ئەڤرۆ

ل 14 ئادارا 1903 بارزانیێ نەمر سەركردێ بزاڤا ڕزگاریخوازا كوردستانێ هاتە ژیانێ و پشتی زێدەتر ژ 50 سالێن ژیانا خوە بۆ خەباتێ وڕزگاریا كوردستانێ و ئازادیا گەلێ خوە تەرخانكرین، پشتی وەغەركرنا وی ژی دناڤ گەلێ خوە دا و ل دەف شۆڕەشگێر و ئازادیخوازێن جیهانێ ب نەمری مایە.
ڕۆژا ژ دایكبوونا بارزانیێ نەمر د دیرۆكا كوردستانێ دا ڕۆژەكا تایبەتە و هەموو سالان خەلكێ كوردستانێ ب جوداهیا بیر و بۆچوون و نەتەوە و ئاینان ڤە چەندین ڕێورەسمێن جۆرا و جۆر ئەنجام ددەن.
مەلا مستەفا بارزانی ئەندامەكێ مالباتەكێ بوو كو د دیرۆكێ دا پێگە و جهەكێ ئایینی و نیشتمانی یێ مەزن هەبوو، دەمێ بارزانیێ نەمر ژ دایكبووی چاڤ ب ئازار و ژانێن مللەتێ خوە و ل ژیەكێ زوو ئەو دەمێ سەركردەكێ وەكو شێخ عەبدولسەلامێ بارزانی سەركردایەتیا بزاڤا ڕزگاریخوازا كوردی دكر، مستەفا بارزانی ل گەل هەژمارەكا ئەندامێن مالباتا خوە هاتە زیندانكرن.
دەمێ شێخ ئەحمەدێ بارزانی ژی سەركردایەتی وەرگرتی و ژ پێخەمەتی ئازادیا كوردستانێ درێژی ب خەباتێ دای، ل بن سەركردایەتیا مستەفا بارزانی دەستەیەكا پێشمەرگەی بۆ كوردستانا توركیا هنارتن و ل وێرێ بارزانیێ نەمر ب مەبەستا هەماهەنگیێ چاڤ ب شێخ عەبدولقادرێ نەهرێ و شێخ سەعیدێ پیران كەفت، هەروەسا ل دەمێ شێخ مەحموودێ حەفید ل گۆلانا 1919 ل دەڤەرا سلێمانیێ شۆڕەش دەستپێكری، مستەفا بارزانیێ نەمر سەركردایەتیا وان پێشمەرگەیان دكر كو ب مەرەما هاریكاریا شێخ مەحموودێ بەر ب سلێمانیێ ڤە چووین.
پاشی ل شۆڕەشێن سالێن 1932 بارزانیێ نەمر ڕۆلەكێ فەرماندەیێ یێ دیار هەبوو و پاشی سەركردایەتیا شۆڕەشێن سالێن 1943 و 1945 كر، ل كۆمارا مهابادێ ژی ڕۆلەكێ مەزن هەبوو دەمێ ب مەرەما پشتەڤانیكرنێ ل كۆمارا دیموكرات ل مهابادێ پێشمەرگەیێن شۆڕەشا سالا 1954 ل كوردستانا ئیراقێ برنە كوردستانا ئیرانێ.
بارزانیێ نەمر سەركردێ ئێك ژ كاروانێن مەزن بوو كو ل دیرۆكا خەباتا ئازادیخوازانە دا ب كاروانێ دیرۆكی یێ دەربازبوونا ڕووبارێ ئاراس یێ ناڤدارە، پشتی دەربازبوونێ ژ ڕووبارێ ئاراس و گەهشتن ب ئێكەتیا سۆڤیەتی یا جاران، بارزانیێ نەمر ب هەڤالینیا 500 پێشمەرگەیان بۆ دەمێ زێدەتر ژ 11 سالان ل ئێكەتیا سۆڤیەت ییا جاران مابوو.
بارزانیێ نەمر ل 11 ئیلۆنا 1961 مەزنترین شۆڕەش ل كوردستانا ئیراقێ ل چەرخێ بیستێ ئەنجامدا و شیا ڕژێما بەعس نەچار بكەت دانپێدانێ ب مافێن ڕەوا یێن گەلێ كوردستانێ بكەت و ب وێ چەندێ ژی بزاڤا ڕزگاریخوازا كوردستانێ بەر ب قۆناغەكا نوو بر، د دیرۆكا كوردستانێ و دەڤەرێ و جیهانێ ژی دا بارزانیێ نەمر كاریگەریەكا مەزن د دروستكرنا دیرۆكا سیاسی یا ئیراقێ و دەڤەرێ وبگرە جیهانێ ژی دا هەبوو، لەوما ناڤێ وی ب زیندی و ڕێباز و خەبات و ژیانا وی ب نەمری دێ مینیت

