شرۆڤەكارەكێ سیاسی پەردێ ل سەر نەدادییەكا مەزن د پڕۆژەیاسایا بودجەیا ئیراقێ دا بۆ سالا 2027 ڕادكەت و ئاشكرا دكەت كو بەغدا ب یەرۆڤاژی ئامارێن وەزارەتا پلاندانانێ و سەرژمێرییا گشتی، پشكا هەرێما كوردستانێ د بودجەی دا بۆ نیڤێ كێمكرییە. دوپاتیێ ل سەر وێ چەندێ ژی دكەت كۆ دڤێت مووچەیێ فەرمانبەرێن هەرێما كوردستانێ ژ ململانێیێن سیاسی بهێتە جوداكرن.
د. سامان شالی، شرۆڤەكارێ سیاسی، گۆت، پڕۆژەیاسایا بودجەیا ئیراقێ بۆ سالا 2027، پاشەڕۆژا هەموو پەیوەندییێن د ناڤبەرا هەولێرێ و بەغدایێ دا دەستنیشان دكەت.
ئاماژە ب وێ چەندێ ژی دا كو ل گۆرەی دووماهی سەرژمێری و ئامارێن فەرمی یێن وەزارەتا پلاندانانا ئیراقێ، ڕێژەیا ئاكنجییێن هەرێما كوردستانێ دبیتە 14،14%، لێ حوكمەتا فیدرالی پشتبەستنێ ل سەر بودجەیا سالا 2025 دكەت و دڤێت ب تنێ 12،7% یان كێمتر بۆ هەرێما كوردستانێ هەژمار بكەت، د دەمەكیدا ژ ڕوویێ كریاری ڤە ئەو كۆژمێ پارەیێ بۆ هەرێما كوردستانێ هاتییە دیاركرن كو 13 ترلیۆن و 700 ملیار دینارن، بەراورد ل گەل سەرجەمێ گشتیێ بودجەیا ئیراقێ (217 ترلیۆن دینار)، ب تنێ دبیتە 6،33% ژ بودجەی، ڕامانا وێ ئەوە كو هەتاكو ئەو 12،7% یا بەرێ ژی نەداینێ.
وی شرۆڤەكارێ سیاسی ڕۆهنكر ژی، هەرێما كوردستانێ پێگیرییێن خوە بجهد ئینیت و مەهانە نێزیكی 120 ملیار دیناران ژ داهاتێ ناڤخوە ددەتە بەغدایێ یان پارەیێ نەهاتییە هنارتن ژ مووچەیێ مووچەخۆران پێ د دەت، سەرەڕای ڕادەستكرنا 200 هزار بەرمیلێن نەفتێ ب شێوەیەكێ ڕۆژانە. گۆت ژی «هەكە ل گۆرەی داخوازا بەغدایێ، هەرێما كوردستانێ ڕۆژانە 400 هزار بەرمیلێن نەفتێ ڕادەست بكەت كو دبیتە 144 ملیۆن بەرمیل د سالەكێ دا و ب بهایێ 58 دۆلاران یێن د ناڤ بودجەی دا بهێتە هەژمارتن، هینگێ داهاتێ وێ دێ گەلەك زێدەتر بیت ژ وی كۆژمێ بودجەیێ بەغدا د دەتە هەرێما كوردستانێ».
دەربارەی شایستەیێن دارایی یێن هێزا پێشمەرگەی، د. سامان شالی دیار دكەت: ”ئاریشەیا سەرەكی د پرسا پێشمەرگەی دا ب تنێ نەهنارتنا مووچەی نینە، بەلكو نەوەكهەڤییەكا زۆر د پلەبەندییا مووچەی دا یا هەی، ب شێوەیەكی، پێشمەرگەیەكێ كو دهێتە دامەزراندن مووچەیێ وی 500 هزار دینارن، د دەمەكیدا سەربازەكێ ئیراقی 950 هزار دیناران وەردگریت، هەتاكو مووچەیێ پلەیا (عەقید) د هێزا پێشمەرگەی دا وەكی مووچەیێ (ملازم)ـەكێ یە د لەشكەرێ ئیراقێ دا. دوپات ژی كر، د دەمەكیدا د بودجەی دا چار ترلیۆن و 900 ملیار دینار بۆ حەشدا شەعبی هاتینە تەرخانكرن، چ بودجەیێن مەزاختن و چەكداركرنێ بۆ پێشمەرگەی ناهێنە دابینكرن، سەرەڕای وێ چەندێ كۆ ل گۆرەی دەستووری پێشمەرگە پشكەكە ژ سیستەمێ بەرگرییا ئیراقێ».
