه‌كو جهێ دويێ دهێت كو ئه‌ڤ ساله به‌فر لێ بارى.
باژێر قارس ل باكوورێ كوردستانێ ب سارترين باژێر دهێته نياسين ل وێ ده‌ڤه‌رێ و هه‌رده‌م ل هه‌يڤا ته‌باخێ يا هه‌موو سالان ل جهێن دى پلا گه‌رمێ دگه‌هيته 50 پلان و ل وێرێ هه‌ڤدژى جهێن دى سه‌رمايه و هنده‌ك جاران به‌رفر دباريت، به‌لێ ئه‌ڤ ساله چيايێ ئاگرى و ئه‌رزه‌رۆم د پێش وێ ده‌ڤه‌رێ كه‌فتن و زووتر به‌فر لێ بارى.
ژێده‌ر: رووداو
ئه‌ڤرۆ نيوز:
د روونشتنا ئه‌ڤرۆ يا جڤاتا نوونه‌رێن عيراقێ دا دێ دانوستاندن ل سه‌ر چه‌ند بابه‌تان هێته كرن كو په‌يوه‌ندى ب مووچه و مافێ وه‌لاتيێن هه‌رێما كوردستانێ ڤه هه‌يه.
ب گۆره‌ى كارناما روونشتنا ئه‌ڤرۆ يا جڤاتا نوونه‌رێن عيراقێ ئێك ژ ته‌وه‌رێن سه‌ره‌كى يێ روونشتنێ به‌حسكرنا پارێ گه‌نمێ سالانه يێ 2014-2015 يێ جوتيارێن هه‌رێمێ يه.
د پشكه‌كا دى يا روونشتنێ دا دێ به‌حس و دانوستاندن ل سه‌ر كێمكرنا رێژا كرينا گه‌نم و جه‌هێ جۆتيارێن هه‌رێما كوردستانێ بيت ژ لايێ حوكمه‌تا عيراقێ ڤه.
ئه‌ڤرۆ نيوز:
ئێكگرتوويا ئيسلامى راگه‌هاند كو سپێده‌هيا ئه‌ڤرۆ رۆژا شه‌مبى 24ى ئيلۆنا 2016ێ عادل حه‌سه‌ن كادرێ بلندێ وێ حزبێ و ئێك ژ رێكخه‌رێن مامۆستايێن نه‌رازى ژ لايێ چه‌ندێ چه‌كداره‌كان ڤه ل سلێمانيێ بۆ جهه‌كێ نه‌ديار هاتينه ره‌ڤاندن.
ب گۆره‌ى گۆتنێن به‌رپرسێن ئێكگرتوو ئو كادر ل ده‌مێ نان كرينێ دا ژ لايێ چه‌ند چه‌كداره‌كان ڤه ل تاخێ ئازادى يێ باژێرێ سلێمانيێ هاتينه ره‌ڤاندن.
عومه‌ر محه‌مه‌د، به‌رپرسێ جڤاتا بجهئينانێ يا ئێكگرتوو ئيسلامى كوردستان ل باژێرێ سلێمانيێ بۆ رووداو گۆت: “ئه‌م نزانين ژ لايێ كێ ڤه هاتينه ره‌ڤاندن، به‌لێ ده‌زگه‌هێن ئه‌منى يێن باژێرێ سلێمانيێ به‌رپرس دزانين و هيڤى دكه‌ين ب له‌ز ئه‌وى ئه‌ندامێ مه ئازاد بكه‌ن”.
فه‌همى حه‌مه توفيق، به‌رپرسێ مامۆستايێن ئێكگرتوو دبێژيت: “نوچه‌ك هه‌يه ژبلى عادل حه‌سه‌ن كه‌سه‌ك ب ناڤێ ئاوات حه‌سه‌ن ژى يێ ره‌ڤاندى”.
