ئەڤرۆ:
بەرپرسێ لقێ ٩ یێ پارتی ل ئاکرێ و بەرپرسێ میحوەرێ ناوەران بۆ روژناما ئەڤرۆ دیار کر کو پێشمەرگە ل میحوەرێ ناوەران د پێشڤەچوونەکا باش دایە و د وڕەیەکێ بلند دایە ژ بۆ رزگارکرنا دەڤەرێن دبن کونترۆلا تیرۆرستێن داعش ڤە و پێشمەرگەی شیانێن ھەین ب شێوەکێ باش و رێکوپێک و یێ بەرھەڤە بۆ ھەر جھەکێ پێدڤی بۆ ھێرشکرنێ و گۆت:( داعش شیانێن ھێرش و بەرگریکرنێ نەماینە).
د هژمارا 1500 يا سوبه‌هى 28\9 دا لاپه‌رێ دو ده‌قێ ديدارێ بخوينن.
ئه‌ڤرۆ نيوز:
كۆمبوونا جڤاتا نوونه‌رێن عيراقێ كو يا تايبه‌ت بوو ب هنارتنا مۆچێ هه‌رێما كوردستانێ هاته پاشخستن بۆ ده‌مه‌كێ نه‌ديار.
بڕيار بوو ئه‌ڤرۆ 27\9 كۆمبوونه‌كا نه‌ئاسايى يا جڤاتا وه‌زيرێن حوكمه‌تا عيراقا فيدرال يا نه‌ئاسايى ل دۆر هنارتنا مۆچێ هه‌رێما كوردستانێ بهێته سازكرن، به‌لێ ژ به‌ر چه‌ند ئه‌گه‌رێن نه‌ديار بۆ ده‌مه‌كێ دى هاته پاشخستن كو دهێته پێشبينيكرن ژ ئه‌گه‌رێ ئاماده‌نه‌بوونا هه‌ر ئێك ژ حه‌يده‌ر عه‌بادى و د. رۆژ نورى شاويش بيت ژ به‌ر كو ل دۆر ئه‌و پێزانينێن ب ده‌ست ئه‌ڤرۆ نيوز كه‌فتين حه‌يده‌ر عه‌بادى هێشتا ژ ئه‌مريكا نه‌ڤه‌گه‌ريايه و د. رۆژ نوكه يێ ل به‌روكێن شه‌رى ل ده‌ڤه‌را خازرى.
ئه‌ندامێ جڤاتا نوونه‌رێن عيراقێ ل سه‌ر ليستا ئێكه‌تى نشتيمانى كوردستان د. به‌ختيار جه‌بار بۆ راديۆ ناوخۆ دا زانين كو ئه‌ڤ كێشه يا گرێداى راگرتنا مۆچێ هه‌رێما كوردستانێ به‌رى جه‌ژنێ دێ ئێكلا بيت.
بڕيار بوو ئه‌ڤرۆ كۆمبوونا نه‌ئاسايى يا جڤاتا وه‌زيرێن عيراقێ يا تايبه‌ت ب بڕينا مۆچێ هه‌رێما كوردستانێ ب ئاماده‌بوونا د. رۆژ نورى شاويش بهێته گێران.
هه‌رێما كوردستانێ ژى راگه‌هاند بوو كو هه‌ر ده‌مێ د وێ كۆمبوونێ دا ره‌زامه‌ندى ل سه‌ر هنارتنا بۆدجێ هه‌رێما كوردستانێ هاته كرن به‌رى جه‌ژنێ دێ مۆچێن هه‌يڤا هه‌شت يێن فه‌رمانبه‌ران هێنه هنارتن.
چالاكڤانێن مه‌ده‌نى و رۆژنامه‌ڤان خوه ئاماده‌ى خرڤه‌بوونه‌كێ دكه‌ن كو تێدا داخوازا ده‌ست ژ كاركێشانا سه‌رۆكێ وه‌زێرێن عيراقێ كه‌ن ژ به‌ر هه‌لويستێ وى هه‌مبه‌ر راوه‌ستاندنا تۆپبارنكرنا وان باژێرێن داعش تێدا د بنه‌جهـ.