ل دۆر داخوازییێن شاندێ دانوستاندكارێ حكومەتا هەرێما كوردستانێ، د. سامان شاڵی ئاماژە ب وێ یەكێ كر كۆ هەولێر داخوازا (گرەنتییا یاسایی) دكەت داكو بژێڤی و قووتی خەلكی تێكەلی ئاریشەیێن سیاسی نەهێتە كرن. گرنگترین گەرەنتی ژی ئەوە كۆ ل گۆرەی بڕیارا دادگەها فیدرالی، مووچەیێ فەرمانبەرێن هەرێما كوردستانێ ژ مەزاختییێن دی بهێتە جوداكرن و سەربەخۆ بیت، داكو نەهێتە گرێدان ب مەرجێ رادەستكرنا نەفتێ و داهاتێ ناڤخۆ و هەر دەمێ وان بڤێت ببڕن.
گۆت ژی: «نابیت فەرمانبەر و خانەنشینێن هەرێما كوردستانێ وەكی وەلاتییێن پلە دوو بهێنە سەحكرن، د دەمەكیدا هەرێما كوردستانێ یاسایا خانەنشینییا ئێكگرتی یا عیراقێ ١٠٠٪ جێبەجێكرییە.»
گرێدای ئاستەنگێن ل هەمبەر كەرتی وزەیا هەرێما كوردستانێ، د. سامان شالی ڕەخنە ل حوكمەتا فیدرالی گرتن و گۆت: ”تێچوونا دەرهینانا نەفتێ ل هەرێما كوردستانێ ژبەر سرۆشتێ جوگرافییا وێ گرانترە، بەلێ بەغدا هەتا نوكە ئێك دینار ژی بۆ ژێرخانەیا وزەیێ و نووژەنكرنا زەڤییێن نەفتێ ل هەرێما كوردستانێ خەرج نەكرییە و دڤێت نەفتێ بێ بەرامبەر ببەت.
هەروەسا پرسیارا وێ چەندێ كر: بەغدا داخوازا 400 هزار بەرمیلێن نەفتێ دكەت و گەفێن بڕینا بودجەی دكەت، لێ كێ دێ زەڤییێن نەفتێ ژ ڤان هەموو هێرشێن مووشەكی و درۆنان پارێزیت یێن كو ل سەر هەرێما كوردستانێ دهێنە كرن؟»
د. سامان شاڵی باس ل وێ چەندێ ژی كر، د واقعێ نوكە دا (چارچۆڤەیێ هەماهەنگیێ) حوكمێ جڤاتا نوونەران و حوكمەتا ئیراقێ دكەت، لەوما دڤێت هەموو ئاریشە د ناڤ جڤاتا وەزیران دا و بەری هنارتنا پڕۆژەیاسایا بودجەی بۆ جڤاتا نوونەران بهێنە چارەسەركرن، ژبەر كو جڤاتا نوونەران بتنێ دەستهەلاتا ڤەگۆهاستنا پارەی یا هەی و نەشێت ڕێژەیان زێدە بكەت. هیڤی ژی خواست ل گەل ب دووماهی هاتنا پرسا تەمامكرنا پێكهینانا كابینەیا زەیدی و كۆمبوونا چاڤەڕێكری یا سەركردەیێن سیاسی، ب دیدەكا ئیراقییانە و ل سەر بنەمایێ دەستووری ئاریشە بهێنە چارەسەركرن، دوور ژ بۆچوونا بەرتەسك یا حزبی، ژبەر كو هەرێما كوردستانێ بەردەوام ل دووڤ چارەسەرییا ئاشتییانەیە، نەكو دروستكرنا قەیرانان.

وەزیرێ هەلبژارتییێ ئاڤەدانكرنێ وئاكنجیكرنێ ل ئیراقێ، ل داخۆیانییەكا ڕۆژنامەڤانی دا، گۆت: ڕێنماییا سەرۆك بارزانی بۆ مە هەردەم ئەو بوویە، كو خزمەتا هەمی گەلێ ئیراقێ بكەین.
