رادیۆیا داعش مەترسی خستیە سەر بەردەڕەشێ

15/06/2016 13:03

1105

ئەڤرۆ نیوز:

ھەیامەکە رادیۆیا داعش دگەھیتە دەڤەرا بەردەڕەش و ھندەک جھێن ئاکرێ. بەرپرسێن وەزارەتا پێشمەرگەی و دەڤەرا بەردەڕەشێ ژی د ھەولا ھەندێ دانە کو ب دیتنا میکانیزمەکی رێکێ ل پەخشی بگرن. رێڤەبەرێ ھەماھەنگی و رەوشەنبیری ل وەزارەتا پێشمەرگەی ژی راگەھاند ، پەخشا رادیۆیا داعش مەترسیەکا راستەوخۆ ھەیە ل سەر ھێزێن پێشمەرگەی ل چەپەرێن شەڕی ھەم د ناڤ خەلکی و ھەم بۆ کەساتیا پێشمەرگەی ب خوە ژی، ھەکە بھێت خودێ نەکەت پێشمەرگەیەک گۆھی خوە بدەتێ.
ھەلگورد حیکمەت، رێڤەبەرێ ھەماھەنگی و رەوشەنبیری ل وەزارەتا پێشمەرگەی بۆ ئەڤرۆ راگەھاند، ھەبوونا پەخشەکا وەکی رادیۆیا داعش مەترسیەکا مەزنە بۆ سەر خەلکێ دەڤەری و ھزرێن خەلکی دگوھۆریت بەرەو توندوتیژیێ و دبیت ب زووترین دەم رێ ل پەخشی بھێتە گرتن. ئەو بەرپرسێ وەزارەتا پێشمەرگەی ھەیاما چەند رۆژانە کار ل سەر وێ چەندێ دکەت کا چاوا رێکی ل پەخشێ بگریت.
رێڤەبەرێ ھەماھەنگی و رەوشەنبیری راگەھاند ژی، پەخشا رادیۆیا داعش مەترسیەکا راستەوخۆ ھەیە ل سەر ھێزێن پێشمەرگەی ل چەپەرێن شەڕی ھەم د ناڤ خەلکی و ھەم بۆ کەساتیا پێشمەرگەی ب خوە ژی، ھەکە بھێت خودێ نەکەت پێشمەرگەیەک گۆھی خوە بدەتێ.
ھەر سەبارەت ڤی بابەتی رێڤەبەریا رەوشەنبیری و ھونەریا بەردەڕەشێ نڤیسارەک ب ژمارە 65 ل 13/6/2016 ئاراستەی قایمقامیەتیا قەزا بەردەڕەشێ کری یە و تێدا ھاتیە کو ھەبوونا پەخشێ رادیۆیا داعشێ ب مەترسی دزانیت ل سەر ھزرێ تاکێن دەڤەرێ و داخواز دکەت ب زووترین دەم ئەڤ بابەتە بھێتە چارەسەر کرن و وەل خەلکی بھێتە کرن گوھداریا رادیۆیەکا وەسا نەکەن، چونکو کاریگەریەکا خراب دکەتە سەر خەلکێ دەڤەرێ و ب تایبەت ئەو کەسین کو دەمارگیریا ئاینی ل دەف وان ھەیە وەل وان دکەت پشتگیریا راستەوخۆ و نا راستەوخۆیا داعشێ بکەن.
ل گۆر زانیارین ئەڤرۆ ئاسایشا بەردەڕەشێ نوکە ب ھووری چاڤدێریا ڤێ رادیۆیێ دکەت و دڤێت بزانیت ئەو چو جۆرە کەسەن گۆھێ خوە ددەنە رادیۆیا داعش، لەورا خەلک ب ئاشکرایی نەشێن بەحسێ رادیۆیا ناڤھاتی بکەن و دیسان چاڤدێری دانایە سەر رادیۆیی کا بەرنامە و پەخشێن وان ب چو ئاوایەکی یە.
سەرۆکی ئێکەتیا زاناین ئاینی ل لیژنا ناوچا بەردەڕەشێ مامۆستا ئیبراھیم رەمەزان شێخا بۆ ئەڤرۆ دیار کر کو ئەڤ رادیۆیە مەترسیەکا زێدە ھەیە ل سەر ئەو کەسێن ئاوارە و ژ رەخێ مووسل ھاتینە دەڤەرا بەردەڕٍەشێ و ئەگەر ھەیە ھەکە گۆھێ خوە بدەنە وێ رادیۆیێ و فێری کارێ تیرۆرستی ببن و ببنە پشتەڤانەکا داعشێ د ناڤ خاکا ھەرێما کوردستانێ و خودێ نەکەت ئەو بشێن ھندەک کردارێن تیرۆرستی ئەنجام بدەن.
سەرۆکی ئێکەتیا زاناین ئایینی ل دەڤەرا بەردەڕەشێ دیار ژی کر کو نوکە گەلەک کەس ل بەردەڕەشێ ھەین خودان ھزرەکا توندڕەو و دەمارگیریا ئایینی نە و ئەڤ رادیۆیە مەترسیەکا دیترە بۆ وان ژی کو وەل وان بکەت بچنە رێزا داعشێ و ببنە مەترسی ل سەر دەڤەرێ.
ھەتا نوکە گەلەک ژ خەلکێ دەڤەرێ نزانن پەخشێ رادیۆیا داعش دگەھیتە دەڤەرا بەردەڕەشێ و ئەو پشکێن وەلاتیان ژی کو زانیاری ل سەر وێ رادیۆیی ھەین وەسا ب ساناھێ خوە ئاشکرا ناکەن کو پێزانینان ل سەر رادیۆیا داعشێ دزانن.
ولاتیەکێ دەڤەرێ ئاماژە ب وێ یەکێ کر کو خەلک ژ بەر ئاسایش و دەزگەھێن ئەمنی بەحسێ رادیۆیی ناکەن، ھەکە ژ بەر ھەندێ نەبیت خەلک ب ئاشکرا گۆھێ خوە ددەتە رادیۆیێ.
شارەزایەکی بواری رادیۆیی ژی دیار کر یا ب زەحمەتە بشێت رێ ل پەخشی بھێتە گرن وەسا ب ساناھێ دڤێت ئامیرەکا تایبەت ھەبیت تەشویشان بێخیتە سەر رادیۆیا وان و نەھێلیت ئەو پەخش بگەھیتە دەڤەرێ.