ئەڤرۆ

سەرۆك وەزیرێن ئیراقێ، محەمەد شیاع سودانی ب ڕێكا فرۆكخانەیا هەولێرێ یا نێڤدەولەتی گەهشتە هەرێما كوردستانێ و ژئالیێ مەسرور بارزانی، سەرۆكێ حوكمەتا هەرێما كوردستانێ پێشوازی لێ هاتە كرن.
دوهی سێشەمبی 14/3/2023، محەمەد شیاع سودانی، سەرۆك وەزیرێن ئیراقێ گەهشتە هەرێما كوردستانێ و ژ ئالیێ مەسرور بارزانی، سەرۆكێ حوكمەتا هەرێما كوردستانێ، ل فرۆكخانەیا هەولێرێ یا نێڤدەولەتی پێشوازی لێ هاتە كرن.
مەسرور بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت دا ل سەر تۆرا جڤاكی یا تویتەری ب خێرهاتنا محەمەد شیاع سودانی سەرۆك وەزیرێن ئیراقێ كر د سەرەدانا وی دا بۆ هەرێما كوردستانێ و گوت ژی» ب خێر هاتنا محەمەد شیاع سودانی دكەم د ئێكەمین سەرەدانا وی یا فەرمی دا بۆ كوردستانی» هەروەسا گوت» نیازپاكیا سودانی یا گرنگە بۆ زڤراندنا باوەریێ. پەسەندكرنا پرۆژێ قانوونا بودجەیا فیدرالی و پێشكەفتن د بابەتێ وزێ دا بناغەیە بۆ پەیوەندیەكا نوو و ب هێز» و دیاركر ژی» بلا ل سەر ڤی بنەمای، كار بۆ چارەسەركرنا كێشەیان بكەین».
پشتی كۆمبوونێ ل گەل بەرپرسێن بلند یێن هەرێما كوردستانێ ل هەولێرێ، سەرۆك وەزیرێن ئیراقێ ب مەرەما پشكداریكرنێ د دیدارا زانكۆیا ئەمریكی دا ل سلێمانیێ، دێ سەرەدانا باژێرێ سلێمانیێ كەت.

ئەڤرۆ

مەكتەبا ڕێكخستنا پارێزگەها دهۆكێ یا پارتی دیموكراتی كوردستان ب هەلكەفتا 32 سالیا سەرهلدانا دهۆكێ پەیامەك بەلاڤكر و ئەڤە دەقێ وێ یە:
بەری ”٣٢”سالان و ل هـەیڤا ئادارێ جەماوەرێ دلسوز و فیداكارێ دەڤەرا بەهـدینان مل ب ملێن برایێن خوە پێشمەرگەهـێن قەهـرەمان دەست ب سەرهـەلدانێ كر و ل چەند ڕۆژەكان دا كۆچك و دیوانێن زۆلم و زۆریێ هـەرفاندن و تیڕۆشكێن ئازادیێ هـەلاتن سەرهـەلدانا دەڤەرا بەهـدینان بەرسڤەكا توند بوو بۆ دوژمن و داگیركەرێن كوردستانێ بەرامبەر كریارێن وان یێن هـوڤایەتی ل كوشتنێ و‌ئەنفاڵكرنێ‌ و كێمیابارانكرنێ‌ و دەربەدەركرنێ‌ و وێرانكرنا باژێر و گوندان، سەرهـەڵدانێ ئەڤە خۆیا كر كو ئیرادا مللەتان ب هێزترە ژ ئاگر و ئاسنێن دوژمنان ، مللەتێ داخوازا ئازادیێ ژی بكەت بێگومان دێ گەردەنا ڕۆژا ئازادیێ ماچی كەت.