ڕێباز حەملان، وەزیرێ هەلبژارتییێ ئاڤەدانكرنێ و ئاكنجیكرنێ ل ئیراقێ ڕاگەهاند: د جڤاتا وەزیرێن ئیراقا فیدرال دا دێ بمە بەڕەڤانێ مافێن ڕەوایێن خەلكێ كوردستانێ.
ل پێنجشەمبییا بۆری جڤاتا نوونەرێن ئیراقێ ب بەرهەڤبوونا 261 پەرلەمانتاران، ب مەبەستا دەنگدانێ ل سەر تەمامكرنا پێكهاتەیا كابینەیا وەزاری یا حوكمەتێ، كۆمبوو.
ل دەما ب ڕێڤەچوونا پرۆسەیا دەنگدانێ ، جڤاتا نوونەران باوەری دا 11 بەربژارێن پۆستێن وەزاری ژوان ژی ڕێباز حەملان بەربژارێ پارتی بۆ پۆستێ وەزیرێ ئاڤەدانكرنێ وئاكنجیكرنێ و سێ جێگرێن سەرۆكوەزیران، ب ڤێ چەندێ وەزارەتێن ڤالا و یێن نوو پێكهاتین ئێكلایی بوون.

نێچیرڤان بارزانی، سەرۆكێ هەرێما كوردستانێ ل پەیامەكێ دا هیڤیا زوو چاكبوونێ بۆ پاپا لیۆیێ چواردێ، پاپایێ ڤاتیكانێ دخوازیت و تەكەز ل سەر ڕۆلێ گرنگێ وی ل بەلاڤكرنا ئاشتی و پێكڤەژیانێ دكەت.
سەرۆكێ هەرێما كوردستانێ ل هەژمارا فەرمی یا خۆ ل تۆڕا جڤاكی یا ئێكس پەیامەك ئاراستەی پاپای كریە و تێدا هاتیە: «بیرهاتنا وێ دیدارا مەها ئایارێ یێ كو ل گەل پاپای ئەنجامدا، ب خۆشەڤیڤە دمینیت».
نێچیرڤان بارزانی ل دۆر بارودۆخێ تەندروستیا پاپای دبێژیت: «پشتی نەشتەرگەریا وی یا ڤێ دوماهیێ، هیڤیا زوو چاكبوونێ و تەندروستیەكا باش بۆ پاپای دخوازم».
سەبارەت ب هەولێن پاپای، سەرۆكێ هەرێما كوردستانێ ئاماژە ب وێ چەندێ كریە: «پابەندبوونا پاپای ب ئاشتی، كەرامەتا مرۆڤی و دیالۆگا ناڤبەرا گەلان بهایەكێ بلند هەیە».
نێچیرڤان بارزانی نڤیسیە: «هیڤیدارم پاپا ب وزەیەكا نوو و تەندروستیەكا باش ڤە بەردەوام بیت ل ئەركێ خۆ یێ گرنگ بۆ پەرەپێدانا ئاشتی، بەزەیی و تێگەهشتنێ ل سەرانسەری جیهانێ دا».

سەرۆكێ هەرێما كوردستانێ ل سێ پەیوەندیێن تەلەفۆنی یێن جودا دا ل گەل موحسن مەندەلاوی، لەیس خەزعەلی و محەمەد جبووری، پیرۆزباهییا باوەریپێدانا جڤاتا نوونەرێن ئیراقێ و دەستبكاربوونا وان وەك جێگرێن سەرۆكوەزیرێن ئیراقێ لێ كرن.
نێچیرڤان بارزانی هیڤیا سەركەفتنێ ل بجهئینانا ئەركێن وان دا بۆ خواستن، هەڤدەم «پیرۆزباهی ل جڤاتا وەزیرێن ئیراقێ و ئەندامێن حوكمەتێ كر ب هەلكەفتا هەلبژارتنا وەزیران و تەمامكرنا پێكهاتا كابینەیا وەزاری یا سەرۆكوەزیران عەلی فالح زەیدی، بۆ خزمەتا وەلاتی و وەلاتییان».

مەسرور بارزانی، سەرۆكێ حوكمەتا هەرێما كوردستانێ، پێشوازییا ئەحمەد ئەلجەربا، سەرۆكێ ڕەوتێ (الغد) یێ سووریایێ كر.
