ئه‌ڤرۆنیۆز، ئه‌یاد به‌رواری
ئۆپۆزسیۆنا ئیرانی ل ده‌رڤه‌ راگه‌هاند، فه‌رماندێ (فه‌یله‌ق قودس) یێ ئیرانی جه‌نه‌رال (قاسم سلێمانی) ل شه‌ڕه‌كی ل سووریێ ب دژواری یێ بریندار بووی.
جڤاتا نیشتمانی یا به‌رهنگاریا ئیرانی د به‌یاننامه‌كێ دا دبێژیت كو پێزانین دناڤ زێره‌ڤانێن شۆرشا ئیرانی یێن گه‌هشتینه‌ وان كو قاسم سلێمانی د شه‌ڕه‌كی دا ل گه‌ل له‌شكرێ سووریێ ئازاد به‌ری دو هه‌فتیان ل حه‌له‌بێ تووشی برینه‌كا دژوار بوویه‌ و هنده‌ك پارچێن بۆمبه‌كی به‌ر ب سه‌رێ وی یێن كه‌فتین.
خویاكر ژی” له‌شكرێ سووریێ ئازاد بۆمبه‌ك ئاراسته‌ی ترومبێلا قاسم سلێمانی كربوو د ده‌مێ سه‌رپه‌رشتیا ئۆپه‌راسیۆنێن زێره‌ڤانێن شۆرشا ئیرانی و ئه‌و هێزێن دبن سه‌رپه‌رشتیا وی ڤه‌ ل سووریێ، د ئه‌نجامدا ب دژواری بریندار بوویه‌ و ئێكسه‌ر ف فرۆكه‌كا هه‌لیكۆپته‌ر بۆ دیمه‌شقێ هاتبوو ڤه‌گوهاستن و پاشی بۆ نه‌خۆشخانا (به‌قیه‌ت الله) یا سه‌ر ب زێره‌ڤانێن شۆرشا ئیرانی ل ته‌هرانێ و هه‌تا نوكه‌ دو نشته‌رگه‌ری یێن بۆ هاتینه‌ كرن و ره‌وشا وی یا باش نینه‌”.
ل رۆژا چار شه‌مبیا بۆری هنده‌ك ژیێده‌رێن سووری بۆ ئاژانسا رۆژنامه‌ڤانیا فره‌نسی دیاركربوو كو قاسم سلێمانی یێ تووشی برینه‌كا سڤك بووی د شه‌ڕه‌كی دا د ناڤبه‌را له‌شكرێ سووری و گرۆپێن چه‌كدار ل باكوورێ سووریێ.
ژلایێ خوه‌ڤه‌ عه‌مید (ره‌مه‌زان شه‌ریف) په‌یڤدارێ زێره‌ڤانێن شۆرشا ئیرانی بۆ ئاژانسا ده‌نگوباسێن ئیرانی راگه‌هاندبوو” چو راستی بۆ برینداربوونا قاسم سلێمانی نینن و ره‌وشا وی یا باشه‌ و بزاڤێن وی د به‌رده‌وامن بۆ هاریكاریا سووریێ و عیراقێ د به‌رهنگاریا گرۆپێن تیرۆرستی و ته‌كفیری دا”.

ئه‌ڤرو نیوز،بارزان مزوورى

ئه‌ڤرو ده‌مژمێر 3:15 خوله‌ك 28/11/2015 ل سه‌ر رێیا سه‌ره‌كیا ئه‌تروش بو ده‌ڤه‌را چه‌مكانێ ل نێزیك گوندێ بلان ترومبێله‌ك ژ جورێ پیكاب دێر د وه‌رگه‌ریێت و د ئه‌نجام دا ژن و مێره‌ك یێن گه‌نج دناڤ دا بون ب دژوارى برینداربون و بو نه‌خوشخانا شێخان هاتن ڤه‌گوهاستنو حه‌تا نها لبن چاڤدێریا نوژدارانه‌ .
لدوڤ گوتنێن شوفێرى كو ل سه‌ر رێ حسو رژیا بو، سه‌ر رێ چه‌ند پێ خو ل ستوپێ دا ترومبێل دا لێك زڤرى و چه‌ند مه‌تره‌كا چوو و هه‌ر حه‌سو بو حه‌تا ترومبێل وه‌رگه‌ریایى و پێدڤیه‌ خودانێ وێ ترومبێلا بارهه‌لگر بهێته‌ سزادانو بشێوه‌یه‌كێ نه‌یێ یاسایى حه‌سو رژیا بو سه‌ر رێ و نه‌هات بو پاقژ كرن ئه‌و گه‌رێ وه‌رگریانا ترومبێلێ حه‌سو بو .

ئه‌ڤرۆنیۆز، ئه‌یاد به‌رواری

سه‌رۆك وه‌زیرێن ئیسرائیلێ پشته‌ڤانیا وه‌لاتێ خوه‌ بۆ سه‌ربخوه‌یا كوردستانێ دیاركر و دوپاتی ل سه‌ر وێ چه‌ندێ ژی كر كو پێدڤیه‌ هه‌ڤپه‌یمانیه‌ك د ناڤبه‌را هێزێن میانڕه‌و ل ده‌ڤه‌رێ دروست ببیت.
بنیامین ناتانیاهۆ سه‌رۆك وه‌زیرێن ئیسرائیلێ د گۆتاره‌كێ دا ل ناڤه‌ندا ڤه‌كۆلینێن (ته‌ل ئه‌بیب) گوت” د چارچۆڤێ هه‌ڤپه‌یمانیه‌كا به‌رفره‌ه دا د ناڤبه‌را هێزێن میانڕه‌وێن ده‌ڤه‌رێ، پێدڤیه‌ ده‌وله‌تا كوردی یا سه‌ربخوه‌ دروست ببیت”.
ناتانیاهۆی گوت ژی” زێده‌بوون و به‌رفره‌هبوونا توندڕه‌وێن سونی ب هاریكاریا قاعیده‌، ل گه‌ل زێده‌بوون و به‌رفره‌هبوونا شیعان ب هاریكاریا ئیرانێ، ره‌وشه‌كا وه‌سا یا دروستكری كو پێدڤیه‌ هاریكاریا كوردستانێ بكه‌ین كو ئۆتۆنومی یا هه‌ی ل باكوورێ عیراقێ و ده‌ڤه‌ره‌كا زه‌نگێن ب ڕێڤه‌دبه‌ن” دیاركر ژی” كورد نه‌ته‌وه‌كێ شه‌ڕكه‌رن و یا سه‌لماندی ژی كو دشێن پێگیریا سیاسی بپارێزن و هه‌ژی سه‌ربخوه‌یێ نه‌ و پێدڤیه‌ پشته‌ڤانیا خه‌ونا كوردان بۆ سه‌ربخوه‌یێ بكه‌ین”.

ئه‌ڤرۆنیۆز، ئه‌یاد به‌رواری
پرۆفیسۆره‌كێ سویدی یێ تایبه‌تمه‌ند دبیاڤێ شرۆڤه‌كرنا پێزانینێن هه‌والگیری ل زانكۆیا لوند یا سویدی دیاركر كو كریارێن تیرۆرستی ئه‌وێن پاریس رووداین و به‌رسڤا فره‌نسا ل سه‌ر وان دوپاتیه‌ ل سه‌ر هه‌لبوونا شه‌ڕێ جیهانیێ سیێ.
ویلهلم ئه‌گریل د دیداره‌كێ دا ل گه‌ل رۆژناما ( سیدسفینسكا) یا سویدی گوت” شه‌ڕێ جیهانیێ سیێ دێ گه‌له‌ك یێ جودا بیت ژ هه‌ردو شه‌ڕێن جیهانی یێن ئێكێ و دویێ و راده‌یا وی دێ به‌ده‌وام زێده‌تر لێهێت”.
گوت ژی” شه‌ڕێ د ناڤبه‌را رێكخستیێن تیرۆرستی یێن ئیسلامی ژلایه‌كی ڤه‌ و وه‌لاتێن ئورۆپی ژلایه‌كێ دی ڤه‌، ب ره‌نگه‌كێ باش دیاردكه‌ن كو شه‌ڕێ جیهانیێ سیێ یێ هه‌لبووی”.
ب دیتنا وی شاره‌زایێ پێزانینێن هه‌والگیری” ژ كارڤه‌دانا فره‌نسا، رێكخستیا ده‌وله‌تا ئیسلامی (داعش) یا تیرۆرستی دێ چه‌كێ شه‌ڕه‌كێ به‌رفره‌هتر كه‌ت، داخویانیا فره‌نسا ژی كو ئه‌و یا د شه‌ڕی دا ل گه‌ل تیررۆێ، ئارمانجا داعشێ بوو و تێدا سه‌ركه‌فت”.
خویاكر ژی” پشكداریا چار وه‌لاتان د ڤی شه‌ڕی دا، ژ سه‌رجه‌مێ پێنج وه‌لاتێن ئه‌ندامێن به‌رده‌وام د جڤاتا ئاسایشا نێڤده‌وله‌تی دا، وی شه‌ڕی دكه‌ته‌ شه‌ڕه‌كێ جیهانی” گوت ژی” شاشی یه‌ كه‌ هه‌كه‌ هزر بهێته‌ كرن كو شه‌ڕێ جیهانیێ سیێ دێ وه‌كو هه‌ردو شه‌ڕێن جیهانی یێن ئێكێ و دویێ بیت، به‌لكو ئه‌م نوكه‌ یێن د شه‌ڕێ جیهانیێ سیێ دا، به‌لێ ئه‌م وێ چه‌ندێ نزانین”.
گوت ژی” شه‌ڕێ نوكه‌ و ئه‌نجامێن وی، كارتێكرنێ ل سه‌ر رۆژهه‌لاتا ناڤین و ئه‌فریقیا ب تنێ ناكه‌ت، به‌لكو دێ ل سه‌ر ئورۆپا ژی كه‌ت و ئه‌م نوكه‌ یێ زنجیره‌كا روودانێن مه‌زن ل وه‌لاتێن ئێكه‌تیا ئورۆپی دبینین، بێ كو ئه‌م بشێن كونترۆلێ ل سه‌ر بكه‌ین”.
ل دۆر پێشبینیێن ڤی شه‌ڕی، پرۆفیسۆرێ سویدی دبێژیت” ئه‌م نزانین دێ چاوا ئه‌ڤ شه‌ڕه‌ب دووماهی هێت، ب زه‌حمه‌ته‌ ژی د چه‌ند هه‌فتیه‌كان دا پێشبینیێ بكه‌ین و بێژین كا دێ ره‌وش ل رۆژهه‌لاتا ناڤین و ئێكه‌تیا ئورۆپی پشتی چه‌ند سالان یا چاوان بیت، به‌لێ پێشبینیه‌كا مه‌زن یا هه‌ی ئه‌وژی به‌رفره‌هبوونا بیاڤێ ڤی شه‌ڕی كو دێ بیته‌ شه‌ڕه‌كێ مال وێرانكه‌ر د پاشه‌رۆژێ دا”.