برايه‌كێ عادل خواستيه كو ناڤێ وى نه‌هێته گۆتن بۆ خه‌ندان دبێژيت: “ده‌مژمێر 8:15 ده‌قيقه بۆ كرينا نانى برايێ من چوويه ژ ده‌رڤه و پاشان ژ لايێ كه‌سه‌كى ڤه هاتينه ئاگه‌هداركرن كو برايێ مه يێ هاتيه ره‌ڤاندن”.
ئاوات حه‌سه‌ن ئێكێ دى يه ژ وان كه‌سێن هاتينه ره‌ڤاندن و ب گۆره‌ى گۆتنا برايێ وى ئه‌ڤرۆ سپێدێ ل تاخێ كوردستات يێ پارێزگه‌ها سلێمانيێ ل گه‌ل زارۆيه‌كى ديار نه‌مايه.
برايه‌كێ مامۆستا ئاوان بۆ خه‌ندان دبێژيت: “ده‌مژمێر 8:30 ده‌قيقه مامۆستا ئاوات ل تاخێ كوردسات هاتيه ره‌ڤاندن، زارۆيه‌كێ 10 سالى ژى ل گه‌ل بوويه، هێشتا ده‌نگوباسان نزانن، به‌لێ ئه‌و ب خوه شيايه خوه رزگار بكه‌ت و ژ ترۆميێلێ ب هاڤێژيته خوار.
گۆتژى: “جهێ برين و لێدانێ ل سه‌ر لاشێ وى يێ دياره و ئه‌و كه‌سێن ئه‌ڤ كاره كرى هێزێن ئه‌منى و مه‌ده‌نى تێدا بوون و هه‌تا نوكه چو نووچه ل سه‌ر زارۆى و ترۆمبێلا وان نينن”.
ئه‌ڤرۆ نيوز:
لژێر زه‌مينێ گه‌شه‌پێدان و هاندانا زانستى لده‌ڤه‌را بادينان، ڕێككه‌فتننامه‌كا لێكتێگه‌هشتنێ دناڤبه‌را زانكۆيا پۆليته‌كنيكى يا دهۆك و زانكۆيا جيهان-دهۆك هات ئيمزاكرن.
م. محه‌مه‌د عه‌بدولقادر رێڤه‌به‌رێ په‌يوه‌نديێن گشتى ل زانكۆيا پۆليته‌كنيك يا دهۆك بۆ ئه‌ڤرۆ دياركر كو ل لڕێكه‌فتى 22ى ئيلونا 2016ێ رێككه‌فتن هاته ئيمزاكرن دناڤبه‌را هه‌ردوو لاياندا كه پێكهاتبوون ژ سه‌رۆكێ زانكۆيا پۆليته‌نكيكى يا دهۆك پرۆفيسور د. عدنان محسن عبد العزيز وهاريكارێ وى پرۆفيسورێ هاريكار د. عزت فندى يحيى دگه‌ل سه‌رۆكێ زانكۆيا جيهان-دهۆك پرۆفيسورێ هاريكار د. سعيد سلێڤانه‌ى و هاريكارێ وى پرۆفيسورێ هاريكار د. لقمان محمد سعيد .
رێڤه‌به‌رێ په‌يوه‌نديێن گشتى ل زانكۆيا پۆليته‌كنيك يا دهۆك دياركر كو رێككه‌فتن د ڤى بوارى دا هاته كرن:
1- ئالۆگۆركرنا بزاڤ و چالاكيێن قوتابيان
2- ئالۆگۆركرنا ستاف و به‌شێن زانستى
3- چاڵاكيێن ڤه‌كۆڵينێن زانستى و وه‌شانێن هاوبه‌ش
4- سمينار و ووركشۆپێت هاۆبه‌ش
ئه‌ڤرۆ نيوز:
هشيار زێبارى وه‌زيرێ دارايى بڕياره ئه‌ڤرۆ دووماهى هه‌لويستێ خوه بۆ وه‌رگرتنا باوه‌ريێ ژ لايێ ئه‌ندامێن جڤاتا نوونه‌رێن عيراقێ ڤه رابگه‌هينيت پشتى كو دوهى ئه‌و بڕيار هاتيه دان.