هه‌ر چه‌نده كو عه‌بادى ئه‌ڤ بڕياره يا دايى به‌لێ فه‌لۆجه و مووسل و سه‌لاحه‌دين ب ره‌نگه‌كێ گه‌له‌ك به‌رچاڤ و به‌رده‌وام يێن دهێنه تۆپبارنكرن، ل ڤى ماوه‌يێ بۆرى هه‌ڤپه‌يمانێن نێڤده‌وله‌تى ژى پشكدارى د ڤان تۆپبارنكرنان دا كريه.
ل سه‌ر تۆرێن جڤاكى خرڤه‌بوون دروست بووينه ژێر ناڤێ “باژارێن شيعى” كو ل رۆژا 30ى ڤێ هه‌يڤێ ب رێيا خوه‌نيشادانا داخازا ده‌ست ژ كاركێشانا سه‌رۆكێ وه‌زيران بكه‌ن.
هه‌ر ل سه‌ر ڤێ داخويانا وى ژى هه‌ڤالێن وى ژ ده‌وله‌تا قانوونێ بڕيارا وى ب بڕياره‌كا خه‌له‌ت وه‌سف دكه‌ن و په‌رله‌مانتارێن سونه ژى پێشوازيێ لێ دكه‌ن.
هنده‌ك ژ به‌رپرسان وه‌سا دده‌نه زانين كو ئه‌ڤێ تۆپبارنكرنا به‌رده‌وام چ ئه‌نجامێن خوه يێن به‌رچاڤ نينن و هنده‌ك ژى دده‌نه ديار كرن كو كارتێكرنێن گه‌له‌ك ئه‌رێنى هه‌بووينه.
ئه‌ڤه و ئه‌ڤ گۆتنێن مالپه‌رێ شه‌فه‌ق نيوز به‌لاڤكرين ئاماژێ ب وێ چه‌ندێ ژى دكه‌ن كو ئه‌و چالاكڤانێن دژى ڤێ هزرێ وه‌سان دده‌نه زانين كو ئه‌ڤه حه‌ز ژێكه‌رێن مالكى نه ڤان ره‌نگه كاران ئه‌نجام دده‌ن.
ئه‌ڤرۆ:
ئه‌ڤرۆ سپێدێ جێگرێ سه‌رۆكێ وه‌زێرێن حوكمه‌تا عيراقا فيدرال سه‌ره‌دانا باژێرێ دهۆكێ كر و ل گه‌ل پارێزگارێ دهۆكێ فه‌رهاد ئه‌ترووشى كۆنگره‌كێ رۆژنامه‌ڤانى گێردا.
د كۆنگرێ رۆژنامه‌ڤانى دا ته‌كست ل سه‌ر هاريكاريكرنا ئاروان كر و ئاماژه ب وێ چه‌ندێ كر كو د ماوێ حه‌فتيه‌كێ دا ئه‌و دێ بزاڤێ كه‌ن هاريكاريا بگه‌هيننه ئاواران.
سالح موتله‌گ ئه‌و چه‌ند ژى دا زانين كو ئه‌و دێ بزاڤێ كه‌ن ب زووترن ده‌م قوتابخانا ژ ئاواران ڤالا كه‌ن دا كو كارتێكرنێ ل سه‌ر پرۆسا خواندنێ نه‌كه‌ت و دێ جهى ل ژ ده‌رڤه‌ى قوتابخانا بۆ هێته دابينكرن.