ب ڤى مه‌رجى هه‌رێمێ دێ ل گه‌ل عيراقێ رێكه‌فتنێ كه‌ت

15/06/2016 12:32

369

ئه‌ڤرۆ نيوز:

سه‌فين دزه‌ى، ئاخفتنكه‌رێ ب ناڤێ حوكمه‌تا هه‌رێما كوردستانێ بۆ رووداو گۆت: “به‌رپرسێن هه‌رێما كوردستانێ د ئاماده‌نه‌ د رێيا به‌غدا دا په‌ترۆلێ ب فرۆشن، هه‌كه‌ حوكمه‌تا عيراقێ هه‌يڤانه‌ ژ بوودجێ گشتى يێ وه‌لاتى ئێك مليار دۆلاران بده‌نه‌ كوردستانێ”.

ب گۆتنا ئاخفتنكه‌رێ ب ناڤێ حوكمه‌تا هه‌رێما كوردستانێ، هه‌ر رێكه‌فتنه‌كا بهێته‌ كرن دڤێت ل سه‌ر بنه‌مايێ واقعى يێ نوكه‌ بيت، هه‌رێما كوردستانێ ب تنێ داخوازا هێژايێن خوه‌ يێن دارايى دكه‌ت، ب گۆره‌ى دستوور و قانوونا بوودجه‌ى.

سه‌فين دزه‌ى گۆتژى: “ب گۆره‌ى قانوونا بوودجه‌ى بيت، پێدڤيه‌ ل سه‌ر عيراقێ هه‌يڤانه‌ نێزيكى ئێك مليار دۆلار بده‌ته‌ هه‌رێما كوردستانێ”.

