حوكمه‌تا عيراقێ ژ پرۆژێ قانوونا بوودجێ گشتى يێ سالا 2014 بوودجێ هه‌ردو هه‌يڤێن هه‌شت و نه‌هـ بنه‌جهكر و سوبه‌هى ل روونشتنا ئاسايى يا جڤاتا وه‌زيران دێ بڕيارا مه‌زاختنێ ل سه‌ر هێته‌ دان، ئه‌ڤرۆ ئێڤارى ژى لژنا دارايى ل په‌رله‌مانى ل گه‌ل عه‌بادى ل دۆر بوودجێ و مووچێ فه‌رمانبه‌رێن هه‌رێمێ دێ كۆمبيت.

مه‌سعود حه‌يده‌ر سه‌رۆكێ لژنا دارايى ل په‌رله‌مانێ عيراقێ ب خه‌ندن راگه‌هاند كو ئه‌ڤرۆ ئێڤارى لژنا وان دێ ل گه‌ل سه‌رۆكێ حوكمه‌تێ كۆم بيت ب مه‌ره‌ما بوودجا عيراقێ و مووچێ فه‌رمانبه‌رێن هه‌رێما كوردستانێ.

ئاماژه‌ ب وێ چه‌ندێ ژى كر كو راپۆرتا حه‌فت هه‌يڤێن بۆرى يا مووچه‌ى ب ده‌ست گه‌هشتيه‌ و گۆت: “د بوودجێ بنه‌جهـ دا ره‌زامه‌ندى ل سه‌ر مووچێ هه‌ردو هه‌يڤێن هه‌شت و نه‌هـ دايه‌”.

ئاماژه‌ ب وێ چه‌ندێ ژى كر كو سوبه‌هى د كۆمبوونا جڤاتا وه‌زيران دا، دێ ب ئه‌رێنى ره‌زامه‌ندى ل سه‌ر هنارتنا مووچێ هه‌يڤا هه‌شت و نه‌هـ يێ فه‌رمانبه‌رێن هه‌رێمێ هێته‌ دان و گۆت: “بۆ حه‌فت هه‌يڤێن بۆرى ژى دێ پاشان به‌حس ل سه‌ر هێته‌ كرن، هێشتا چو ديار نينه‌”.

به‌رهه‌ڤكرن، نيوار محه‌مه‌د سه‌ليم:

ئەڤرۆ، نیوار محەمەد سەلیم:

ئەندامەکا جڤاتا نوونەرێن عیراقێ ل سەر لیستا ھەڤپەیمانیا کوردستانی راگەھاند کو ئەو پێشبینیێ دکەت ل دەمێ کۆمبوونا جڤاتا نوونەران یا ئاسایی ل رۆژا سێشەمبی، بەحس ل ھنارتنا بودجا ھەرێما کوردستانێ بکەن، دا زانین ژی کو سەرۆکێ حوکمەتێ دشێت ئەو ب خوە ژی وێ بڕیارێ بدەت.

نەجیبا نەجیب، ئەنداما جڤاتا نوونەرێن عیراقێ ل سەر لیستا پارتی دیموکراتی کوردستان و ئەنداما لیژنا داراییا جڤاتا نوونەران بۆ رۆژناما ئەڤرۆ دیارکر کو جڤاتا وەزیران ھەموو رۆژێن سێشەمبی کۆمبوونا خوە یا ئاسایی دکەت، ب گۆرەی ئەو پێزانینێن مە ھەین و پەیوەندیێن مە دگەل وەزیران دا، پێشبینیێ دکەم کو د کۆمبوونا رۆژا سێشەمبی دا، جڤاتا وەزیرێن عیراقێ تشتەکی بدەتە دەست کوردان و ھەر چو نەبیت مووچێ دو ھەیڤان ڤرێکەت.

نەجیبایێ دا زانین ژی کو ئەو ژ بەر وێ چەندێ ڤان پێشبینیان دکەت، چونکو ل دەمێ حەیدەر عەبادی کابینا نوو راگەھاندی، سۆز دا د دەمێ ھەیڤەکێ دا کێشا مووچان چارە کەت، ئەڤە ژی دێ د رۆژێن جەژنێ دا ب دووماھی ھێت و گۆت”عەبادی سۆز دابوو کو حوکمەتا وی ل سەر بنیاتێ ھەڤپشکیا راستەقینە بیت و د دەمێ ھەیڤەکێ دا کێشا مووچێن فەرمانبەرێن ھەرێما کوردستانێ چارە کەت و ل رۆژانێن جەژنێ دێ ئەو دەمێ ھاتیە دەستنیشانکرن ب دووماھی ھێت”.