ھەولێر، قائید میرۆ
وەزارەتا پێشمەرگە ل ھەرێما کوردستانێ چاڤەڕێی فەرمانا مەسعود بارزانی سەرۆکێ ھەرێما کوردستانێ یە ژبۆ ھنارتنا ھێزا پێشمەرگەی بۆ رۆژئاڤایێ کوردستانێ و کۆبانێ، رێڤەبەرێ راگەھاندنا وەزارەتا پێشمەرگەی ژی دبێژیت، ھێزەکا تایبەت بۆ پێکھاتێن ئێزدی و مەسیحی و کاکەیی دێ ھێتە چێکرن و ژلایێ وەزارەتا پێشمەرگەی دێ ھێتە چەکدارن، بەلێ پێکھاتا مەسیحی ھژمارەکا کێم ناڤێن خوە تۆمارکرینە
عەمید ھەلگۆرد حیکمەت رێڤەبەرێ راگەھاندنا وەزارەتا پێشمەرگەی یا حوکمەتا ھەرێما کوردستانێ بۆ ئەڤرۆ دیارکر، چو ھێزەکا پێشمەرگەی نەھاتیە ھنارتن بۆ رۆژئاڤایێ کوردستانێ و گۆت” ئەم وەکو وەزارەت لایەنێ فەرمیێ پێشمەرگەینە، پشتی جەنابێ سەرۆک بارزانی داخویانیەک ل دۆر رەوشا کۆبانێ بەلاڤکری، مە وەکو وەزارەتا پێشمەرگەی بەرھەڤیا خوە نیشاندایە بۆ ھنارتنا ھێزا پێشمەرگەی بۆ رۆژئاڤایێ کوردستانێ و کۆبانێ، بەلێ ھەتا نوکە چو ھێزەکا پێشمەرگەی نەچوویە کۆبانێ و چاڤەڕێ فەرمانا سەرۆک بارزانی دکەین، ھەر دەمێ فەرمان گەھشتە مە، ئەڤە ھێزێن پێشمەرگەی بەرھەڤن بچنە رۆژئاڤایێ کوردستانێ و شەڕێ چەکدارێن داعش بکەن، ھەتا مە بەرھەڤی ژی بۆ ھنارتنا ھێزێ کرینە، لێ ھەتا نوکە تنێ بەرھەڤی ھاتیەکرن و چو فەرمانێن فەرمی نەھاتینە بۆ ھنارتنا ھێزێن پێشمەرگەی”.
عەمید ھەلگۆردی گۆت ژی” نوکە دو پلان ل بەردەستێ وەزارەتا پێشمەرگەینە، یا ئێکێ ئەڤ پێشمەرگێن بەری نوکە ھاتینە ڤەقەتیان ژ لەشکرێ عیراقێ و دێ ھەموو ئەڤ سەرباز و پێشمەرگێن بەری نوکە سەر ب لەشکرێ عیراقێ بوون و پشتی روودانێن مووسل ڤەقەتیاین، یێن ھاتینە تۆمارکرن، ھەروەسا پلانا دویێ چێکرنا یەکەیەکا لەشکریا تایبەت ب پێکھاتێن ئێزدی و کاکەیی و مەسیحی یە بۆ بەرگریێ ژ دەڤەرێن وان، نوکە بەرھەڤی بۆ ئاڤاکرنا ڤێ ھێزێ دھێتەکرن و ھژمارەکا مەزن یا وەلاتیێن ڤان پێکھاتان ناڤێن خوە تۆمارکرینە، پشتی مەشق و راھێنانێ دکەن، یەکەیەکا سەر ب وەزارەتێ ڤە دێ بۆ ھێتە ڤەکرن، ئەڤ یەکەیا بۆ پێکھاتێن ئێزدی و مەسیحی و کاکەیی دھێتە پێکئینان دێ وەکو ھەر ھێزەکا دی یا سەر ب وەزارەتا پێشمەرگەبیت و دێ ھێنە چەکدارکرن، ناڤ نڤیسین یا بەردەوامە و ھژمارەکا مەزن یا وەلاتیان ناڤێن خوە تۆمارکرینە و پشکا شێری بەر کوردێن ئێزدی دکەڤیت، بەلێ وەلاتیێن مەسیحی کێمتر ناڤێن خوە تۆمار دکەن، رەنگە ئەڤێ چەندێ ژی پەیوەندی ب کلتور و ئاینێ مەسیحی ڤە ھەبیت”.
