ئەڤرۆ نيوز:
جێگرێ نوونەرێ عیراقێ ل نەتەوێن ئێکگرتی بۆ رۆژناما ئەڤرۆ ئاشکرا دکەت کو ئەمریکا ب شێوەکێ راستەوخوە پشتەڤانیێ ل سەربخوەیا ئابووری ل ھەرێما کوردستانێ ناکەت، بەلکو رێگر ژی نینە ھەمبەر ڤی تشتی، چونکی دێ ھەڤسەنگیەک ل عیراقێ ھێتە دروستکرن.
د.سەلوان شنگالی، جێگرێ نوونەرێ عیراقێ ل نەتەوێن ئێکگرتی بۆ ئەڤرۆ گۆت” پڕچەککرنا پێشمەرگێ کوردستانێ ژلایێ ئەمریکا ڤە نە تشتەکێ نوو بوو، بەلکو پێشتر ژی بەری کێشانا ھێزێن ئەمریکی ل عیراقێ ئەڤ چەندە ھەبوو، لێ دیتنا ئەمریکا بۆ پێشمەرگەی نوکە تشتەکی دی دگەھینیت ھێزا ئێکانەیە کو پشت بەستنێ ب چەندین فاکتەران ل سەر دکەت، وەک بەر راوستیان، دیسا ھێزەک جھێ باوەریێ یە کو ھەموو پرەنسیبان دپاررێزیت، دیسا دەڤەرێن خوە ئازاد دکەت و چو زیانێ ناگەھینیتە دەردورێن خوە، ئەمریکا ژ پڕچەککرنا پێشمەرگەی ناترسیت، چونکی دزانیت ئەوان ھەماھەنگی دێ ل گەل رۆژئاڤا ھەبیت و ستەمێ ل کەسێ ناکەن”.
د.سەلوان شنگالی گوت ژی” پڕچەککرنا پێشمەرگەی ژلایێ ئەمریکا ڤە نامەک بوو بۆ جیھانێ کو ھەر کەسەکێ ل گەل ئەمریکا بیت، دێ ئەو پشتەڤان بیت، ودبینم چو گرێدان ب پڕچەککرنا پێشمەرگەی و سەربخوەیا دەولەتا کوردی نینە، بەلکو پڕچەککرنا پێشمەرگەی و ھوزێن عەرەبێن سونە دبەرژوەندیا وەکھەڤیێ دایە ل عیراقێ، بەر ب عیراقەکا ساخلەم و فیدرال”.
ھەمبەر سەربخوەیا کوردستانێ، گوت” ئەمریکا ب شێوەکێ راستەوخوە پشتەڤانیێ ل سەربخوەیا ئابووری ل ھەرێما کوردستانێ ناکەت، بەلکو رێگر ژی نینە ھەمبەر ڤی تشتی، چونکە دێ ھەڤسەنگیەک ل عیراقێ ھێتە دروستکرن، جارەکا دی خوە بەر نەدەتە ڤە ژلایێ ئابووری ڤە، ب شێوەکێ گشتی دێ پشتەڤانیا ھەڤالێن دروست کەین، سەرەرایی ھندێ دڤێت ھندەک گورانکاری ل
دەڤەرێ پەیدابن”.
ئەوژی گۆت” کوردان گەلەک مفا ژ شەڕێ داعشێ وەرگرت ل سەر ئاستێ جیھانێ، باشترین پێشکەفتنە بۆ کوردستانێ ژ سالا ١٩٩١ وەرە، وەک بەرگێریکرن و دیسان تەوەرێ مرۆڤایەتیێ و حەواندنا ئاواران، دیسان ئێکانە نەتەوەیە بەر سینگێن تیرۆرستان گرتین و بەرگری ژمرۆڤاتیێ وشارستانیەتێ کری کو ھەردەم شانازیێ بڤێ چەندێ دکەین ل ھەموو رێورەسم و ھەلکەفتێن دوەلی”.
خۆیاکر ژی”باوەرناکەم ئەمریکا باوەری ب لەشکەرێ عیراقێ ھەبیت، تایبەت پشتی روودانێن مووسلێ و ئەو شاشیێن دکەڤیتە تێدا ل شەڕێ دژی داعشێ، سەرەرایی دبیت ھندەک گوھۆرین ل دەڤەرێ پەیدابن کو دھزرا ئەمریکا ب خوە ژی نەبوو”.
د. سەلوان شنگالی زێدەتر گوت” باوەرناکەم ئەمریکا پشتەڤانیا دەولەتا کوردی بیت ل نێزیک، لێ دبیت ھەلویستێ ئەمریکا بەرامبەر کوردان ل دووڤ بەرژوەندێن وان بھێتە گوھۆرین و تایبەت پشتی شەرێ داعش ب دووماھی بێت”.
ناڤبری گۆت ژی” نابینم دبەرژوەندا کوردان بیت ب شێوەکێ راستەوخوە پشکداریێ درزگارکرنا مووسلێ دا بکەن، دڤێت کورد بەرێ خوەیێ ناڤخوە بھێز بێخن و چاڤەرێی ھەر پێش ھاتەکا نووبن، دیسان د وێ باوەریێ دا نینم چو ھێز بشێن باژێرێن سونی کونترۆل بکەن ژبلی ئەو ھێزێن ب سەرڤەبن وەک باگراوەندەکێ ئاینی سونی ھەبیت”.
ل دووماھیێ گۆت” دڤێت کورد ب ژیرانە کار بکەن، دا ناڤ و دەنگیا وان پتر بھێتە بەلاڤەکرن ل سەر ئاستێ نێڤدەولەتی و دھشیاربن و ھەر شاشیەکا بچووک ھەبیت دێ ب گرانی ل سەر راوەستیت”.