ئه‌ڤرۆ نیوز:
نێچیرڤان بارزانی، سه‌رۆكێ حكومه‌تا هه‌رێما كوردستانێ سه‌را نه‌وشیروان مسته‌فا رێكخه‌رێ گشتى یێ بزاڤا گۆران ل سلێمانیێ دا.
پشتى كو نێچیرڤان بارزانی، ل باژێرێ سلێمانیێ پشكدارى د فیسته‌ڤالا ئێكێ یا فلمێ ئوروپى دا كرى، پاشان سه‌را نه‌وشیروان مسته‌فا دا و د كومبوونه‌كێ دا په‌یوه‌ندیێن لایه‌نێن سیاسى و بابه‌تێ شه‌رێ داعش و قه‌یرانا دارایى و په‌یوه‌ندیێن د ناڤبه‌را هه‌رێم و به‌غدا به‌حس كرن.
ئه‌ڤرۆ نیوز، ڤه‌ده‌ر ره‌شاڤایى
ژبۆ نیشاندانا پشته‌ڤانییا خوه بۆ مهابادێ و رۆژهه‌لاتا كوردستانێ ژماره‌كا خه‌لكێ دهوكێ ژ ره‌وشه‌نبیر و چه‌ند به‌رپرسێن حكومی خرڤه‌بوونه‌ك ل به‌رده‌رێ پاركا ئازادی پێكئینا.
درۆشمێ (فه‌ریناز ب ئارامی بنڤه ئه‌م ناهێلین خوینا ته بهه‌روه بچیت) هاته بلند كرن دگه‌ل چه‌ندین درۆشمێن دی بۆ ئیدانه‌كرنا كریارێن حكومه‌تا ئیرانێ و داخاز هاته‌كرن رژێما ئیرانێ بزووترین ده‌م كارڤه‌دانه‌كا جدی هه‌بیت لدژی تاوانبارێن بووینه ئه‌گه‌رێ كو كچا كورد فه‌رینازێ ل رۆژهه‌لاتا كوردستانێ خوه تووشى وى روودانێ بكه‌ت.
تێ زانین كچه‌كا كورد ل مهابادێ كو كارمه‌ند بوو خوه ل قاتێ چارێ یێ ئوتێله‌كێ دا هاڤێتبوو پشتی ب هاریكاریا خودانێ هوتێلێ كاربده‌سته‌كێ ئیرانی ڤیای ده‌ستدرێژیێ بكه‌ته سه‌ر و ڤێ یه‌كێ ژی خوه‌نیشاندانێن مه‌زن ل مهابادی لدووڤ خوه ئینان و ئوتێل ژ ئالیێ خوه‌نیشانده‌ران ڤه هاته سوتن .
ئه‌ڤرۆ نیوز:
لژنا به‌ره‌ڤانیكرنێ ژ مافێن ئافره‌تان ل په‌رله‌مانێ كوردستانێ، ئه‌ڤرۆ پشكدارى د كونفرانسێ كوپیتكا ئسته‌نبولێ دا كر.
ئێڤار ئیبراهیم سه‌رۆكێ لژنێ بۆ ئه‌ڤرۆ نیوز دیاركر كو ئارمانجا وان د ڤێ پشكداریكرنێ گه‌هاندنا ئازار و په‌یاما ئافره‌تێن ئێزدیه ب ئه‌ندامێن كونفرانسێ كو تێدا نوونه‌رێن 42 وه‌لاتان پشكدارن كو پێكهاتینه ژ په‌رله‌مانتاران و چالاكڤان و رێكخراوێن جڤاكى مه‌ده‌نى.
بریاره سوبه ئێڤار ئیبراهیم گوتارا خوه ژ پێش هه‌رێما كوردستانێ ڤه پێشكێش بكه‌ت.
ئەندامێن لیژنا به‌ره‌ڤانیكرنێ ژ مافێن ئافرەتان ل پەرلەمانێ کوردستانێ پێکهاتینه ژ (ئێڤار ئیبراهیم، کەژاڵ هادی، حەیات مەجید، مریەم سەمەد، ڤیان عەباس).
ئه‌ڤرۆ نیوز:
رێڤه‌به‌رێ گشتى یێ هاتن و چوونا به‌غدا ئاشكرا كر كو ب هه‌لكه‌فتا سه‌ره‌دانكرنا بیره‌وه‌ریا ئیمام كازم كو دبیته 5 شه‌مبیا بهێـت، وان بریاردا ترۆمبێلێن هه‌لگرێن ژمارێن كاتى و هه‌رێما كوردستانێ نه‌چنه ناڤ باژێرێ به‌غدا هه‌تا 5 شه‌مبیا بهێت، د هه‌مان ده‌مدا بریار هاتیه دان ب لابرنا هه‌موو به‌ربه‌ستان و ڤه‌كرنا رێكێن بله‌ز د وى ماوه‌ى دا.