ب گۆرەی بەیاننامەیەكا حوكمەتا هەرێما كوردستانێ، د دیدارێ دا بیروڕا ل دۆر دووماهیك گۆڕانكاری و پێشهاتێن سووریایێ و دەڤەرێ هاتنە لێكگۆهارتن.

سكرتێرێ جڤاتا وەزیرێن هەرێما كوردستانێ ڕاگەهاند، كێمكرنا ڕێژەیا ئاكنجییێن هەرێمێ بۆ 12،7% چ بهایەكێ یاسایی نینە.
ئەنجامدانا بەراوردكرنا داتایێن دەڤەران ل گەل تۆمارێن سالا 1957 دڤێت ب هەڤپشكییا حوكمەتا هەرێمێ و فیدرالی بهێتە كرن. بڕیارا جڤاتا وەزیرێن فیدرالی ب ڕۆهنی هاتییە كو نابیت ئەنجامێن دووماهیێ یێن سەرژمێریێ بهێنە ڕاگەهاندن.
ئامانج ڕەحیم، سكرتێرێ جڤاتا وەزیران ، د بەرپەرێ خووە دا ل سەر تۆرا جڤاكییا فەیسبووكی دا بەلاڤكرییە: ”ئەنجامدانا بەراوردكرنا داتایێن دەڤەرێن مادەیا 140ێ ل گەل تۆمارێن سالا 1957 ب هەڤپشكییا حوكمەتا هەرێمێ و فیدرالی مەرجێ ئاشكراكرنا ڕێژەیا ئاكنجیبوویانە. ل گۆرەی بڕگەیا (4) یا بڕیارا جڤاتا وەزیرێن فیدرالی یا ب هەژمار 24860 یا سالا 2024، ب ڕۆهنی هاتییە كو بەری ب دووماهی هاتنا بەراوردكرنا داتایێن سەرژمێریێ ل گەل تۆمارا سالا 1957 بۆ دەڤەرێ ناكۆكی ل سەر، نابیت ئەنجامێن دووماهیێ یێن سەرژمێریێ بهێنە ڕاگەهاندن، لێ هەتا نوكە ئەڤ بەراوردكرنە نەهاتییە كرن و وەزارەتا پلاندانانێ یا فیدرالی خوە ژێ ڤەددزیت».
وی زێدەتر گۆت ”كێمكرنا ڕێژەیا ئاكنجییێن هەرێمێ چ بهایەكێ یاسایی نینە و ڕێژەیا 12،7% وەك ئەنجامێ دووماهیێ ناهێتە هەژمارتن هەتا كو بەراوردكرنا داتایان نەهێتە كرن. د هەمان دەم دا ل گۆرەی هەردوو بڕگەیێن هەژمار سێ و چار یێن بڕیارەكا دی یا جڤاتا وەزیرێن فیدرالی ب هەژمار 24853 یا سالا 2024 بەراوردكرنا داتایێن وان دەڤەران ل گەل داتایێن سەرژمێرییا سالا 1957، دڤێت ب هەڤپشكییا هەردوو وەزارەتێن پلاندانانێ یێن فیدرالی و هەرێمێ و هەردوو دەستەیێن ئامارێ یێن حوكمەتا هەرێما كوردستانێ و حوكمەتا فیدرالی بهێنە كرن، نە ب ڕێكارین تاكی یێن فیدرالی».
ل دووماهیێ ژی دوپات كر ”ژ بەر كو هەتا نوكە بەراوردكرنا داتایان و پشكنینا هەڤپشك نەهاتییە كرن، ڕاگەهاندنا ئەنجامەكێ دووماهیێ و بكارهینانا وێ بۆ دیاركرنا پشكا ئاكنجییێن هەرێما كوردستانێ، نە یاساییە و و دڤێت ڕێ لێ بهێتە گرتن».

وەزیرێ دەرڤە یێ ئیراقێ، ئاشكرا كر، ئیراق بوویە قوربانییا پێشهاتێن ململانێ یێن هەرێمی و ب ئەگەرێ ڕاوەستاندنا هنارتنا نەفتێ ژی نێزیكی 60 ملیار دۆلار زیانێن دارایی بەركەفتینە.