ئەڤرۆ

دوهی سێشەمبی 14/3/2023 مەسرور بارزانی، سەرۆكێ حوكمەتا هەرێما كوردستانێ و جێسیكا سڤاردسترۆم، بالیۆزا وەلاتێ سوید ل ئیراقێ كۆمبوون.
د دیدارەكێ دا مەسرور بارزانی و بالیۆزا سوید ل ئیراقێ، ڕەوشا گشتی یا ئیراقێ و پێشڤەبرنا پەیوەندیێن هەرێما كوردستانێ و سوید هاتە باسكرن.
تەوەرەكێ كۆمبوونێ، یێ تایبەت بوو ب گرنگیا ئەنجامدانا هەلبژارتنێن پەرلەمانێ كوردستانێ د دەمەكێ گونجای دا ل ئە ڤ سالە. د ڤی بیاڤی دا مەسرور بارزانی بەرهەڤیا حوكمەتا هەرێما كوردستانێ بۆ هەر ئاسانكاریی و هەماهەنگیەكێ بۆ ئەنجامدانا پرۆسەیا هەلبژارتنان دووپات كر.
ئاماژە ب وێ چەندێ ژی هاتە كرن، كو چاكسازیێن كابینەیا نەهێ یا حوكمەتا هەرێمێ و چارەسەركرنا كێشەیێن هەرێما كوردستانێ و حوكمەتا فیدرالی ل سەر بنەمایێ دەستووری و بجهئینانا ڕێككەفتنا شنگالێ و ئاساییكرنا ڕەوشا دەڤەرێ و دەلیڤە خوەشكرن بۆ ڤەگەراندنا ئاوارەیان بۆ جهێن وان، پشكەكا دی یا دانوستاندنێن دیدارێ بوون.

ئەڤرۆ

سكرتێرێ جڤاتا وەزیرێن هەرێما كوردستانێ ڕاگەهاند، جڤاتا وەزیرێن ئیراقێ ڕێكارێن فیدرالی یێن گرێدای ب پارێزگەهبوونا هەلەبجە پەسەندر. پەرلەمانتارەك ژی دبێژیت، پارێزگەهبوونا هەلەبجە دێ بیتە ئەگەرێ تەرخانكرنا بودجەیا تایبەت بۆ وێ پارێزگەهێ.
ئامانج رەحیم، سكرتێرێ جڤاتا وەزیرێن هەرێما كوردستانێ د داخۆیانیەكا ڕۆژنامەڤانیدا گوت» جڤاتا وەزیرێن ئیراقێ د كۆمبوونا ڕۆژا 13/3/2023 بڕیار دا هەلەبجە ببیتە پارێزگەها هەژمار 19 ل ئیراقێ».
ژ ئالیێ خوەڤە وەزارەتا پلاندانانا ئیراقێ ڕاگەهاند كو ڕێكارێن پارێزگەهبوونا هەلەبجە یێن تمام بووین و هاتینە هنارتن بۆ جڤاتا وەزیران.
ل سالا 2013 نێچیرڤان بارزانی، كو وی دەمی سەرۆكێ حوكمەتا هەرێما كوردستانێ بوو، ڕەشنڤیسێ قانوونا ب پارێزگەهبوونا هەلەبجە ڕادەستی حوكمەتا ئیراقێ كربوو، كو نوری مالكی سەرۆكایەتیا وێ دكر.
ل دەستپێكا ئەڤ سالە، محەمەد شیاع سودانی، سەرۆك وەزیرێن ئیراقێ د داخۆیانیەكا ڕۆژنامەڤانیدا ڕاگەهاندبوو» حوكمەت یا ڕژدە ب پشتبەستنێ ب بڕیارا مامەلەكرنێ ل گەل هەلەبجە وەكو پارێزگەهەكا ئیراقێ، چونكە هەلەبجە هەژی گەلەك كارایە بۆ بكەین، ئەركە ل سەر مە پشتەڤانیێ لێ بكەین».