لژنا دەمکی یا بەرھەڤکرنا پەیروێ نافخوە یێ پەرلەمانێ کوردستنانێ، پشتی حەفت ھەیڤێن کارکرنێ دووماھی ب کارێ خوە ئینا و ژڤانە نێزیکترین دەم رادەستی سەرۆکاتیا پەرلەمانێ کوردستانێ بھێتەکرن، ب مەرەما گەنگەشەکرنێ و پەسەندکرنێ.
د.فەرست سوفی سەرۆکێ لژنا دەمی یا بەرھەفکرنا پەیروێ نافخوە ل پەرلەمانێ کوردستانێ گۆت: پەیروێ نوو نێزیکی (٦٠) مادان لێ ھاتینەزێدەکرن و (١٥٠)مادەیە و گرنکترین مادە و برگ ئەوەن ل سەر شێوازەکێ نوو پێشکەفتی ھاتینە بەرھەفکرن، دیسان روونشتنێن پەرلەمانی ھاتینە دیارکرن و کارناما پەرلەمانی چەوا دێ کار کەت و دەمێ ئاخفتێن ئەندام پەرلەمانان ھاتیە دیارکرن.
د.فەرسەت ئاشکراکر کو دناڤا رەشنڤیسێ پەیروێ نافخوەیێ پەرلەمانێ کوردستانێ دا ھاتیە کو دەستەکا گشتی دھێتە پێکئینان ژ سەرۆکێن فراکسیونان، سەرۆکاتیا پەرلەمانێ کوردستانێ و دیسان ھەیکەل و ناڤێ پەرلەمانی ھاتینە ریخستن.
د.فەرست ئاشکراکرژی کو ماوێ دو حەفتیێن بھێت دا دێ ئاراستەیی پەرلەمانێ کوردستانێ ھێـتەکرن بۆ گەنگشەکرنێ.
ئه‌ڤرۆ نيوز:
دادگه‌ها تاوانێن مسرێ سزايێ سێ سال زيندانى بۆ حوسنى مباره‌ك و كوڕێن وى ب تۆمه‌تا گه‌نده‌ليێ ل كوچكا سه‌رۆكاتيێ ده‌ركر.
دادگه‌ها تاوانان ل قاهيره سزايێ زيندانيكرن ب سێ سالان بۆ سه‌رۆكێ به‌رێ يێ مسرێ حوسنى مباره‌ك و كوڕێن وى عه‌لاو جه مال
ده‌ركر و ب كۆژمێ 21 مليۆن و 107 هزار جونه‌يان سزا دان ژ ئه‌گه‌رێ مه‌زاختنا وى كۆژمێ پاره‌يى ژ پارێ كوچكا كۆماريێ ب به‌لگه‌يێن سه‌خته.
ئه‌ڤرۆ نيوز:
ئه‌ڤرۆ رۆژا شه‌مبى رێكه‌فتى 9ى گۆلانا 2015ێ، ئه‌و تۆمه‌تبارێ بزاڤا ده‌ستدرێژيێ كريه سه‌ر كچا كوردا مهابادى و بوويه ئه‌گه‌رێ مرنا وێ دانپێدان ب تاوانا خوه كر.
ئاژانسا ده‌نگوباسێن نه‌سيم ژ زارێ سه‌عيد مونته‌زر مه‌هدى جێگرێ پۆليسێن ئيرانێ به‌لاڤ كر كو ئه‌و كه‌سێ تۆمه‌تبار ب كوشتنا كچا كورد دانپێدان ب تاوانا خوه كريه و دبێژيت: “ئه‌وێ كچێ ڤيا ژ ترسا روودانێ د په‌نجه‌را ژووره‌كا ئۆتێلێ دا بچيته ژووره‌كا دى، به‌لێ كۆنترۆل نه‌ما و كه‌فته خوار و مر”.
جێگرێ پۆليسێن ئيرانێ ئاماژه ب وێ چه‌ندێ كر كو د ڤێ روودانێ دا چو تۆمه‌تبارێن سه‌ر ب هێزێن ئه‌منى ڤه نينه و تاوانبار كه‌سه‌كێ دى يه و ل دادگه‌هێ دانپێدان كريه.
سپێدەھیا ئەڤرۆ ل دەڤەرا کەسکێ یا سەر ب ناحیا زومار، ھێزێن پێشمەرگەی شیان ھێرشەکا چەکدارێن داعش بشکێنن و زیانێن مەزنن بگەھیننه تیرۆرستان.