بھایێ پتڕۆلێ زێدەتر داناکەڤیت و دێ ھێشتا بلندبیت

15/06/2016 12:30

291

ئەڤرۆ نیوز:
شەھرەزایەکێ کەرتێ پتڕۆلێ ئاشکرا دکەت، پێشبینی دھێتەکرن بۆ ئیسال بھایێ ئێک بەرمیلا پتڕۆلێ بگەھیتە شێست دۆلارێن ئەمریکی و ئەگەر رێکخراوا ئوپێک بەرھەمێ خوە کێم بکەت، چەند رۆژەکێن کێم دێ بھایێ بەرمیلا پتڕۆلێ گەھیتە سەد دۆلاران، ھەروەسا دبێژیت، ناکۆیێن ناڤبەرا وەلاتان و رکمانیا سعودیێ دگەل بازاڕی و ھندەک وەلاتان ئەگەرێ داکەتنا بھایێ پتڕۆلێ یە.
عەلی حەسەن بەلۆ، سەرۆکێ بەرێ یێ لژنا نەفت و غازێ ل جڤاتا نونەرێن عێراقێ بۆ رۆژناما ئەڤرۆ گۆت” بەری نوکەژی من پێشبینی کر دێ بھایێ پتڕۆلێ ل بازاڕێن جیھانێ بلندبیت، ئەڤە پێشبینیا من راست دەرچوو نوکە بھایێ ئێک بەرمیل گەھشتە پتری پێنجی دۆلاران و لڤی بھایێ نوکە دانابەزیت ئەگەر جارجار دۆلارەکی داکەڤیت و بلندبیت، پێشبینی دکەم بۆ دو ھەیڤێن دی بھایێ ئێک بەرمیل بگەھیتە شێست دۆلاران، بەلێ زێدەتر نابۆریت ل دەوروبەرێ شێست دۆلارا، سەردەمێ زێڕینێ پتڕۆلێ دێ ھەر ھێتەڤە و پتڕۆلێ ئاریشەک ھەیە، ئەوژی وەکی کەرەستەیێن دی یا ئازاد نینە و زۆرجارا سیاسەت مایێ خوە ل پتڕۆلێ دکەت، بشێوەیەکێ گشتی پتڕۆل د ئەڤسالەدا ھەتا رادەیەکی یا جێھگیربیت و داناکەڤیت بۆ بھایێ بەرێ، چونکو 27 دۆلار و بھایێ نوکە ھەی بھایێ راستەقینەیێ پتڕۆلێ نینە و چو جارا پتڕۆل بھایێ خوە ژدەست نادەت ئەگەر ئاریشەیێن سیاسی نەبن.
عەلی بەلۆ گۆتژی” کەرەستێن دی ئازادن د بازاڕێ دا تنێ پتڕۆل نەبیت زۆرجارا سیاسەت مایتکرنێ د کەرتێ پتڕۆلێ دکەت و ئەگەر نوکە ئوپێک بەرھەمێ خوە دو ملیۆنا یان سێ ملیۆنا کێم بکەت، ئەڤە دێ بھایێ پتڕۆلێ چیت بۆ نێزیکی سەد دۆلارا، ئەف ئاریشە و رکمانیا ناڤبەرا سعودیە و ئیرانێ و ناڤبەرا ئەمریکا و فەنزویلا و رۆسیا کاریگەری لسەر بازاڕێ پتڕۆلێ ھەیە، سالا 2008ێ بھایێ ئێک بەرمیلا پتڕۆلا داکەفت بۆ 35 دۆلارا ئوپێکێ ئێکسەر بەرھەمێ خوە چوار ملیۆن کێمکرن و بھایێ پتڕۆلێ ئێکسەر گەھشتە حەفتێ دۆلارا، ئەگەر سیاسیەن ئاریشە نەھێنە چارەسەرکرن بھا ئێکسەر ناچیتە سەر، چونکە سعودیە دخوازیت رێژا پتڕۆلا خوە زێدە فڕێکە بازاڕی و زیانێ ب دەولەتێن دی بدەت، ئەف ھەڤڕکی بۆیە ئەگەر بھایێ پتڕۆلێ بلند نەبیت و بڤی شێوەی وەلاتێن جیھانێ شەڕێ ھەڤدوو دکەن.