ئەڤرۆ

شیرەتكارێ دارایی و ئابۆری یێ سەرۆك وەزیرێن ئیراقێ ڕاگەهاند، بەهرا هەرێما كوردستانێ ژ پرۆژێ قانوونا بودجەیا گشتی یا ئیراقێ هاتیە گرەنتیكرن و سەرۆك وەزیرێن یێ ڕژدە ل سەر و گوت ژی، قەیرانا وزێ ل جیهانی هەیە، بەلێ ئەوا بۆ ئیراقێ باش هنارتنا وزێ یە.
مەزهەر محەمەد سالح، شیرەتكارێ دارایی و ئابۆری یێ سەرۆك وەیزرێن ئیراقێ گوت» چاوان سەرۆك وەزیرێن ئیراقێ یێ ڕژدە ل سەر ڤەژاندنا ئیراقێ، وەسا یێ ڕژدە ل سەر بەهرا هەرێما كوردستانێ ژ بودجەی، كو هاتیە گرەنتیكرن».
ل ڕۆژا 13/3/2023 جڤاتا وەزیرێن ئیراقێ پڕۆژەیێ قانوونا بودجەیا گشتی یا ئیراقێ بۆ سالێن 2023 و 2024 و 2025 پەسەندكر، كو بەهرا هەرێما كوردستانێ د هەر سالەكێ دا زێدەتر ژ 24 ترلیۆن دینارایە.
مەزهەر محەممد سالح خویاكر» بۆ جارا ئێكێ یە گوهۆڕینەكا ژ وی جۆری د پرسا داراییا ئیراقێ دا بهێتە كرن، كو پلانا دارایی بۆ سێ سالان بیت» هەروەسا ئاماژەكر» سالانە بودجە د قانوونا كارگێری دارایی دا هاتیە جهگیركرن، بەلێ ئەو ڕێگر نینە كو بودجا 2023 ب شێوازەكێ جودا بهێتە دەركرن و هەرسێ بودجەیان دێ پەیوەندی پێكڤە هەبیت» .
شیرەتكارێ سەرۆك وەزیرێن ئیراقێ، هۆكارێ دەركرنا ئێك پڕۆژە قانوونا بودجەی بۆ سێ سالان ڤەگەراند بۆ پەسەند نەكرنا قانوونا بودجەی بۆ دەمێ چەند سالان و گوت» ئارمانج زێدەتر پڕۆژەیێن وەبەرئێنانێ نە، بۆ وێ چەندێ دشیاندا بیت مەزاختی بۆ وان پڕۆژەیان بهێنە دابینكرن».
هەروەسا گوت» سندووقا ئاڤەدانكرنا ئیراقێ گرنگترین خالە د پڕۆژێ قانوونا بودجەیا گشتی دا، ب تایبەتی بۆ پڕۆژەیێن وەبەرئێنانێ كو دەلیڤێ ب حوكمەتێ ددەت مەزاختیێن وان پڕۆژەیان ب ڕێكا وی سندووقێ دابین بكەت» .

ئەڤرۆ

سیاسەتمەدارەکێ کورد ل تورکیا دیار دکەت هەلوەستێ توند یێ ئەردۆغانی ل هەمبەر کوردان ناهێتە گوهۆڕین و هەتا نها هەڤپەیمانیا مللەت ژی چو پرۆژە بۆ چارەسەرکرنا پرسا کوردی پێشکێش نەکرینە، هەکە دەنگێ کوردان نەهێتە پارچەکرن کورد دشێن دەستهەلاتا بهێت یا تورکیا دیار بکەن.