غەیاس سورچی، پەیڤدارێ ئێکەتی نیشتیمانی کوردستان ل نەینەوا بۆ ئەڤرۆ نیۆز گۆت: “دەمژمێر ٤ی سپێدەھیا ئەڤرۆ تیرۆرستێن داعش ل گوندێ وائیلیە یێ دەڤەرا کەسکێ، ھێرشەکا بەرفرەهـ کرە سەر ھێزێن پێشمەرگەیێن کوردستانێ و پشتی پێکدادانەکا دژوار پێشمەرگە شیا ھێرشا داعش بشکێنيت و گورزەکا کوژەک لێبدەت”.
سورچی گۆتژی: “د ھێرشا ئەڤرۆیا کەسکێ دا پێشمەرگەيی تنێ بریندارەک ھەیە و د ھەمبەردا شیاینە ١٨ تیرۆرستێن داعش بکوژن و ھژمارەکا پتر ژی بریندار بکەن، ئەڤە ژبلی سووتنا چوار ترۆمبێلێن له‌شكرى یێن داعش”.
ئه‌ڤرۆ نيوز:
حه‌يده‌ر شه‌شۆ، سه‌ركردێ ئێزديان د ناڤا حه‌شه‌د شه‌عبى دا و ئه‌ندامێ جڤاتا نشتيمانيا ئێكه‌تى نشتيمانى كوردستان، ل باژێر و باژێركێن وه‌لاتێ ئه‌لمانيا ل گه‌ل ره‌ڤه‌ندا كوردێن ئێزدى كۆمبوونان دكه‌ت و به‌حس ل دامه‌زراندنا حزبه‌كێ دكه‌ت و ديسا هێزه‌كا نوو بۆ پاراستنا شنگال.
ب گۆره‌يى مالپه‌رێ ئارا نيوز حه‌يده‌ر شه‌شۆ راگه‌هاند: ئه‌وى ل به‌ره كيانه‌كێ سياسى و هێزه‌كێ بۆ به‌ره‌ڤانيێ ژ شنگال ب دامه‌زرينيت ب ناڤێ هێزا پاراستنا شنگال و ل ده‌ڤه‌رێ دێ يا خودان ده‌سته‌لات بيت.
حه‌يده‌ر شه‌شۆ ئاماژێ ب وێ چه‌ندێ ژى دكه‌ت كو ئه‌و دێ وێ هێزێ دامه‌زرينيت و ده‌ڤه‌را حه‌زان و باشيكێ ژى بۆ سه‌ر شنگال ڤه‌گوهێزێت و ئيداره‌كا سه‌ربه‌خۆ كو حوكمه‌ت و پارێزگه‌ها خوه هه‌بيت.
ئه‌ڤرۆ نيوز، نيوار محه‌مه‌د سه‌ليم:
رێكخستنا لێخوەشبوونا نێڤده‌وله‌تى (ئه‌منستی ئنترناشيۆنال) گازى ئیرانێ دکەت کو ھەمبەر خوەپێشاندەرێن کورد ھێزێکە گه‌له‌ك زێدە و نەپێدڤی ب کار نەئينن، هێمن سه‌يدى يێ نڤيسه‌ر و ڤه‌كۆله‌ر ژى دده‌ت زانين كو خونيشادانێن مهاباد يێن به‌رفرهـ بووين و گه‌له‌ك بريندار يێن هه‌ين و ژماره‌كا ئێكجار زێده يا هاتيه زيندانكرن ژى.
ب ھەزاران کەس ژ بوو شەرمزارکرنا دەستدرێژییا سكسيا ھەمبەر ژنا کورد “فه‌ريناز” رژیابوونه کۆلانان و ھێزێن ئه‌منى ژى ب توندی هێریش كره سه‌ر وان.
ئه‌منستی ئنترناشيۆنال د بەلاڤۆکا خوه دا راگه‌ھاند کو کاربدەستێن ئیرانی برینداربوونا، ھەری کێم، ٢٥ کەسان د بوویەرێن دوھی دا پشتراستکر کو د ناڤ وان دا حه‌فت پۆلیس ژی ھەنە.
لێخوەشبوونا نێڤده‌وله‌تى دیار دکەت کو د ناڤ گەل دا خەم و ترس ھەیە کو ھێزێن ئەمنى جارەکا دى ئه‌شكه‌نجه‌دان و تەپەسەرکرنا خوەپێشادەران بکەن، پشتی کو گازيا خوەنیشاندانێن نوو ھاتينه کرن.
جیگرێ رێكخستنا لێخوەشبوونا نێڤده‌وله‌تى ل رۆژھلاتا ناڤین ساد بۆمەدۆ گۆت: “پشتی توندوتيژیا دوھی، رەوشەکا گرژ و ئالۆز ل ماھاباد و باژێرێن دى یێن کوردان ھەیە”.