ئەڤرۆ، سەرجان مەحمود:
بۆ جارار ئێکێ سەرۆک کۆمارێ تورکیا راگەھاند کو رێکخستنا داعش رێکخستنەکا تیرۆرستیە و دێ ل گەل ھەڤپەیمانیێ ل دژی وان راوەستین و دڤێت ھەم د وارێ سیاسی ھەم ژی د وارێ سەربازی دا د شەرێ ل دژی داعش دا جیە بگرین و دەمێ ژناڤبرنا رێکخستنا تیرۆرست ژ عیراقێ و سووریێ ھاتیە و ئێدی تورکیا ل ھەمبەر وان بێدەنگ نابیت.
رەجەب تەیب ئەردۆگان سەرۆک کۆمارێ تورکیا د داخۆیانیەکی دا راگەھاند کو ئەو وەک تورکیا داعش وەک رێکخستنەکا تیرۆرستی دبینن و گۆت: (ئەم دێ ل گەل ھەڤپەیمانیێ جھێ خوە بگرن و د شەرێ ل دژی داعش دا جیە بگرین، ژ بەر کو رێکخستنا تیرۆرست ل ھەمبەر ھەموو رۆژھەلاتا ناڤین و جیھانێ جھێ مەترسیێیە و دەمێ پاقژکرن یانکۆ ژناڤبرنا وێ ھاتیە).
د ڤێ دەربارێ دا گالیب ئەنساری ئوگلۆ ئەندامێ پەرلەمانێ تورکیا ژ پارتا داد و گەشەپێدان (ئاکپارتی) د داخویانیەکی تایبەت دا بۆ رۆژناما ئەڤرۆ راگەھاند کو پارتا وان و حوکمەتا تورکیا ژ رۆژا دەستپێکێ ڤە داعش وەک رێکخستنەکا تیرۆرست بناڤ دکەت و گۆت: (ئەز وان ئاخڤتن و گۆتگۆتکێن کۆ دبێژن تورکیا ھەڤکاریا داعشێ دکەت ب دژواری رەد دکەم و ب ئاشکرا دبێژم کو رەوشا کۆبانێ و رۆژئاڤا مە گەلەک خەمگین کریە و مافێ ھەری سروشتیە گەلێ کۆبانێ و گەلێ کورد ل تورکیا پاراستنا ئاخا کۆبانێ بکەن و د شەرێ ل دژی داعشێ جە بگرن).
گالیب ئەنساری ئوگلۆ ھەروەسا دیار ژی کر کو ئەو قەبوول ناکەت د ڤێ دەمێ دا پارتا کارکەرێن کوردستانێ پرۆسا ئاشتیێ ژناڤ ببەت و گۆت: (پارتا کارکەرێن کوردستانێ مە وەک ھەوکارێ داعشێ نیشا ددەت و دبێژیت کو حوکمەتا تورکیا کۆبانێ بۆ داعش فرۆتیە لێ ئەو یەک دوورە ژ راستیێ و کۆبان نە باژێرێ مەیە و نە ژی ل ژێر کۆنترۆلا مەیە کو ئەم بفرۆشین و قۆناغا ئاشتیێ و شەرێ ل کۆبانێ دو بابەتێن ژ ھەڤ جودانە و دڤێت (پەکەکە) ب رەنگەکی راست نێزیکی پرۆسا ئاشتیێ ببیت و بەردەوامیێ بدەتە ڤێ قۆناغێ دا کو پرسا کورد ل تورکیا چارە بیت).