سەدات یوردتاش سیاسەتمەدارێ کورد ل تورکیا راگەهاند نها رەوشا تورکیا گەلەک ئالۆزە، چونکی پشتی چەین سالان نها ئۆپۆزسیۆنەکا بهێز ل دژی ئاکپارتیێ دروست بوویە، رۆژانە ژی ل تورکیا راپرسی دهێنە کرن، ل گۆر ئەنجامێن پڕانیا راپرسیان ژی ڤێجارێ ئەردۆغان نەشێت ببیتە سەرۆک کۆمارێ تورکیا، لێ د سیاسەتێ دا هەر تشت دشێت روی بدەت، نها ئەردۆغان و هەڤالێن وی ب هەموو رەنگەکێ کار بۆ هندێ دکەن دا بشێن جارەکا دی د هەلبژارتنان دا سەرکەڤن و گۆت: (ئەز باوەر ناکەم هەلوەستێ توند یێ ئەردۆغانی و هەڤپەیمانیا جمهور ل هەمبەر کوردان بهێتە گوهۆڕین، لێ د هەمان دەمی دا هەتا نها ئۆپۆزسیۆنا تورکیا ژی چو پرۆژەیەک بۆ چارەسەرکرنا پرسا کوردی پێشکێش نەکریە، رەوشا کوردان ل تورکیا نها گەلەک ئالۆزە، چونکی هەدەپێ ژی هەتا نها چو بەربژار دیار نەکرینە، کوردان جارێ بریارا خۆ یا دویماهیکێ نەداینە، ژ بەر هندێ ژی دەستهەلات و ئۆپۆزسیۆنا تورکیا نها چاڤەرێی هندێ نە دا بزانن کا دێ هەلوەستێ کوردان چ بیت، بێگومان دەنگێ کوردان ل تورکیا کاریگەرە، کورد پشتەڤانیێ ل کیژ هەڤپەیمانیەکێ بکەن دێ ئەو سەرکەڤیت، ژ بەر هندێ ژی ئەز دبێژم هەکە کورد ئێکدەنگ بن، کورد دێ دەستهەلاتا بهێت یا تورکیا دیار کەن، دەنگێ کوردان گەلەک گرنگە، لێ مخابن هەتا نها دیار نینە کا دێ کورد چ کەن، چونکی د ناڤ کوردان دا پارچەبوونەک هەیە و هەتا نها دیار نینە دێ کورد دەنگێ خۆ دەنە کیژ بەربژاری، پارچەبوونا دەنگێ کوردان بێگومان یا باش نابیت).
ناڤهاتی راگەهاند نها پڕانیا کوردان ل تورکیا و باکورێ کوردستانێ ژ ئاکپارتیێ توورە نە، چونکی ئەردۆغانی د دەمێ بیست سالێن بۆری دا گەلەک سۆز دانە کوردان، لێ سۆزێن خۆ بجه نەئینان، ب تایبەتی ژی قۆناغا ئاشتیێ، چونکی کوردان باوەریەکا مەزن ب ئەردۆغانی هەبوو، د چەندین هەلبژارتنێن بۆری دا کوردان دەنگێن خۆ دانە ئاکپارتیێ، لێ ئاکپارتیێ چ نەکر و گۆت: (ئەز پێشبینی دکەم ڤێجارێ رێژەکا مەزن ژ کوردان ل تورکیا دەنگێن خۆ بدەنە هەڤپەیمانیا مللەت، د هەلبژارتنێن هەری دویماهیێ یێ باژێرڤانیان ل تورکیا دا ژی، ژ بەر دەنگێ کوردان ل چەندین باژێرێن مەزن یێن تورکیا ئاکپارتی تووشی شکەستنەکا مەزن هات، نها کلچدار ئوغلۆ و هەڤالێن وی دخوازن هەمان تشتی ل هەلبژارتنێن بهێت ژی دوبارە بکەن، وان دەنگێ کوردان دڤێت، ژ بەر هندێ ژی ئەز دبێژم دەنگێ کوردان دێ بیتە ئەگەرێ گوهۆڕینا دەستهەلاتێ و دێ کورد دەستهەلاتا بهێت یا تورکیا دیار کەن).