بۆمەدۆ گۆتژى: “مافێ ھێزێن ئه‌منيا جڤاکێ مسۆگەر بکه‌ن، لێ دڤێت ئەو ئێك ل گۆر پیڤانێن قانوونێن ناڤنەتەوی بن و ھێزەکا گه‌له‌ك دوار ل ھەمبەر خوەپێشانەران نەهێته بكارئينان”.
هێمن سه‌يدى يێ نڤيسه‌ر و ڤه‌كۆله‌ر ژى دده‌ت زانين كو ئه‌ڤ خونيشادانێن ل مهاباد و باژێرێن دى دهێنه كرن نه ژ بوو وێ چه‌ندێ يه كو ئۆتێلێ ب سوژن يان كاره‌كێ ژ وى ره‌نگى بكه‌ن، به‌لێ ژ بوو ئيدانه‌كرنا وێ كريارا ده‌ستدرێژيا سكسى يه يا ل هه‌مبه‌ر وێ كچا كورد هاتيه كرن و پێدڤيه ئه‌و كاربه‌ده‌ستێ ئيرانى يێ ئه‌ڤ كرياره كرى بگه‌هيته مافێ خوه.
بۆ پشكا كوردى ل راديۆيا ده‌نگێ ئه‌مريكا ئاماژێ ب وێ چه‌ندێ ژى دكه‌ت كو خونيشادانێن مهاباد يێن به‌رفرهـ بووين و گه‌له‌ك بريندار يێن هه‌ين و ژماره‌كا ئێكجار زێده يا هاتيه زيندانكرن ژى.
پێنج به‌رى نوكه ل ئێك ژ ئۆتێلێن باژێرێ مهاباد ل رۆژهه‌لاتێ كوردستانێ پشتى كو كه‌سه‌كێ پله‌دار ژ هێزێن ئه‌منى يێ سه‌ر ب هێزێن ته‌ناهيێ يێن كۆمارا ئيسلامى ل ئێك ژ ئۆتێلێن وى باژێرى ب ناڤێ “ئۆتێل تارا” بزاڤا ده‌ستدرێژى كريه سه‌ر كچه‌كا گه‌نج يا كورد ب ناڤێ “فه‌ريناز خوسره‌وانى”، كو ئه‌و كچ كارمه‌ند بووه ل وێ ئۆتێلێ و وێ ژى خوه ژ قاتێ چارێ يێ وێ ئۆتێلێ به‌ردايه خوار و گيانێ خوه ژ ده‌ست دايه.
وه‌كو نه‌رازيبوون به‌رامبه‌ر وێ ره‌فتارێ، ئه‌و كارمه‌ندێ سه‌ر ب هێزێن ته‌ناهيێ يێن ئيرانێ، ل رۆژا پێنجشه‌مبى رێكه‌فتى 7ى گۆلانا 2015ێ ب هزاران وه‌لاتيێن باژێرێ مهابادێ خوه‌نيشادانه‌كا به‌رفره‌هـ سازكر و ل ده‌مێ گه‌هشتنا هێزێن پۆليسێن باژێرى بۆ جهێ روودانێ كو به‌رامبه‌ر وێ ئۆتێلێ بوو يا روودان تێدا روودايى، شه‌ر و پێكدادان د ناڤبه‌را خوه‌نيشانده‌ران و هێزێن پۆليسان روودا.
كوڕێ پێشه‌وا قازى محه‌مه‌د، سه‌رۆكێ كۆمارا ئێكێ يا كوردستانێ ل مهابادێ كو د هه‌مان ده‌م سه‌رۆكێ پارتيا ئازاديا كوردستانێ يه به‌ياننامه‌ك ل دۆر روودانێن نوكه يێن مهاباد به‌لاڤكر و تێدا داخواز ژ وه‌لاتيێن رۆژهه‌لاتێ كوردستانێ كر كو دژى زۆرى و سته‌مێ ب راوه‌ستن و سه‌رهلدانان بكه‌ن.
دوهى ژى ل گه‌ل باژێر و باژێركێن وى رۆژهه‌لاتێ كوردستانێ بۆ ڤێ مه‌ره‌مێ خوه‌نيشادان هاتنه كرن و ژنێن ئامه‌دێ ژى ئه‌ڤ كاره د خوه‌نيشادانه‌كێ دا شه‌رمزار كر و ئه‌ڤرۆ ژى بڕياره ل دهۆكێ وه‌كو پشته‌ڤانى بۆ خوه‌نيشانده‌ران، خرڤه‌بوونه‌ك بهێته ئه‌نجام دان.
نيشاندان