ئەندامێ پەرلەمانێ تورکیا د پشکەکا دی یا ئاخڤتنا خوە دا ژی راگەھاند کو تورکیا پشتەڤانیەکا تەمام ددەتە ھێزێن ھەڤپەیمان یێن کو ل دژی داعشێ ھاتیە ئاڤاکرن و گۆت: (تورکیا ب چو رەنگەکی ناخوازیت داعش ببیتە جیرانێ وێ و ئەم دخوازین ل رۆژئاڤا و سووریێ ل سەر بنگەھا ئیرادە و ڤینا خەلکێ وێ دەڤەرێ سیستەمەکی دیمۆکراتیک بھێتە ئاڤاکرن و د جھێ رژێما ئەسەد و تیرۆرستێن داعشێ دا بۆ مە باشترە دەستھەلاتا کوردان ببیتە جیرانێ مە و حوکمەتا مە بەردەوام ل گەل سالح موسلم سەرۆکێ پارتا ئێکەتیا دیمۆکراتیک د ناڤ پەیوەندیان دایە).
گالیب ئەنساری ئوگلۆ د دەربارێ ئاخڤتنا نێچیرڤان بارزانی سەرۆک وەزیرێن ھەرێما کوردستانێ دا کو دیار کربوو تورکیا ھەڤپەیمانیێ مە یێ ستراتیژیە و ب چو رەنگەکی ھەڤکاریا داعشێ نەکریە ژی گۆت: (جھێ رێزگرتنێیە و ئاخڤتنا وی گەلەک راستە ژ بەر کو حوکمەتا تورکیا چو دەمەمەکی ھاریکاریا رێکخراوا تیرۆرستی یا داعش نەکریە و ناکەت ژی).
ل ئالیێ دێ ئایلا ئاکات ئاتا ئەندامێ پەرلەمانێ تورکیا یا سەر ب پارتا دیمۆکراسیا گەلان ژی بۆ رۆژناما ئەڤرۆ دیار کر کو قۆناغا ئاشتیێ ل تورکیا و باکورێ کوردستانێ ب تەمامی ب رۆژئاڤا و کانتۆنا کۆبانێ ڤە گرێداییە و گۆت: (ل ئالیەکی تورکیا دێ بەحسێ پرۆسا ئاشتیێ بکەت و ل ئالیێ دی ژی دێ ھەڤکاریا داعشێ بکەت و وان دژی کوردان بکار ئینیت، نھا ئەز ژ (ئاکپارتی) و حوکمەتا تورکیا دپرسم ھوون دێ شەرێ کوردان کەن یان ھەوە دڤێت ببنە ھەڤپەیمانێ وان و پرسا کوردی چارە بکەن؟ ھەکە ھوون دخوازن پرۆسا ئاشتیێ بەردەوام بکەت دڤێت ھوون دەستان ژ داعشێ بەردەن و پشتەڤانیا رۆژئاڤا بکەن لێ ھەکە ھوون بەردەوامیێ بدەنە سیاسەتا خوە یا ھەتا نھا وێ دەمێ پرۆسا ئاشتیێ نامینیت).
ل ئالیێ دی کۆرای دوزگورەن مامۆستایێ زانکۆیا بۆخاز ئیچی یا ئستەنبولێ و نڤیسەرێ تورک ژی راگەھاند کو پەیڤا سەرۆک کۆمار یا د دەربارێ داعش و جە گرتنا تورکیا ل گەل ھەڤپەیمانیا ل دژی داعشێ دا پێنگاڤەکا نوو یا دلخۆشکەرە و گۆت: (ھەکە تورکیا ژ شاشیا خوە یا ل ھەمبەر کوردێن رۆژئاڤا بزڤریت ئەڤە گەلەک ئەرەنیە و دەمێ وێ یەکێ ھاتیە تورکیا ھەڤکاریا رۆژئاڤا د شەرێ ل ھەمبەرێ داعشێ دا بکەت و ھەڤکاریا کۆبانێ بکەت و وەک ھەرێما کوردستانا عیراقێ پەیوەندیێن فەرمی ل گەل رێڤەبەریا رۆژئاڤا دروست بکەت. ھەکە تورکیا وەسا بکەت دێ بشێت پرسا کورد ل تورکیا ژی چارە بکەت و ژ نوو ڤە جھێ خوە د ناڤ جیھانا پێشکەڤتی دا بگریت).