جڤاتا نوونه‌رێن عيراقێ دوهى د كۆمبوونه‌كێ دا و ب ده‌نگدانه‌كا نهێنى باوه‌رى ژ هشيار زێبارى وه‌رگرت ب 158 ده‌نگان و ئه‌ڤه دبيته وه‌زيرێ دويێ د ماوێ كێمتر ژ هه‌يڤه‌كێ دا ژ لايێ جڤاتێ ڤه باوه‌رى ژێ دهێته وه‌رگرتن.
قازل نه‌بى، بڕيكارێ وه‌زاره‌تا دارايا عيراقێ بۆ خه‌ندان گۆت: “هه‌ر دوهى پشتى كۆمبوونا جڤاتا نوونه‌رێن عيراقێ تان ل بڕيارا جڤاتێ هاتيه دان ل دادگه‌ها فيدرال و چاڤه‌رێ به‌رسڤێ دكه‌ين، چونكو ئه‌وان ماددێ 61 يێ دستوورێ عيراقێ پێشێل كريه”.
ئاشكه‌را ژى كر كو هه‌تا دادگه‌ها فيدرالى بڕيارێ ل سه‌ر تانا ژ لايێ هشيار زێبارى ڤه هاتيه دان نه‌ده‌ت، ناڤبرى نه‌شێت ل وه‌زاره‌تا دارايى ده‌وامێ بكه‌ت.
ئه‌ڤرۆ نيوز:
ھێزێن پۆلیسێن قەزا سۆران یا سەر ب پارێزگەھا ھەولێرێ ڤە ئەشکرا کر، وان باندەکێ چار کەسی دەستەسەرکریە، کو مامەلە ب زێڕێ سەختەکریە و چەندین پارچە زێڕێن سەختە ژی فرۆتینە دکانێن کڕین و فرۆتنا زێڕی و وەلاتیان.
نەقیب ھاوار ئەرگوشی، پەیڤدارێ پۆلیسێن قەزا سۆران بۆ رۆژناما ئەڤرۆ دیار کر، باندەکێ وەلاتیێن عەرەب کو ژ دو ژن و دو زەلامان پێکھاتبوو، ل سنورێ قەزا سۆران و شەقلاوە زێڕێ سەختە دایە دکانێن زێڕی و گۆت: “پشتی ژ لایێ وەلاتیان ڤە سکالا ل سەر ھاتیە تۆمارکرن، ژ ئالیێ پۆلیسێن سۆرانڤە دووڤچوون ل دۆر ڤەدیتنا وان دزیکەرێن عەرەب ھاتەکرن و ھەر چار ھاتینە دەستەسەرکرن، ئەڤان وەلاتیان وەکی باندەکێ کڕین و فرۆتنا زێڕێ سەختە زیانێن مەزن یێن ماددی گەھاندینە وەلاتی و بازرگانێن زێڕی ل ھەرێما کوردستانێ”.
نەقیب ھاوار ئەرگوشی خویا ژی کر، ئەڤان وەلاتیێن ب ڕەگەز عەرەب دانپێدان ب تاوانا خوە کریە، کو ل قەزا شەقلاوە و ناحیا ھەریر و قەزا سۆران چەندین پارچێن زێڕێن سەختە بەرھەڤکرینە و داینە دکاندار و وەلاتیێن ھەرێما کوردستانێ و گۆت: “بڕیارە ل ڕۆژێن بھێن ڕادەستی دادوەرێ ڤەکۆلینێ بھێنەکرن ئەڤان وەلاتیێن عەرەب، ل گورەی قانوونێ دێ ھێنە سزادان”.
نيشاندان