فوئاد حسێن، وەزیرێ دەرڤە یێ ئیراقێ دەربارەی ململانێ یێن دەڤەرێ و شەڕێ ئیرانێ ڕاگەهاند «ئیراقێ ل دەستپێكێ ب ڕۆهنی ڕاگەهاندیە، ب چ شێوەیەكێ نابیتە پشكەك ژ وی شەڕی، بەلێ ب ئەگەرێ فرەهبوونا مەودایێ شەڕی، هێرش ل سەر وەلاتێ مە هاتە كرن و قوربانی لێكەفتینە، لەوڕا دشێم بێژم ئیراق بوویە قوربانییا ململانێیا د ناڤبەرا وان ئالییێن پشكدار د شەڕی دا ل دەڤەرێ».
ژ ئالیێ ئابۆری ڤە ژی، ڕاگەهاند: ب ئەگەرێ شەڕی و دائێخستنا تەنگئاڤا هورمزی، هنارتنا نەفتا ئیراقێ ب تەمامی ڕاوەستایە، ئەڤە ژی بارگرانییەكا مەزنا دارایی بۆ حوكمەتێ دروست كریە ژ بەر وێ چەندێ ئابۆرێ ئیراقێ ب شێوەیەكێ سەرەكی پشت ب فرۆتنا نەفتێ دبەستیت، گۆت ژی»د وی دەمی دا ب ئەگەرێ ڤی بارودۆخی نێزیكی 60 ملیار دۆلار زیان ب ئیراقێ گەهشتیە».
سەبارەت ب پەیوەندییێن د ناڤبەرا بەغدایێ و واشنتۆنێ دا پشتی ڤەكێشانا هێزێن هەڤپەیمانان ژ ئیراقێ، فوئاد حسێن دوپاتی ل وێ چەندێ كر كو پەیوەندییێن د ناڤبەرا هەردوو وەلاتان دا ل سەر بنەمایێ ڕێككەفتنا ستراتژییە و ب تنێ ل سەر مانا هێزێن سەربازی دروست نەبوویە هەتا ب چوونا هێزان دووماهیك بهێت، بەلكو نوكە پەیوەندییان وەرچەرخانەیەك ب خوە ڤە دیتییە و ل شوونا بوارێ سەربازی، گرنگییەكا زێدەتر ب پێشڤەبرنا كەرتێ ئابۆری دهێتە دان.

وەزیرێ ڤەگۆهاستن و گەهاندنێ ل حوكمەتا هەرێما كوردستانێ، د پەیامەكێ دا یا كو ئاڕاستەی عەلی فالح زەیدی، سەرۆكوەزیرێن ئیراقێ كری، هۆشداری دا ژ پشتگوهـ هاڤێتنا ئیرادەیا ڕاستەقینەیا پێكهاتەیێ مەسیحی د پرۆسەیا پێكهینانا كابینەیا نوو یا حكومەتێ دا و دوپات كر، نابیت نوونەرایەتیكرنا ڤێ پێكهاتەیێ وەك دەستكەفتێ سیاسی ب سەر میلیشییا و ئالیێن شكەستن خواری دا بهێتە بەلاڤكرن.
ئانۆ جەوهەر، وەزیرێ ڤەگۆهاستن و گەهاندنێ ل حوكمەتا هەرێما كوردستانێ، د دەقێ پەیاما خۆ دا ڕەخنەیەكا توند ل هەژموونا گرۆپێن چەكدار گرت و ڕووبڕووی سەرۆكوەزیرێن ئیراقێ گۆت «ئایا ل سەردەمێ دەستهەلاتا تە بالادەستییا چەكی ب سەر شكۆیا دەولەتێ دا سەردكەڤیت؟ ئایا سەركردەیێن گر‌وپێن چەكدار و نڤیسینگەهێن ئابۆری ب هێزتر بوون ژ دەزگەهێن دەولەتێ، سەرۆكایەتییا حوكمەتێ، جڤاتا نوونەران و ئیرادەیا دەنگدەران د سندۆقێن دەنگدانێ دا؟».
هەروەسا ڕاگەهاند، نابیت ئیرادە و دەنگێ ئازادێ مەسیحییان ئێدی وەك بارمتەیەك بۆ سازش و بازرگانییا سیاسی بمینیت.