ئەڤرۆ

سەرۆكێ حوكمەتا هەرێما كوردستانێ، مەسرور بارزانی پشكداری د ئێكەمین دیدارا لاوان ل دهۆكێ كر و تێدا باسێ ژیانا چەند ئالیێن لاوێن كوردستانێ كر و ڕاگەهاند: ئەوێ شارەزایی د دیرۆكا خوە دا نەبیت نەشێت پاشەڕۆژەكا باشتر بۆ خوە ئاڤا بكەت.
سەرۆكێ حوكمەتا هەرێما كوردستانێ، ئاماژە ب وێ چەندێ ژی كر، ل سەردەمێ چیای پێشمەرگەی هیڤی دخواستن ب ئازادی ل كوردستانێ بژین هەكە ل بن تراشەكێ ژی دا بیت، نوكە كوردستان یا ئازادە و ژ هەموو ئیراقێ یا ئاڤەدانترە.
دەقێ پەیڤێن سەرۆكێ حوكمەتا هەرێما كوردستانێ:
ڕۆژێن سەرهلدانێ و ئازادكرنا باژێر و باژێركێن كوردستانێ ل هەموو خەلكێ كوردستانێ پیرۆز دكەم، هەلكەفتەكا مەزن و پیرۆزە بۆ ڕزگاركرنا گەلێ مە ژبن دەستێ زۆرداریێ و وەرچەرخانەیەكا دیرۆكی بوو د ژیانا هەموو خەلكێ كوردستانێ دا. ئەوێن بەری سەرهلدانێ ژیاین، ل ئیراقێ و ئەوێن ئاوارەی دەرڤەژی بووین، ژیانا ئاوارەیێ و بندەستیێ دیتیە. بیرا من دهێت، گەلەك جاران كو ل گەل هەڤالێن خوە و پێشمەرگەیان د ڕوونشتین، د گوت، خوزی زڤریباین كوردستانێ و ب ئازادی ژیاباین، بلا ل بن تراشەكێ دا ژیاباین، هزار جاران سوپاس بۆ خودێ زڤرینە كوردستانێ، كوردستان نوكە یا ئازادە، نەكو د بن تراشان دا نینین، بەلكو كوردستان ژ هەموو ئیراقێ یا ئاڤەدانترە.
چەندین نفش پشتی سەرهلدانێ یێن ژ دایكبووین و مەزن بووین و چووینە زانكۆ و پەیمانگە و خواندنا خوە ژی ب دووماهی ئینایە. بەلێ ئەوا نوكە دیار، پشكەكا زۆر ژ وان گەنجان ئەو ئێش و ئازارە نە دیتینە، دبیت قەدر و قیمەتا ڤێ ئازادیا نوكە نەزانن، ئینشائەللا چو جاران وێ ژیانێ نەبینن، ئەوا مە دیتی. هەموو دەمەكی ب سەربلندی بژین و ئەوا ل سەر مە هەردوویان پێدڤی پێكڤە كاربكەین بۆ دەستەبەركرنا ژیانەكا باشتر بۆ وان.
ئەوێ شارەزایی د دیرۆكا خوە دا نەبیت، نەشێت پاشەڕۆژەكا باشتر بۆ خوە ئاڤا بكەت. پێدڤیە ل سەر مە هەموویان دیرۆكێ بینینە بیرا خوە و بزانین ژ كیڤە مە دەستپێكر و گەهشتینە كیڤە. گەلەك جاران كێشە و گرفت هەبوون، پێدڤیە بزانین ژێدەرێن وان كێشەیان چ بوون، بۆ ڕێگری ل مە هاتیە كرن و داخوازیێن مە وەكو پێدڤی نەهاتینە بجهئینان. ئەڤە كارێ مە ب تنێ نینە، كارێ هەڤپشكە، پێدڤیە هەر كەسەك د مالا خوە دا، ئەو بابێ پێشمەرگایەتی، نەخوەشی و بندەستی دیتی، بینیتە بیرا كچ و كۆرێن خوە كا چ ژیان دیتیە و نوكە د چ ژیانەكێ دانە و بۆ پاراستنا ڤێ ژیانێ پێدڤیە پێكڤە كار بكەین و پێدڤیە ڤێ ئەزموونێ بهێتە پاراستن. ل سەر حوكمەتا هەرێمێ ژی پێدڤیە دەلیڤەیان بۆ گەنجان پەیدا بكەت بۆ وێ چەندێ پاشەڕۆژەكا باشتر بۆ خوە ئاڤا بكەن.