نەخوشیێن مەترسیدار دھۆکێ سەرھلداینە

15/06/2016 11:59

3920

ئەڤرۆ نیوز:
رێڤەبەرێ ڤێتێرنەریا دھۆکێ دیارکر قەیرانا نوکە کارتێکرن کریە کو پێشتر کومەکا ڤاکسینان بێ بەرامبەر وەک حوکمەت ب دەست مە دکەفتن و نوکە نە و ژ نەبوونا ئەڤان فاکسینان مەترسی یە و نوکە بەر ب وێ ئێکێ دچین ئەو فاکسینێن بەر دەست ژی مە ئێدی نابن و بۆ چارەسەرکرنێ ھەر ب چ رەنگان مە نەماینە.
د.دیار تەیب زێدەتر ژی بۆ بەرپەرێ بازار ل رۆژناما ئەڤرۆ گۆت:کێشا نەبوونا دەرمانان ل سەر ئاستێ وەزارەتێ ژی ھاتیە گەنگەشەکرن و ل سەر بابەتی ھاتینە ئاگەھدارکرن، دیسا ھاتینە بلندکرن بۆ ئەنجوومەنێ وەزیران و ل سەر ئاستێ پارێزگەھا دھۆک ژی مە بفەرمی داینێ، نەخوەشیا تەبەکی و نەخوەشیا تاعونا ئاژەلی ژی سەر ھلدایە و ئەڤە ھەڤرکیەکا گەلەک مەزنە و ھەتا نوکە چارە بۆ نەھاتیە دیتن و ل دووڤ زانیاریێن مە ھەتا نوکە وەزارەتێ نەشیایە ئەو پارێ پێدڤی ب دەست خوە ڤە بینیت، ژلایەکێ دی ڤە ژی ھەتا نوکە ئەو بیاڤێ کەرتێ تایبەت نەھاتیە خورتکرن کو وەلاتی ئەوان دەرمانان ل بازاری بکرن و بکاربین و بتنێ خەلکێ مە پشست بەستنێ ل سەر کۆمپانیێن بەغدا دکەت و دڤێت ب رێکا وان بگەھنە ھەرێما کوردستانێ و پارێزگەھا دھۆکێ، ھیڤی خوازین حوکمەتا ھەرێما کوردستانێ چارەکێ بۆ ئەڤان نەخوەشیا ببینیت و بشێت چارەسەربکەت.
د.دیار تەیب رێڤەبەرێ ڤێتێرنەری ل پارێزگەھا دھۆک ئەو ژی نە ڤەشارت و گۆت: نەخشویا تەبەکی ل قەزایێن دھۆک و بەردەرش و ئاکرێ و شنگال ھەیە و دیسا نەخوشیا تاعونێ حالەت دەرکەتینە و بتنێ چارەسەری ئەوە بەری نەخوشی دەرکەڤیت دەرزی بۆ بھێتەدان و ژ نەبوونا ڤاکسینێ نەخوەشیی دەرکەفتیە وی دەمی ئاژەل د مەترسیێ دایە، لێ ئەڤ نەخوەشیە بۆ مرۆڤان ناھێنە ڤەگوھاستن.
د. دیار تەیب ھەمان دەم ھوشداری دا کو نەخوشیا تایا مالتایێ ھەیە و ئەو دھێتە ڤەگۆھاستن بۆ مرۆڤان، سالانە مە فاکسین ھەبوون ژ بەر ڤێ نەخوەشیێ نوکە ئەو ژی دێ کەڤیتە د مەترسیێ دا و دناڤ مرۆڤان ژی دا ئەڤ نەخوەشیە بەر بەلاڤ دبیت، ئەڤە نەخوشیەکا ھەڤپشک و مەترسیدارە و ب رێکا شیر و پەنیری دھێتە ڤەگۆھاستن، کونترۆلکرن ل سەر ڤێ نەخوەشیێ مەزاختی دڤێت. .
د.دیار تەیب رێڤەبەرێ ڤێتێرنەریا دھۆک گۆت: ل پارێزگەھا دھۆکێ نێزیکی ملیۆن سەرێ ئاژەلی ھەیە ژ چێل و پەز و بزنی کو خزمەت بۆ دھێنە پێشکێشکرن و ل دووڤ پێداچوون و راپورت و ڤەدیتنا مە پێدڤی ب ملیار و نیڤانە دا کونترۆل ل سەر ئەڤان نەخوەشیان بھێتەکرن. ھەمبەر دەرکەفتنا ئەڤنا نەخوەشیان، گەلەک رێک ھەنە بۆ دەرکەفتنا نەخوەشیان و ھندەک ھەنە خوە جھن ل دەڤەرێ ھەنە و ھندەک ھەنە ل گەل سەقایی دھێنە ڤەگۆھاستن و دەمیً ئاژەل دھێنە ڤاکسیندان ئاژەل بۆ دەمەکی بەرگێریا ڤێ نەخوەشیێ دکەت و دەمێ مە زانی بەرگێریا ئاژەلی ژ نەخوەشیێ کێم بوو پێدڤی یە ئەو ئاژەل بھێتە ڤاکسیندان ڤە، دیسا ھندەک نەخوەشی ھەنە ل گەل سەقای ژ وەلاتێن دەودور دھێن، مەترسی ناکەڤیتە سەر وی ئاژەلی ئەوێ فاکسیندان بۆ دھێنەدان.