وەزیرێ ڤەگۆهاستن و گەهاندنێ ڕۆناهی ئێخستە سەر بزاڤان بۆ دانا پۆستێ وەزاری ب ئالیێ نەهەژی و ڕاگەهاند: «ئایا ڕەوایە پۆستێ وەزاری ب كەسەكێ بهێتە بەخشین یێ كو هەڤژینا وی د هەمان حوكمەتێ دا پلەیا وەزیری هەبیت، یان ب زۆری پۆستەك ب ئالییەكێ بهێتە دان یێ كو باوەرییا دەنگدەران د هەلبژارتناندا ژ دەستدایە؟ ئایا ئەڤەیە دادی و ڕێزگرتن ل ئیرادەیا گەلی؟» دووپات ژی كر مافێن مەسیحییان بەخشین و چاكەیا چ ئالییەكێ نینە، بەلكو مافەكێ بنەڕەتییە و نابێت ب گۆرەی هەڤكێشەیا هێز و هەژموونێ بهێتە تالانكرن.
د دووماهیا پەیامێ دا، ئانۆ جەوهەر داخواز ژ عەلی زەیدی كر شاشییێن بۆری دووبارە نەكەت و ڕێكێ نەدەت دەستهەلاتا چەكی.

ب، سه‌رجان مەحمود:

هژمارەک زێدە ژ چالاکڤان و کەساتیێن رۆژهەلاتێ کوردستانێ دیار دکەن، ئەوا ڤێ دووماهیێ هندەک کەساتی بۆ رۆژهەلاتێ کوردستانێ بەحس دکەن ل گەل راستیا رۆژهەلاتێ کوردستانێ ناگونجیت و دڤێت کورد ل رۆژهەلات خوە برێڤە ببەن.

ئەردەلان فەرەجی چاڤدێرێ سیاسی یێ خەلکێ رۆژهەلاتێ کوردستانێ دیار کر، بەرێز بافل تالەبانی بەری چەند رۆژان دیار کر وان ل گەل ئیرانێ ئاخڤینە و قووناغەکا ئاشتیێ وەکو یا ل تورکیا دشێت ل ئیرانێ ژی ل گەل کوردان دەستپێ بکەت، لێ بەری هەر تشتەکێ ل رۆژهەلاتێ کوردستانێ ب دەهان پارتی و هێزێن سیاسی هەنە، رۆژهەلاتێ کوردستانێ تایبەتمەندیا خوە هەیە و دڤێت ژبیر نەکەین کو بەری نها کۆمارا کوردستانێ ل رۆژهەلات هاتیە راگەهاندن، ئانکۆ ب کورتی کورد قەبوول ناکەن ببنە پشکەک ژ سیستەمێ سیاسی یێ ل ئیرانێ و گۆت: (دڤێت کورد ل رۆژهەلاتێ کوردستانێ خوە برێڤە ببەن، ئانکۆ ئەو دەڤەرێن کورد تێدا دژین دڤێت ئۆتۆنۆمی یان ژی مۆدیلەکا دی هەبیت و ئەوا نها ل رۆژئاڤایێ کوردستانێ روو ددەت و ژ بۆ باکور ژی کار ل سەر دهێتە کرن ژ ئالیێ کوردێن رۆژهەلاتێ کوردستانێ ڤە ب چو رەنگەکێ ناهێتە قەبوول کرن و نە تنێ هێزێن سیاسی بەلکو وەلاتیێن کورد ژی تشتەک وەسا قەبوول ناکەن).
ناڤهاتی ئەو یەک ژی دیار کر، جڤاکێ رۆژهەلاتێ کوردستانێ گەلەک هشیارە و دووڤچوونا روودانێن سیاسی دکەت، یا ل رۆژئاڤایێ کوردستانێ دهێتە کرن ب چو رەنگەکێ بۆ رۆژهەلات نابیت و ل گەل راستیا سیاسی و جڤاکی یا رۆژهەلاتێ کوردستانێ ناگونجیت، خالا دی هەر دانوستاندنەک ل گەل ئیرانێ ژی بهێتە کرن دڤێت ژ ئالیێ پارتیێن سیاسی یێن رۆژهەلاتێ کوردستانێ ڤە بیت و چو هێز یان ژی کەسایەتیێن دی ئەو مافە نینە ب جهێ خەلکێ رۆژهەلاتێ کوردستانێ بریارێ بدەت.
