ئەڤرۆ نیوز، رەمەزان ھەرنی:

پشتی روودانێن 16 ێ ئوکتوبەرێ و بەلاڤبوونا حەشدا شەعبی ل دەشتا نەینەوا چەندین کارێن نەمرۆڤانە دژی پێکھاتێن وان دەڤەران ھاتینە ئەنجامدان و بۆ وەرگرتنا مافێ خوە دێ سکالایێ ل سەر حەشدێ تومارکەن.
لوئەی ئلیاس چالاکڤانێ کریستیان ل دەشتا نەینەوا بۆ ئەڤرۆ نیوز دیار کر کو پشتی روودانێن 16 ێ ئوکتوبەرێ حەشدا شەعبی ب تەمامی ژیانا وان نەخوەشکریە و چەندین جارا وان داخواز کریە کو حەشدا شەعبی دەڤەرێن وان چولبکەت و دەرکەڤن، بەلێ ھەر ل دەڤەرێ ماینە و دەسھەلاتا خوە سەپاندیە ل سەر خەلکی و زیانێن مادی و یێن مەزن ب وەلاتیان گەھاندیە لەورا وان بریار دایە سکالایێ ل نەتەوێن ئێکگرتی ل سەر تومار بکەین.
سەلیم شەبەک چالاکڤانەکێ کوردێن شەبەکە ل دەشتا نەینەوا بۆ ئەڤرۆ نیوز دیار کر کو حەشدا شەعبی ب دروستی ژیان ل بەر وان نەخوەشکریە و گۆت: “ئەم ب ھەبوونا وان ل دەڤەرێن خوە د دلخوەش نینن و مە چەندین جاران ڤیایە دەرکەڤن، بەلێ مخابن ل سەر رەفتارێن خوە د بەردەوامن”.

ئەڤرۆ نیوز، لەزگین جوقی:

چالاکڤانیێن ئێزدی ل شنگالێ دبێژن تورکیا بریار دایە ھێرشی سەر شنگالێ بکەت ئەڤە ژی دێ بیتە ئەگەر جارەکا دی مال وێرانی ب سەر ئێزدیان بھێت.
خەلیل شڤان، چالاکڤانێ ئێزدی ل قەزا شنگال بۆ ئەڤرۆ نیوز دیار کر کو ھەموو خەلکێ شنگالێ ل گەل وێ چەندێ نە کو لایەنێن نەقانوونی شنگالێ چوول بکەن و ئەو گەنجێن ئێزدیان ژی یێن گەھشتینە وان لایەنیێن نەقانوونی، ھەکە راست بێژن بلا بچن ل عەفرینی و ھەجین و سوسە شەری بکەن و ژ شنگالێ دەرکەڤن ھەکە وان ژی بتنێ ژ بەر مووچەی و پارەی بیت بلا ل خوە بزڤرن و نەبنە ئەگەر مال وێرانی ب سەرێ خەلکێ شنگالێ بھێت و جارەکا دی کارەساتەک ل شنگالێ، رووبدەت، چونکو تورکیا یا گەفێن دژوار ل سەر شنگالێ دکەت و گۆت: “ھەکە شنگال ب ڤی رەنگی بمینیت دێ تورکیا ھێتە د ناڤ شنگالێ دا”.
ناڤھاتی ئەو ژی دیار کر کو ئەڤرۆ ھەموو یێ دبینن تورکیا بریار دایە ئوپەراسیۆنەکا بەرفرەە ل سەر شنگالێ ئەنجام بدەت دژی گرۆپێن نە قانوونی لەوڕا ئەو دخوازن بەری ئوپەراسیۆن بھێتە کرن و لەشکر بھێتە د ناڤ شنگالێ دا ھەموو لایەن شنگالێ چوول بکەن.