سێ پەرلەمانتار دێ چنە دادگەھێ

15/06/2016 11:30

676

ئەڤرۆ نیوز:
ئەندامەکێ لیژنا قانوونی یا پەرلەمانێ کوردستانێ دیارکر، پرسا ھەلگرتنا پارێزبەندیێ لسەر پەرلەمانتاران پرسەکا قانوونیە، چو پەیوەندی ب پارتی دیموکراتی کوردستان ڤە نینە، ھەروەسا دبێژیت، پێدڤیە پەرلەمانتارێن سکالا ل سەر ھاتیە تۆمارکرن، ب چنە بەرامبەری دادگەھێ و نیاز پاکیا خوە لسەر وێ تۆمەتێن سکالا ل سەر ھەی دیار بکەت.
وەزارەتا سامانێن سرۆشتی یا حوکمەتا ھەرێما کوردستانێ سێ سکالایێن قانوونی ل سەر سێ ئەندامێن پەرلەمانێ کوردستانێ تۆمارکرینە، ب تۆمەتا ناڤزڕاندنێ و بەلاڤکرنا زانیاریێن نەدروست، سامانێن سرۆشتی داخواز ژ پەرلەمانێ ھەرێما کوردستانێ کریە، پارێزبەندیێ ل سەر ئەڤان پەرلەمانتاران ھەلگریت ھەتا ب چنە بەرامبەری دادگەھێ و بەلگەیێن خوە بدەنە دادوەری و تۆمەتا ل سەر ب ھێتە ئێکلا کرن، بەرامبەری ڤێ کێشێ ھەرسێ ئەندامێن پەرلەمانی رەتکر ب چنە دادگەھێ و بەرۆڤاژی سامانێن سرۆشتی تۆمەتبار دکەن.
ڤەمان فەیسەل، ئەندامێ لیژنا قانوونی ل پەرلەمانێ کوردستانێ بۆ رۆژناما ئەڤرۆ گۆت: گورەی پەیڕەوێ نافخوەیێ پەرلەمانێ کوردستانێ یێ ھەلبژارتنا پەرلەمانی ل سالا 1992ێ، دو ئالیەت بۆ ھەلگرتنا پارێزبەندیا ل سەر پەرلەمانتاران ھەنە، یا ئێکێ ئینانا وی بابەتیە بۆ پەرلەمانی بێگومان نوکە ژی پەرلەمان کۆمبوونان ئەنجام نادەت، ئەو ئالیەتە یا زەحمەتە بۆ ڤێ قووناغێ، رێیا دوێ ئەوە ددەمێ ب ھێنڤەدانا پەرلەمانیە، دەستھەلاتا سەرۆکایەتیا پەرلەمانیە و دەستەیا سەرۆکایەتیا پەرلەمانی ئەو دەستھەلات ھەنە حەسانێ ژپەرلەمانتاران وەرگرن و پەرلەمانتار ب چیتە بەرامبەری دادگەھێ، واتە دەستەیا سەرۆکایەتیا پەرلەمانی شیان ھەنە پارێزبەندیێ ل سەر ھەر پەرلەمانتارەکی راکەت، و پێڕابوونێن قانوونی ھەمبەر ئەندامێن پەرلەمانی ب ھێنە وەرگرتن.
ڤەمان فەیسەل گۆت ژی: ئەڤە پرسەکا قانوونیە چو پەیوەندی ب پارتی دیموکراتی کوردستان ڤە نینە، وەکی ھندەک پەرلەمانتار دبێژن پارتی پەرلەمان داعویرایە، تنێ پەیوەندی بڤێ چەندێ ھەیە سکالا لسەر ئەڤان پەرلەمانتارا ھاتیە تۆمارکرن، و دڤێت ئەو بەرھەڤی د وان پەرلەمانتاران دا ھەبیت ب چنە ھەمبەر دادگەھێ و ئەو تۆمەتا سکالا ل سەر ھاتیە تۆمارکرن بھێتە ئێکلا کرن، ھەتا نوکە ل ھەرێما کوردستانێ چو رێگرێن قانوونی نەبووینە ھەتا پەرلەمانتار یێ بەرھەڤ نەبیت ب چیتە ھەمبەر دادگەھێ، ھەرچەندە بەرێ پارێزبەندی ل سەر پەرلەمانتاران نەبوویە ، بەلێ پەرلەمانتاران بەرھەڤیا خوە نیشاندایە ب چنە ھەمبەر دادگەھێ بۆ ڤێ ئێکێ نیاز پاکیا خوە نیشانی دادگەھێ بدەن.