ئه‌ڤرۆ، سالار دوسكى:
رێڤه‌به‌رێ په‌یوه‌ندی و راگه‌هاندنێ ل وه‌زاره‌تا ئه‌وقافێ د مالپه‌رێ خوه یێ تایبه‌تێ فێسبووكی دا دیار كریه كو (فاتیما مه‌جید ئلیاس) كو خه‌لكا كۆمه‌لگه‌ها كه‌له‌كچی یه سه ب پارێزگه‌ها دهۆكێ كو دژیێ 85 سالیێ دایه گیانێ خوه ژ ده‌ست دايه پشتى ماوه‌كى مايه دبن چاڤدێریا چرا نوشدارێن وی وه‌لاتی دا.
مه‌ریوان گۆتژی: “پاشان ب به‌رهه‌ڤبوونا رێڤه‌به‌رێ گشتیێ حه‌ج و عومرێ ل پارێزگه‌ها دهۆكێ و هه‌موو حه‌جیێن كوردستانێ و ل باژێرێ مه‌كه‌ها پیرۆز هاته بن ئاخكرن”.
مه‌ریوان ئاشكرا كر ژی كو ژ به‌ر نه‌خۆشیه‌كێ هه‌ر ده‌مێ گه‌هشتنا حه‌جیان بۆ سعودیێ ئه‌ڤ حه‌جیه هنارتبوو نه‌خۆشخانێ و د بن چاڤدێریا نوشداران دا بوو هه‌تا ئه‌ڤرۆ 24\9 گیانێ خوه ژ ده‌ست دايى”.
به‌رى نوكه ژى حه‌جيه‌كێ پارێزگه‌ها سلێمانى گيانێ خوه ل مه‌ككێ ژ ده‌ست دابوو.
ئەڤرۆ، نیوار محەمەد سەلیم:
رێڤەبەریا گشتی یا کەشناسی و بیڤەلەرزێ ل ھەرێما کوردستانێ راگەھاند کو ئەڤرۆ رۆژا چارشەمبی رێکەفتی ٢٤\٩ ژ ئەنجامێ پالەپەستووریا نزما باکورێ رۆژھەلاتێ تورکیا و نزمیا پالەپەستوویا نزما گەرما سالانە پێشبینی دکەن ب رەنگەکێ چاڤەرێکری پلا گەرماتیا دھۆکێ ل چاڤ رۆژێن تۆمارکری یێن بۆری زێدە ببیت.
ب گۆرەی راپۆرتا رێڤەبەریا گشتیا کەشناسی و بیڤەلەرزێ ل ھەرێما کوردستانێ، ئەڤرۆ ل دھۆکێ دێ ئەسمان ساھی بیت و پلا گەرماتیێ دێ پیچەک زێدەتر بیت ژ رۆژێن بەری بۆری ب رەنگەکی کو دێ بلندترین پلە ٣٥ بیت و نزمترین پلە ژی دێ ٢١ بیت.
دیسا ئاشکەرا ژی کریە کو ئاستێ بای ژی دێ ژ باکورێ رۆژھەلاتی بیت و ئەڤە ژی دێ وەکەت کو لەزاتیا وی ل سەرخۆ بیت کو نێزیکی ١٠ ھەتا ٢٠ کم د دەمژێرەکێ دا و ب ڤێ چەندێ ژی دێ ماوێ بینینێ ھەشت ھەتا ١٠ کم بیت.
دەربارەی ھەولێرێ ژی دایە زانین کو دێ بلندترین پلا گەرماتیێ ٣٧ بیت و نزمترین پلە ژی ٢٢ و ل سلێمانیێ ژی بلندترین پلە دێ ٣٤ بیت و نزمترین پلە ٢٣ بیت.