ل ئالیێ دی دارا ناتق چاڤدێرێ سیاسی یێ کورد ل وەلاتێ بەلجیکا ژی دیار کر، حزبا دیموکرات یا کوردستان/ ئیران ئەزموونەک گەلەک نەخوەش ل گەل ئیرانێ هەیە، بەری نها حزبا دیموکرات گەلەک بزاڤ کرن کو پرسا کوردی ل ئیرانێ ب رێیا دانوستاندنان بهێتە چارەسەرکرن و ژ بۆ ڤێ یەکێ ژی رێبەرێ وی دەمی یێ حزبا دیموکرات د. قاسملۆ دەست ب بزاڤەک مەزن کر، لێ مخابن ل سەر مێزا دانوستاندنان هاتە شەهید کرن و نها ژی ئیرانێ چو بەرنامە بۆ چارەسەرکرنا پرسا کوردی نینن و یا نها ئیران دکەت تنێ بۆ خاپاندنا رایا گشتی یە.
چاڤدێرێ سیاسی ئەو یەک ژی دیار کر، هێزێن سیاسی یێن کورد ل ئیرانێ هەردەم ئامادە نە کو پرسا کوردی ب رێیێن ئاشتیانە بهێتە چارەسەرکرن، لێ ئیران بەرهەڤ نینە و نها ژی رژێما ئیرانێ گەلەک لاوازە و دڤێت دەلیڤەیێن هەی ژناڤ ببەت و جارەکا دی فێل ل کوردان بکەت، ژ بەر ڤێ یەکێ ژی دڤێت هەموو ئالیێن سیاسی یێن کوردی دەمێ بەحسێ چارەسەرکرنا پرسا کوردی ل ئیرانێ دکەن ل گۆر راستیا رۆژهەلاتێ کوردستانێ و سیاسەتا هەی هەلوەستێ خوە دیار بکەن و گۆت: (هەر مۆدیلەکا چارەسەریێ کو ل گۆر راستیا سیاسی و جڤاکی یا خەلکێ کورد ل رۆژهەلاتێ کوردستانێ نەبیت چو ئەنجامێن خوە ژی نابن، ئەوا نها ل رۆژئاڤایێ کوردستانێ دهێتە کرن ژ ئالیێ گەلێ مە ل رۆژهەلات ب توندی دهێتە رەت کرن، چونکی کوردان دڤێت ل رۆژهەلاتێ کوردستانێ بگەهنە مافێن خوە و خوە برێڤە ببەن).
بەهرۆز شوجاعی نڤیسەر و ڤەکۆلەرێ کورد ژی دیار کر، کوردان ئەزموونەکا دوور و درێژ ل گەل دەستهەلاتێن ئیرانێ هەیە، بابەت تنێ رژێما نها یا ئیرانێ نینە، بەلکو دەولەتا ئیرانێ هەبوونا کوردان قەبوول ناکەت، بەری کۆمارا ئیسلامی بهێتە سەر دەستهەلاتێ ژی رژێما شاهی زۆرداریەکا گەلەک مەزن ل کوردان دکر و هەبوونا کوردان قەبوول نەدکر و کۆمارا ئیسلامی یا ئیرانێ ژی بەردەوامی دا هەمان سیاسەتێ.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، هێزێن کوردی ل رۆژهەلاتێ کوردستانێ د رەوشەکا باش دا نینن، دڤێت بەری هەر گوهۆڕینەکێ ل ئیرانێ، هێزێن کوردی خوە بەرهەڤ بکەن، نابیت پارتێن سیاسی یێن رۆژهەلاتێ کوردستانێ ل دووڤ هندەک هێزێن ئۆپۆزسیۆنێ یێن ئیرانێ بکەڤن، چونکی هێزێن ئۆپۆزسیۆنا ئیرانێ ژی وەکو دەستهەلاتێ ل دژی مافێن گەلێ کوردن و گۆت: (گرنگە کورد ل رۆژهەلاتێ کوردستانێ د ئاڤاکرنا سیستەمەک نوو دا خوەدان رۆل بن، دڤێت د ئامادەکرنا دستوورەکێ نوو دا ببنە فاکتەرەک سەرەکی نە کو چاڤەرێ بن کا دێ دەستهەلاتا نوو چ دەتە کوردان، دڤێت کورد مافێن خوە وەربگرن).
ل ئالیێ دی گەلەک کەسایەتیێن سیاسی یێن خەلکێ رۆژهەلاتێ کوردستانێ ب رێیا تۆرێن جڤاکی دیار کرن، ب سالانە کورد ل ئیرانێ داخوازا ئاشتیێ و چارەسەریێ دکەن، لێ دەستهەلاتا ئیرانێ رۆژانە لاوێن کورد زیندانی دکەت، نها ب هزاران لاوێن کورد د زیندانێن ئیرانێ دانە و رۆژانە ژی رژێما ئیرانێ چالاکڤان و کەسایەتیێن کورد ل سێدارە ددەت و کورد ب چو رەنگەکێ زۆرداریا رژێما ئیرانێ قەبوول ناکەن و ب سالانە کورد شەڕی بۆ ئازادیا خوە دکەن، مۆدیلا ل رۆژئاڤایێ کوردستانێ بۆ رۆژهەلات نابیت، ل رۆژهەلاتێ کوردستانێ جڤاکەک گەلەک هشیار هەیە، ب هزاران سازی و رێکخستنێن کوردی یێن مەدەنی ل رۆژهەلاتێ کوردستانێ هەنە، کوردان دڤێت ل ئیرانێ ببنە شریکێ دەستهەلاتێ و د ئاڤاکرنا سیستەمەک نوو و دیموکراتی دا پشکدار بن.

سەرۆك بارزانی ل پیرمام پێشوازی ل قونسولا گشتییا ئەمەریكایێ ل هەولێرێ كر و د دیدارەكێ دا هەردوولا دوپاتی ل پێشڤەبرنا پەیوەندییێن دووقۆلی، بەردەوامییا پشتەڤانییێن واشنتۆنێ بۆ هەرێما كوردستانێ و بهێزكرنا ئاشتی و ئارامیێ ل دەڤەرێ كرن.
بارەگەهێ بارزانی د بەیاننامەیەكێ دا دیار كر، ل پیرمام سەرۆك بارزانی پێشوازی ل گوێندەلن ویندی گرین، قونسلا گشتییا نوو یا ئەمەریكایێ ل هەولێرێ كر.
د وێ دیدارێ دا، قونسلا گشتییا ئەمەریكایێ ل هەولێرێ خوەشحالییا خوە دەربڕی ب دەستپێكرنا كارێ خوە وەك قونسلا وەلاتێ خوە ل هەرێما كوردستانێ و دیار كر كو دێ د بزاڤێن خوە دا بۆ پێشئێخستنا پەیوەندییێن د ناڤبەرا هەرێما كوردستانێ و ئەمەریكایێ دا بەردەوام بیت، هەروەسا ئاماژە ب وێ چەندێ كر كو وەلاتێ وێ خوە ب پشتەڤانەكێ سەرەكی یێ خەلكێ كوردستانێ دبینیت و ڕێزەكا تایبەت بۆ پێگەهێ سەرۆك بارزانی ل ئیراقێ و دەڤەرێ هەیە، هیڤی ژی خواست هەرێما كوردستانێ وەك هەردەم ل ڕۆلێ خوە یێ بهێزكرنا ئارامیێ ل دەڤەرێ بەردەوام بیت.
ژ ئالیێ خوە ڤە، سەرۆك بارزانی ب گەرمی بخێرهاتنا قونسلا ئەمەریكایێ ل هەولێرێ كر و سوپاسییا ئەمەریكا كر كو د شەڕێ دژی تیرۆرستێن داعشێ دا پشتەڤان و هاریكارا هەرێما كوردستانێ بوویە. سەرۆك بارزانی دەستپێكرنا كارێن قونسلخانەیا ئەمەریكا ل هەرێما كوردستانێ ب پێنگاڤەكا ئەرێنی هەژمارت، داكو پەیوەندییێن د ناڤبەرا هەردو ئالییان دا د بوارێن جودا جودا زێدەتر پێشڤەبچن.
هەروەسا د وێ دیدارێ دا، بیروڕا دەربارەی ڕەوشا دەڤەرێ هاتنە لێكگۆهارتن و هەردو ئالییان دوپاتی ل وێ چەندێ كرن كو دڤێت ئاشتی و ئارامی ل دەڤەرێ هەبیت.