ساخلەمیا دھۆکێ بەرھەڤیێن کونترولا نەخۆشیا کولێرایێ دکەت

15/06/2016 11:00

131

ساخله‌مى ساخله‌ميا دهۆكێ — رێڤه‌به‌ريا گشتيا ساخله‌ميا پارێزگه‌ها دهۆكێ

ئەڤرۆ نیوز:
رێڤەبەرێ خوە پاراستنا کاروبارێن ساخلەمیێ ل رێڤەبەریا گشتیا ساخلەمیا دھۆکێ دیارکر، لژنا نەخۆشیا کولێرایی بێ ئمادەبوونا د. نزار عێمەت رێڤەبەرێ گشتیێ ساخلەمیا دھۆکێ و ھەموو دام ودەزگەھێن پەێوەندیدار ل رۆژا 14/6 دەست ب کاری خوە کر.
د. بەختیار ئەمین، رێڤەبەرێ خوە پاراستنا کاروبارێن ساخلەمیێ بۆ ئەڤرۆ دیارکرکو، ڤایرۆسێ کۆلێرایێ سەرێ خوە ھەلدایە ل عیراقێ و ل پارێزگەھا دھۆکێ بەرھەڤیێن باش ھاتینە کرن بۆ نەھێلانا پەێدابوونا نەخۆشیا کۆلێرایێ و چەندین رێنمایێن تایبەت دێ ھێنە دەرئیخستن بۆ پاراستنا وەلاتیان و داخواز دکەن وەلاتی زەرزەواتێ پێس ب کار نەئینن.
ناڤبری ئاشکرا کر ژی نەخۆشیا کۆلێرا گەلەک مەترسیە ل سەر ژیانا وەلاتیان تایبەتی ژی دناڤ کەمپێن ئاواران دا مەترسیا سەرھلدانا نەخۆشیا کولێرایێ ھەیە چۆنکو گەلەک قەرەبالغن وپێدڤی چاڤدیریەکا بەردەوام ھەنە، ھەتا نوکە چو حالەتێن کۆلێرایێ ل دھۆکێ نەھاتینە تۆمارکرن و گەلەک پێرابوونێن توند ھاتینە وەرکرتن بۆ سزادانا وان جھێن نە پاقژ وپێگیریێ ب رێنمایێن ساخلەمیێ ناکەن و رێ و جھێن پێدڤی و دەرمان ھاتینە دابینکرن بۆ کونترول کرنا نەخۆشیێ.
گۆتژی: “ھەموو بیستانین ل بەر ئاڤا پێس ھاتێنە چاندن دێ لایەنێن شولە ژێ خراب کەن و ئاڤا ڤەخۆارنێ دێ ب باشترین شێوە ھێتە تافیلکرن و چاڤدێری کرن و ھەر کێماسیەکا ھەبیت دبیتە مەترسی بۆ سەرھلدانا نەخۆشیا کولێرایێ دێ ب زووترین وەخت ھێتە چارەسەرکرن و کونترول کرن”.
د. بەختیاری ئاشکرا کر ژی ئێکەمین کۆمبوونا رێگری گرتن و نەھێلانا کێماسیان بۆ پەیدابوونا نەخۆشیا کولێرایێ ل دھۆکێ ھاتە کرن دێ بەردەوام چاڤدیرَی و دوڤچوون ھێتە کرن بۆ نەھێلانا سەرھلدانا کولێرایێ.

وەزارەتا ساخلەمیێ گەفا ل دەرمانخانان دکەت

15/06/2016 10:30

150

ئەڤرۆ نیوز:
وەزارەتا ساخلەمیێ یا حوکمەتا ھەرێما کوردستانێ دەربارەی نڤێسینا بھایێ دەرمانان ل سەر پاکیتا دەرمانان ھۆشداریەکا تۆند ددەتە دەرمانخانان و بەرپرسەکێ وەزارەتێ ژی دبێژیت: ب رێیا ئاسایش و پۆلیسان رێیێن قانوونی مەرامبەر وان دەرمانخانان دێ گرینە بەر یێن بریارێ بجە نەئینن.
د. ئارام محەمەد ڕەسول، سەرپەرشتێ رێڤەبەریا ئینان و کۆنترولکرنا دەرمانان ل وەزارەتا ساخلەمیێ یا حوکمەتا ھەرێما کوردستانێ ئاشکرا کر، ل دەستپێکا ئەڤ سالە بھا ل سەر ھندەک جۆرێن دەرمانان ھاتینە نڤیسین، لێ ھەموو جۆرێن دەرمانان نەڤەگرتینە و بۆ SNN گۆت: “ھەتا نوکە بھایێن سێ ھزار جۆرێن دەرمانان ھاتینە دیارکرن، لێ ھژمارەکا زۆر یا دەرمانخانان پێگیری وان بھایان نەبووینە و ل سەر پاکیتێن دەرمانان ئەو بھایێن وەزارەتێ دیارکرین نەنڤێسینە، لەو ئەم نەچاربووین لیستا بھایان رەوانەی پارێزگا و قایمقامان بکەین، بۆ ھندێ ب رێیا ئاسایش و پۆلیسان رێیێن تۆند بگرینە بەر و خودانێ ھەر دەرمانخانەکێ سەرپێچیێ بکەت دێ ھێتە سزادان”.
دەربارەی نڤێسینا بھایێ دەرمانان ژ لایێ کۆمپانیێن دروستکرنا دەرمانان ڤە، سەرپەرشتێ رێڤەبەریا ئینان و کۆنترولکرنا دەرمانان ل وەزارەتا ساخلەمیێ گۆت: “ئەم نەوەلاتین ھەتا کو ب رێیا کۆمپانیێن دروستکرنا دەرمانان بھایان ل سەر پاکیتێن دەرمانان بنڤیسین، لێ ئەم ل دووڤ پیڤەرێن جیھانی بھایان دنڤیسین”.
د. ئارام محەمەد خویا ژی کر، ھەر کۆمپانیەکا دەرمانان دئینیتە ناڤ ھەرێمێ رێ پێ ناھێتە دان ھەتا بھایان ل سەر پاکیتێن دەرمانان بنڤیسیت، پاشی ئەو ب خوە ژی لسقەکا تایبەت ب کوالێتیێ ل پاکیتا دەرمانان ددەن.

