ئەڤرۆ نیوز:
رێڤەبەریا وەربەرھێنانێ ل پارێزگەھا دھۆکێ د نڤیسارەکێ دا دیار کریە کو مۆلەتا کارکرنێ ژ پرۆژێ بەرھەمئینانا شیری ل دەڤەرا ئامێدیێ ھاتە وەگرتن و رێڤەبەرێ ناحیا دێرەلۆکێ ژی دبێژیت: مەزنترین پرۆژێ بەرھەمئینانا سپیاتیان بوو ل پارێزگەھا دھوکێ.
د وێ نڤیسارێ دا رێڤەبەریا وەربەرھێنانێ ئاشکرا کریە کو ژ بەر نەپێگریکرنا وەبەرھێنەرێ ب دەمێ ب جھئینانا پرۆژەی، مۆلەتا کارکرنا وی ھاتیە ھەلوەشاندن و وەبەرھێنەر ل سەر ڤێ چەندێ ھاتیە ئاگەھدار کرن و تێدا ھاتیە: “ل دووڤ قانوونا وەبەرھینانێ یا ھژمارە چار سالا (2006) مادەدیێ (9) برگا (2) دێ سەرەدەری ل گەل پرۆژەی ھێتە کرن.
ھەر ل سەر ڤێ بابەتی بەھمەند ئەحمەد، رێڤەبەرێ ناحیا دێرەلۆکێ بۆ ئەڤرۆ دیارکر، پرۆژێ دێوین یێ ب خودانکرنا چێلێن شیری ل گوندێ مەھیدیێ یێ سەر ب ناحیا دێرەلۆکێ ڤە دھاتە ھەژمارتن مەزنترین پرۆژێ بەرھەمئینانا سپیاتیان ل پارێزگەھا دھوکێ و گۆت: “ئەڤ پرۆژە ئێک ژ پرۆژێن ستراتیژیێن وەبەرھێنانێ بوو ل ل دەڤەرێ و کۆژمێ 24 ملیۆن و 250 ھزار دۆلار بۆ ھاتبوونە تەرخانکرن، کو دا ل سەر رووبەرێ (362.750 م2) ییچن ئەردی دھاتە چێکرن و پێدڤی بوو د ھەیاما 18 ھەیڤان دا ب داوی بھێت”.
رێڤەبەرێ ناحیا دێرەلۆکێ ئاشکرا ژی کر، ئەڤ پرۆژەیە ژ جھێ ب خودانکرنا چێلان و دووتنا شیری و عمبارا یان تانکێ شیری و کارگێری و باخچەیەکی پێک دھات و گۆت: “دشیان دا بوو ئەڤ پرۆژە پتر ژ ھزار چێلان ب خودان بکەت و رۆژانە پتری 25 ھزار لیترێن شیری بەرھەم بینیت”.
ژبەر ڤی ئەگەری مەزنترین پرۆژێ بەرھەمئینانا سیپاتیان ل دھۆکێ ھاتە ھەلوەشاندن
نيشاندان