ئەڤرۆ

ئەندامەكێ مەكتەبا سیاسی یا پارتی دیموكراتی كوردستان ڕاگەهاند، د هەیڤا ئادارێ دا دێ ڕۆژا ئەنجامدانا هەلبژارتنان هێتە دیاركرن و پتریا ئالیێن سیاسی ل گەل ئەنجامدانا هەلبژارتنانە.
پشتیوان سادق، ئەندامێ مەكتەبا سیاسی یا پارتی دیموكراتی كوردستان د داخۆیانیەكا ڕۆژنامەڤانیدا گوت» وەكو پارتی د ڕژدین ل سەر وێ چەندێ كو هەلبژارتنێن پەرلەمانێ كوردستانێ بهێنە ئەنجامدان، ژ بەر كو ژ ڕوویێ قانوونی و پرۆسەیا دیموكراسی ڤە هیچ چارەسەریەك نەمایە، ژ بلی ئەنجامدانا هەلبژارتنان».
پشتیوان سادق گوت ژی» ڕۆژا ئەنجامدانا هەلبژارتنان ل دەمەكێ نێزیك و ل هەیڤا ئادارێ، ژ ئالیێ نێچیرڤان بارزانی، سەرۆكێ هەرێما كوردستانێ دێ هێتە دەستنیشانكرن» هەروەسا دیاركر ژی» پتریا ئالیێن سیاسی ل هەرێما كوردستانێ ل گەل ئەنجامدانا هەلبژارتنانە».
وی ئەندامێ مەكتەبا سیاسی یا پارتی ئاماژە ب وێ چەندێ ژی دا» پارتی هەموو بزاڤان دكەت بۆ وی ئێكێ هەلبژارتن د ئەڤ سالەدا بهێنە ئەنجامدان و حوكمەتا هەرێما كوردستانێ هەموو ئاسانكاریەكێ بۆ بڕێڤەچوونا هەلبژارتنان دكەت و سەرۆكێ هەرێما كوردستانێ ژی دێ ڕۆژا ئەنجامدانا هەلبژارتنان دەستنیشان كەت».
پشتیوانی زێدەتر گوت» هیڤیدارین د دەمێ چەند ڕۆژێن داهاتی دا پەرلەمانێ كوردستانێ ڤەخواندنێ بۆ پرۆژە قانوونا ڕاستڤەكرنا هەلبژارتنان بكەت».