پێلەکا باران بارینێ دێ ھەرێمێ ڤەگریت

15/06/2016 10:00

1212

ئەڤرۆ نيوز:
رێڤەبەریا گشتی یا کەشناسی و بیڤەلەرزان ل ھەرێما کوردستانێ د راگەھاندنەکێ دا دیار کر کو ژ ئەگەرێ کارتێکرنا چەند پالەپەستۆیێن نزم بۆ سەر ھەرێمآ، ئەو پێشبینی دکەن پلێن گەرمێ دێ نزم بن و باران ل چەند دەڤەرێن جودا یێن ھەرێما کوردستانێ دێ باریت و کاریگەریا وێ پێلا باران بارینێ ھەتا رۆژا ئەینی دێ یا بەردەوام بیت.
ل دووڤ ڕاگەھاندنا رێڤەبەریا گشتی یا کەشناسی و بیڤەلەرزان ل ھەرێمێ کو دانەک دەست ئەڤرۆ کەفتیە، تێدا ھاتیە: “رۆژا پێنجشەمبی 16/6/2016 ھەرێما کوردستانێ دێ کەڤیتە بن کاریگەریا چەند پالەپەستۆیێن نزم، ژ ئەگەرێ وان ژی ئەسمانێ ھەرێما کوردستانێ دێ بیتە عەور و پلێن گەرمێ ژی نزم بن و باران ل چەند دەڤەرێن جودا یێن ھەرێما کوردستانێ دێ باریت”.
ئاشکرا ژی کریە، د گەل باران بارینێ ئەگەرێ دروستبوونا بریسیان ژی یێ ھەی، ھەروەسا کێمبوون و زێدەبوونا کاریگەریا پالەپەستۆیێن نزم یێن وەرزێ گەرمێ و نیمچە دۆرگا عەرەبی و دەریا سپی یا ناڤەراست دێ بنە ئەگەرێ لەزاتیا بای و د ھندەک دەمان دا دێ گەھیتە پتری 50کم د دەمژمێرەکێ دا، ئەڤە ژی دێ بیتە ئەگەرێ بلندبوونا تۆزێ و پلێن گەرمێ ژی دێ نزم بن.