دهۆك، له‌زگين جۆقي:
سه‌رۆكێ ئوكرانيا پيترو پوروشينكو د پرێس كۆنفرانسه‌كي دا ديار كر كو گه‌له‌ك كه‌سێن كو نها ئه‌ندامێن په‌رله‌مانێ وه‌لاتێ مه نه پشته‌ڤانيا رژێما به‌رێ دكه‌ن و ئه‌و نوونه‌رێن خه‌لكێ مه نينن و ژ به‌ر وێ يه‌كێ ژي من فه‌رمان دايه كو په‌رله‌مان بهێته هلوه‌شاندن و دڤێت جاره‌كا دي هه‌لبژارتنێن په‌رله‌ماني ل وه‌لاتێ مه بهێنه كرن دا خه‌لك ل سه‌ر بنه‌مايێ راستيا نها ل وه‌لاتي نوونه‌رێن خوه هه‌لبژێرن و ژ به‌ر وێ يه‌كێ ژي يا هه‌ري راست ئه‌و بوو كو په‌رله‌مانێ نها بهێته هلوه‌شاندن.
پشتي وێ يه‌كێ هنده‌ك ئاليێن سياسي يێن ئوكرانيا كو دژبه‌ريا حوكمه‌تا نها دكه‌ن ديار كرن كو سه‌رۆكێ نها پوروشينكو ژي دڤێت وه‌ك سه‌رۆكێ به‌رێ يێ ئوكرانيا كه‌سێن نێزيكي خوه د هه‌موو پۆستێن حوكمه‌ت و په‌رله‌ماني دا بجه بكه‌ت و ژ به‌ر وێ يه‌كێ ژي فه‌رمانا هلوه‌شاندنا په‌رله‌ماني دايه، چونكو په‌رله‌مان جهه‌كه نوونه‌راتيا خه‌لكي دكه‌ت و د ناڤ خه‌لكي دا ژي بير و بۆچوونێن گه‌له‌ك جودا هه‌نه و بريارا هلوه‌شاندنا په‌رله‌ماني دێ زيانێن خوه يێن مه‌زن ل سه‌ر بارێ ئابووري و سياسي يێ وه‌لاتي هه‌بيت.
ل هه‌مبه‌ر وێ يه‌كێ ژي گه‌له‌ك پشته‌ڤانێن پوروشينكو ديار دكه‌ن كو بريارا سه‌رۆكێ وه‌لاتي د جهێ خوه دايه و پێدڤي بوو به‌ريا نها ئه‌و برياره هاتبا دان، چونكو وه‌لاتێ مه ژ قۆناغه‌كا هه‌ستيار ده‌رباز دبيت و دڤێت د ناڤ په‌رله‌مان و هه‌موو سازيێن دي يێن ده‌وله‌تێ دا گوهۆرين بهێنه كرن و يێن بخوازن دژبه‌ريا شۆره‌شا ئوكرانيا بكه‌ن دڤێت ژ كاري بهێنه دوورخستن.
وه‌زيرێ ده‌رڤه يێ روسيا سيرگێي لاڤرۆڤ ژي ديار كر كو هلوه‌شاندنا په‌رله‌مانێ ئوكرانيا ب فه‌رمانا سه‌رۆكێ وي وه‌لاتي نيشا دده‌ت كو ئالۆزيێن مه‌زن د ناڤبه‌را په‌رله‌ماني و حوكمه‌تێ دا هه‌يه، چونكو به‌ريا نها گه‌له‌ك ژ ئه‌ندامێن په‌رله‌ماني دژبه‌ريا سياسه‌تا پوروشينكو كرينه و ب وێ رێكێ ژي سه‌رۆكێ ئوكرانيا دڤێت كه‌سێن نێزيكي خوه د هه‌موو پۆسته‌كێ دا بجه بكه‌ت دا رێگري ل داخوازيێن خه‌لكێ بهێته كرن و دڤێت سازيێن نێڤده‌وله‌تي باش دووڤچوونا هه‌لبژارتنێن په‌رله‌ماني بكه‌ن چونكو ره‌نگه سه‌خته‌كاريێن مه‌زن د هه‌لبژارتنان دا بهێنه كرن.
نيشاندان