زێدەتر ژی گۆت”خالا سیێ یا ئەز پشت بەستنێ ل سەر دکەم ئەوە کو ھەلویستێ شیعا و سونانە ب تایبەت پشتی ھاتنا عەمار حەکیمی و ئوسامە نوجێفی و سالح موتلەگی کو دووپاتی ل سەر وێ چەندێ کرن کو بوودجە بھێتە ھنارتن بۆ ھەرێما کوردستانێ وەکو نیازپاکی”.

ئەنداما جڤاتا نوونەرێن عیراقێ ل سەر لیستا پارتی دیموکراتی کوردستان ئاماژە ب وێ چەندێ ژی کر کو عەبادی سەرۆکێ حوکمەتێ یە و دشێت بێی کۆمبوونا جڤاتا وەزیران ژی ڤێ بڕیارێ بدەت و گۆت”ھەکە ئەم ل بیرا خوە بینین، مووچێن فەرمانبەرێن ھەرێما کوردستانێ ب رازیبوونا جڤاتا نوونەران نەھاتیە بڕین، بەلکو ب بڕیارەکا تاکرەوی یا سەرۆکێ بەرێ یێ جڤاتا وەزیران نوری مالکی بوویە”.

نەجیبا نەجیب گوت ژی”بەری چەند رۆژان ژی حەیدەر عەبادی گەلەک بڕیار داینە، وەکو ھەلوەشاندنا نڤێسینگەھا فەرماندێ گشتیێ ھێزێن چەکدار، دشێت ڤێ بڕیارێ ژی ڤەگەرینیتە ڤە و مافێ ڤێ چەندێ ژی یێ ھەیی، بەلێ وی ڤیایە ڤی کاری ( ئانکو ھنارتنا بودجە و مووچێن ھەرێمێ) ب رێیا جڤاتا وەزیران بیت، ھەکە نوکە وێ ژی ب تنێ شیعە و سونە یێن تێدا، ھێشتا کورد ژی تێدا نینن، بەلێ ھەموو دگەل وێ چەندێ نە کو بوودجە بھێتە ھنارتن بۆ ھەرێما کوردستانێ”.

وەزارەتا دارایی و ئابووری ل حوکمەتا ھەرێما کوردستانێ بەحسێ ھنارتنا پارەی ژ لایێ بەغدا بەری جەژنێ رەد دکەت، بریکارێ بەرێ یێ وەزارەتا دارایی یا عیراقێ ژی دبێژیت نەیا دیارە دێ کەنگی بەغدا پارەی رەوانە کەت.

دلێر تارق پەیڤدارێ وەزارەتا دارایی و ئابووری ل حوکمەتا ھەرێما کوردستانێ بۆ ئاژانسا ئەنادول دیارکر کو سێ ھەیڤن ژ لایێ بەرپرسێن حوکمەتا عیراقێ و ئەندامێن شاندێ دانوستاندن کارێ کوردی و پەرلەمانتاران بەحسێ ھنارتنا مووچەی یان سولفەکێ بۆ ھەرێمێ دھێتە کرن، وەزارەتا دارایی پشت بەستنێ ل سەر گۆتنان ناکەت ب تنێ سەرەدەریێ ل گەل نڤیسارێن فەرمی دکەت و دڤێت وەزارەتا دارایی یا عیراقێ ب فەرمی مە ل سەر ھناراتنێ ئاگەھدار بکەت، ژ بەر ڤێ چەندێ ھنارتنا بودجێ ژ لایێ بەغدا ڤە ب تنێ ئاخفتنن و نەبوویە بڕیارەکا فەرمی.

بریکارێ بەرێ یێ وەزارەتا دارایی یا عیراقێ د. فازڵ نەبی ل دۆر ھنارتنا پارەی بۆ ھەرێما کوردستانێ ژ لایی بەغدا ڤە گۆت نەیا دیارە دێ کەنگی بەغدا پارەی رەوانەی ھەرێمێ کەت چونکو ھەتا نوکە وەزیرێ دارایێ عراقێ کو پشکا کوردانە دەست ب کارێ خوە نەکریە و ئەڤە ژی خەمساریا سەرکرداتیا سیاسی یا کوردستانێ یە، چونکو دڤێت کورد بخوە ل بەغدا دووڤچوونێ بۆ ھنارتنا پارێ خوە بکەت.

به‌رهه‌ڤكرن، ئازاد نسرى: