ئه‌ڤرۆ نيوز:

ئەڤرۆ رۆژا پێنجشەمبی رێکەفتی 20ى ته‌باخا 2015ێ و ل دەم ژمێر 8:30 سپێدێ ل سەرانسەری ھەرێما کوردستانێ ئەزموونێن گشتی و نیشتیمانی يێن خولا دويێ بۆ سالا خواندنێ 2014-2015 قوناغا 12 ئامادەیی ب ھەمی پشکێن خوه‌ ڤە و پۆلا 9ێ بنەرەتی دەست پێکرن.
ئه‌حمه‌د عه‌بدولا زۆبێر به‌رپرسێ راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ بۆ ئه‌ڤرۆ نيوز گۆت: “ژ بۆ ژ نێزیک ئاگەھدار بوون ب رەوشا رێڤەچوونا ئەزموونان به‌ھزاد عه‌لی ئادەم  جێگرێ پارێزگەرێ دھۆکێ و  عه‌بد یوسف ئه‌حمه‌د رێڤەبەرێ گشتی یێ پەروەردا پارێزگەھا دھۆکێ و د گەل دا فه‌خری که‌لش رێڤەبەرێ رێڤەبەریا سەرپەرشتیا پەروەردەیی و دلنیا جوری سەرا چەندێن بنگەھێن ئەزموونان ل سنورێ پەروەردا قەزا دھۆک روژئاڤا دا”.
زێده‌تر گۆت: “دڤان سەرەدانا دا ژ نێزیک ئاگەھداری رەوشا ئەزمووونان ل بنگەھێن ناڤبری بون و داخازا سەرکەفتنێ بو سەرجەم قوتابیان خواست، بنگەھێن سەرەدانا وان ھاتینە کرن ( ئامادەیا سادق بھائه‌دین و لاڤان و ته‌ئاخی) .
44 هزار و 651 قوتابیێن پولا 12 ئامادەی و 9 بنەرەت دێ پشکداریێ ئەزموونێن گشتی و نیشتیمانی خولا دووێ سالا خواندنێ 2014.2015 دا کەن و ل سەر 755 بنگەھان ل سەرانسەری پارێزگەھا دھۆکێ ھاتینە دابەشکرن.

ئەڤرۆ نيوز:
ل دووڤ نڤیسارەکا وەزارەتا باژێرڤانی و گەشت و گوزارێ، رێڤەبەرێن ھەردو باژێرڤانیێن دھۆکێ رۆژھەلات و رۆژئاڤا دێ ھێنە گوھۆڕین.
ل دووڤ نڤیسارا ژمارە 10991 یا کو ل 16\8 دەرکەفتی، بەھجەت حسێن عەبدوللا ل شوونا مللەت سالم محەمەد دێ بیتە رێڤەبەرێ باژێرڤانیا رۆژھەلات و مللەت سالم محەمەد ل شوونا جەلال رەشید سولتان دێ بیتە رێڤەبەرێ باژێرڤانیا رۆژئاڤا.
ھەر ل دووڤ ھەمان نڤیسار، جەلال رەشید سولتان ژی دێ بۆ دیوانا سەرۆکاتیا باژێرڤانیا دھۆک ھێتە ڤەگوھاستن و ئەڤ فەرمانە ھەر ژ رۆژا دەرکەفتنێ دێ ھێنە بجە ئینان.

ئەڤرۆ نيوز:
سەرۆکێ زانکۆیا دھۆک بۆ رۆژناما ئەڤرۆ دیار کر کو ئەو راگرێن چار سالان راگری کری دێ ژ پۆستێ راگریێ ھێنە ئازا کرن و ھندەک کەسێن دی دێ ل شوونا وان ھێنە دانان.
پرۆفیسۆر د. مسلح دھۆکی ئاشکرا کر ژ بەر ڤێ چەندێ راگرێن کۆلیژێن: چاندنێ، پزیشکی ڤێتەرنەری، زانستێن مرۆڤایەتی و زانستێن پەروەردەیی و زانستێن پزیشکی و کۆلیژا زانست دێ ژ پۆستێن وان ھێنە ئازا کرن و گۆت:(دەستھەلاتێن منن ھندەک کەسان بۆ جھێن وان دەستنیشان بکەم، ھەتا راگرێن نوو دەست بکار دبن).
سەرۆکێ زانکۆیا دھۆک دیار کر ژی کو ھاریکارێ وی بۆ کاروبارێن كارگێرى و داراى ژی ژ بەر ھەمان مەرەم دێ ژ پۆستێ وی ھێتە ئازا کرن و کەسەکێ دی دێ ل شوونا وی ھێتە دانان.

ئه‌ڤرۆ نيوز:

ئەندامەکێ سەرکردایەتیا پارتی دیموکراتی کوردستان راگەھاند، نەیارێن پارتی دێ شکەستنێ ئینن د دووماھی کارتێن خوەدا بەرامبەر پارتی و پشتی ١٩ تەباخێ پارتی دێ ئاخڤتنا خوە ھەبیت و دێ نەخشێ سیاسی و تەوافوقێ گوھۆریت.
ھێمن ھەورامی ئەندامێ سەرکردایەتیا پارتی و بەرپرسێ پەیوەندیێن دەرڤە یێن پارتی د کورەکێ ڤەکری دا ل بارەگایێ لقێ ١٦ یێ پارتی گوت” دەستھەلات ل ھەرێما کوردستانێ ل سەر بنەمایێ سازانێ و تەوافوقا سیاسی یا ھاتیە دارێشتن، لەوما ل دەرڤەی ڤێ سازانێ چو تشتەک جھێ قەبوول کرنێ نینە، چونکی ئەو قەبارا لایەنان دناڤ دەستھەلاتێن ھەرێمێ دا ھەی ب زۆرینە و کەمینە نەھاتیە تەشبیھکرن ھەتاکو قانوونێن گرنگ ب کەمینە و زۆرینە دەرباز بکەن” دووپات کر ژی” پشتی ١٩ تەباخێ پارتی دێ ئاخڤتنا خوە ھەبیت و نەخشێ سیاسی و تەوافوقێ دێ ھێتە گوھارتن”.

ئەڤرۆ نيوز:
نوونەرێ پێکھاتێ ئەرمەنی د کۆمبوونا بەرفرەە یا لایەنێن سیاسی ل کوردستانێ ل دۆر چارەکرنا پرسا سەرۆکاتیا ھەرێمێ بۆ ئەڤرۆ دیارکر کو ھاتنا شاندێ ئەمریکی بۆ وێ کۆمبوونێ نەبوو پێکئینانا لایەنێن سیاسی بوو، بەلکو بۆ بەرچاڤکرنا بۆچوونا ئەمریکی بوو ئەوژی مانا سەرۆکێ ھەرێمێ د پۆستێ خوەدا ھەتا دووماھیا خۆلا پەرلەمانی.
یروانت نیسان ئەندامێ پەرلەمانێ کوردستانێ و نوونەرێ پێکھاتێ ئەرمەنی د ویچ کۆمبوونێ دا بۆ ئەڤرۆ گوت” برێت ماکگورک جێگرێ وەزیرێ دەرڤەیێ ئەمریکی و ھنارتیێ ئۆبامای بۆ ھەڤپەیمانیا شەڕێ دژی داعشێ د وێ کۆمبوونێ دا بۆ لایەنێن سیاسی دیارکر کو بارێ ھەرێمێ نەیێ باشە و یا د شەڕی دا ل گەل داعشێ و بۆمە باشە وەکو ئەمریکا سەرۆکێ ھەرێمێ ھەر د پۆستێ خوەدا بمینیت، چونکی پێشمەرگەی رۆژ بۆ رۆژێ سەرکەفتنێن باش یێن تۆمارکرین و یێ شیای چەندین ھزار کیلۆمەترێن ئەردی ژ دەستێ داعشێ رزگارکەت، لەوما ئەم دخوازین سەرۆکێ ھەرێمێ د پۆستێ خوەدا بمینیت”.
یروانتی گوت ژی ” بەری کۆمبوونا بەرفرەە یا لایەنێن سیاسی من گوتە ھندەک نوونەرێن وان لایەنێن سیاسی کو شاندێ ئەمریکی نەھاتیە لایەنێن سیاسی پێکبینیت، بەلکو یێ ھاتی دا بۆچوونا ئەمریکا بەرچاڤ بکەت، ھەتا ل دەمێ بێھنڤەدانەکێ د کۆمبوونێ دا من گوتە وی بەرپرسێ ئەمریکی تو ھاتی د کۆمبوونێ دا و تە ب رۆھنی بۆچوونا ئەمریکا بۆ ھەموو لایەنان بەرچاڤکر و د بەرسڤێ دا گوتە من ( تو یێ د من گەھشتی کا من یا چ گوتی)”.
یروانتی گوت ژی” ھەتاکو ئاخڤتنا ماکگورکی یا نڤیسای بوو دەمێ دووپاتی ل سەر وێ چەندێ کری کو بۆچوونا ئەمریکی ئەوە سەرۆکێ ھەرێمێ د پۆستێ خوەدا بمینیت ھەتاکو خۆلا پەرلەمانی ب دووماھی بھێت”.