ئەڤرۆ

پەیڤدارێ حوكمەتا هەرێما كوردستانێ، ڕاگەهاند شاندێ هەرێما كوردستانێ بۆ دانوستاندنێ ل سەر پرۆژەیێ قانوونا پەترۆل و غازێ یا فیدرالی، ل ڕۆژا ئێكشەمبی دەست ب سەرەدانا خوە بۆ بەغدا كریە و ئەڤرۆ دوشەمبی 13/3/2023 دێ دەست ب كۆمبوونان ل سەر ڕەشنڤیسێ قانوونا ناڤبری كەن كو ئێك ژ بابەتێن گرنگە د ناڤبەرا بەغدا و هەولێرێ دا و پێدڤیە د دەمەكێ دیاركری دا تمام ببیت.
جوتیار عادل، پەیڤدارێ حوكمەتا هەرێما كوردستانێ گوت « ئەڤ پرۆژە قانوونە دێ كۆمەكا گرفتێن د پەیوەندیێن بەغدا و هەولێرێ دا هەین د بوارێ وزێ دا چارەسەركەت. بۆ وێ چەندێ هەرێما كوردستانێ وەكو هەڤپشكەكا ڕاستەقینە د دروستكرنا وان بڕیارێن گرێدای پیشەسازیا پەترۆلێ ل ئیراقێ، ب شێوەیەكێ كارا پشكدار بیت، هەروەسا بۆ ڕێكخستنا وی كەرتی چ ل سەر ئاستێ ئیراقێ و هەرێما كوردستانێ و پەیوەندیێن هەردو ئالیان گرنگیا خوە هەیە. بێگومان ل دووماهیێ پێدڤیە ئەڤ پڕۆژە ڕەنگڤەدانا ڕێككەفتنا هەردو ئالیان بیت و د مفایێ وان دا بیت. ئەو نەكو بۆ هەرێما كوردستانێ، بەلكو بۆ هەموو خەلكێ ئیراقێ ژی دەستكەفتەكا گرنگە».
سەبارەت چاوانیا بجهئینانا وێ پڕۆژە قانوونێ، جوتیار عادل گوت» ڕێككەفتن یا هاتیە كرن كو هەردو ئالی پێكڤە ڕەشنڤیسی بنڤیسن، تا ڕادەیەكی ل سەر پرەنسیپێن گشتی ڕێككەفتن هاتیە كرن، بەلێ هووردەكاری زۆرن، هەر د ڤی چارچۆڤەی دا دانوستاندن دێ د بەردەوام بن. ئەم چاڤەڕێ دكەین د دەمەكێ نێزیك دا، ئەنجام بۆ هەیت، هیڤیدارین باوەری بوون ب هەڤپشكیێ و پشت بەستن ب دەستووری و ئەو ڕێككەفتنا د كارنامەیا كابینەیا محەمەد شیاع سودانی دا هەی، د وێ پڕۆژە قانوونێ دا ڕەنگڤەدەت».
ل دۆر پڕۆژەیێ قانوونا بودجەیا گشتی یا ئیراقێ بۆ سالا 2023، پەیڤدارێ حوكمەتا هەرێمێ دبێژیت» پشتی دانوستاندنەكا دوور و درێژ ل گەل حوكمەتا فیدرالی، ئەوا گرێدای شایستە و مافێن هەرێما كوردستانێ دانوستاندن ل سەر هاتە كرن، ئەو پڕۆژەیە قانوونە ژی دێ كۆمەكا كێشەیان د ناڤبەرا هەردو ئالیان دا چارەسەركەت، حوكمەتا فیدرالی دەمەكە بودجە نەبوو، وێ چەندێ ژی كاریگەری ل سەر ئاستێ پەیوەندیان ل گەل هەرێما كوردستانێ هەیە كو پێدڤیە بۆ دەستنیشانكرنا بەهرا هەرێما كوردستانێ پشت بەستن ب سەرژمێریێ بهێتە كرن. هندەك ئەنجام دەستكەفتێن باش بوون بۆ هەرێما كوردستانێ، وەكو هەژمارەكرنا مووچێ پێشمەرگەی و پشتەڤانیا هێزا پێشمەرگەی د چارچۆڤەیێ خەرجیێن سیادی دا و دیاركرنا بەهرا هەرێما كوردستانێ ژ خەرجیێن (حاكمە). بابەتێ هنارتنا 400 ملیار دیناران ژی گرفتەكا مەزن ل بەردەم نەمایە و ل ڤان نێزیكان ئەو پارە بۆ هەرێما كوردستانێ دێ هێتە هنارتن».