ئەڤرۆ ھەوەکا مەزن یا پاقژکرنا پارێزگەھا دھۆکێ دێ ھێتە ئەنجامدان

15/06/2016 09:30

197

ئەڤرۆ نیوز:
ب ھەلکەفتا رۆژا جیھانی یا ژینگەھێ بڕیارە ئەڤرۆ 15/6/2016 ھەوەکا پاقژکرنێ ل پارێزگەھا دھۆکێ بھێتە ئەنجامدان، ل دۆر بابەتی دوھی 14/6 ل کوچکا پارێزگەھێ کۆنگرەکێ رۆژنامەڤانی بۆ ھەر ئێک ژ ھاریکارێ پارێزگەرێ دھۆکێ بۆ کاروبارێن تەکنیکی و رێڤەبەرێ گشتی یێ باژێرڤانیان ل پارێزگەھێ ھاتە دەربارەی چەوانیا ئەنجامدانا وێ ھەوا پاقژیێ ھاتە سازکرن.
ئوسمان یونس، ھاریکارێ پارێزگەری بۆ کاروبارێن تەکنیکی د وی کۆنگرێ رۆژنامەڤانی دا دیار کر کو ئەو ھەوە پرۆژێ وەزارەتا باژێرڤانی و گەشت و گۆزارێ یا حوکمەتا ھەرێمێ و رێکخراوا (UNDP) یە کو رۆژەک بۆ پاقژکرنا ھەموو کوردستانێ دانایە و گۆت: “بریاربوو ئەو ھەوا پاقژیێ ل رۆژا جیھانی یا ژینگەھێ 5/6/2016 بھێتە ئەنجامدان، لێ ژ بەر چەند ئەگەرێن تەکنیکی بۆ ئەڤرۆ 15/6/2016 ھاتە پاشئێخستن، مە وەکو کارگێریا پارێزگەھا دھۆکێ ب ھەڤکاری ل گەل رێڤەبەریا گەشت و گۆزارێ، رێڤەبەریا گشتی یا باژێرڤانیا و کارگێریا کەمپان و رێکخراوان ھندەک جە دەستنیشانکرینە و ل وان جھان دێ ھێتە ئەنجامدان”.
ئوسمان گۆتژی: “ھەوا پاقژیا دھۆکێ ل دەمژمێر 9:30 سپێدێ دێ دەست پێ کەت و ھەتا دەمژمێر 12 نیڤرۆ دێ یا بەردەوام بیت، مە بەری نوکە ژی ل رۆژا 4/4/2016 ھەوەکا پاقژکرنێ ل سەرانسەری پارێزگەھێ ئەنجامدابوو، لێ ژبەر گرنگیا رۆژا جیھانی یا ژینگەھێ مە ڤیا پشکداریا ڤێ ھەوێ ژی بکەین”.
ل دور ئەو جھێن ھەوا پاقژیێ دێ لێ ھێتە ئەنجامدان ھاریکارێ پارێزگەری بۆ کاروبارێن تەکنیکی گۆت: “ھەوا پاقژکرنێ ل ھەردو کەمپێن باجد کەندالا ئێک و دو، دیسا کەمپا خانکێ، دەڤەرێن قارقاراڤا و سندۆرێ و دەردورێن گوندێ سێجێ دێ ھێتە ئەنجامدان”.
ژ لایێ خوە ڤە ھەڤال حسێن، رێڤەبەرێ گشتی یێ باژێرڤانیان ل پارێزگەھا دھۆکێ سەبارەت سەپاندنا سزایان ل سەر وان کەسێن پاقژیێ نەپارێزن گۆت: “مە ب رێیا وەزارەتا باژێرڤانی و گەشت و گۆزارێ داخواز ژ جڤاتا وەزیران کریە کو رێنمایان بۆ سزادانا وان کەسێن پاقژیێ نەپارێزن دەربکەت، لێ ھەتا نوکە بەرسڤ نەھاتیە دان، ئەم چاڤەرێ دکەین ھەر دەمێ ب فەرمی بەرسڤ بۆ مە ھات دێ کەڤیتە د وارێ ب جھئینانێ دا”.

ئەلبانیا یا گەشبینە دێ سەرکەفتنێ ل سەر فەرنسا توماربکەت و رومانیا و سویسرا دێ ھەڤرکیەکا دژوار کەن

15/06/2016 02:51

238

ئەڤرۆ:
چاڤەرێ دھێتەکرن ئەڤرۆ دەست ب یاریێن گەرا دوێ یێن قارەمانیا یورو یا ٢٠١٦ بھێنەکرن کو روسیا دێ ل گەل سلوڤاکیا کەت و رومانیا ل گەل سویسرا و فەرەنسا ل گەل ئەلبانیا.
روسیا سلوڤاکیا
روسیا ئەوا د یاریا ئێکێ دا شیای خالەکا گرنگ ب دەستخوڤە ئینای پشتی ل خولەکیێن دووماھیێ شیای گولا وەکھەڤیێ ل سەر ھەلبژارتیێ ئینگلتەرا توماربکەت روسیا ب شارازاھیا خوە دێ بزاڤێ کەت سەرکەفتنێ ل سەر ھەلبژارتیێ سلوڤاکیا توماربکەت ئەوا بۆ جارا ئێکێ یە پشکداریێ کەت کو روسی خودانا چەندین یاریزانێن خودان شیان ل ئورۆپا و یانێن خولا روسی کو دھێنە ھژمارتن یانێن بەرنیاس ل سەر ئاستێ ئورۆپا د ڤێ یاریێ دا روسی ب سەرکەفتنێ دێ رێیا وێ گەلەک باش بیت بۆ دەربازبوونێ.
رومانیا سویسرا
د یاریا دوێ ژ قارەمانیا یورۆ ئەوا بریارە ل دەمژمێر حەفت بھێتەکرن دێ ھەڤرکیەکا دژوار دناڤبەرا ھەردو ھەلبژارتیان دا ھەبیت ژبەرکو رومانیا یا بریندارا پشتی خوسارەتیا ل گەل فەرەنسا و ھەلبژارتیێ رومانیا ب ھەر ئەنجامەکێ نە چاڤەرێکری دێ دەلیڤەیا وێ بۆ دەربازبوونێ ھەتا رادەیەکێ مەزن یا ب زحمەت بیت، بەرامبەر سویسرا ب دو خالان ژ دو یاریێن بھێت دێ دەربازبوونا خوە مسوگەر کەت ھەتارادەیەکێ مەزن لەورا د یاریا ئەڤرۆ دا چو گڤاشتن ل سەر وێ نابن وەکو رومانیا لێ سویسرا ژی خودانا ھەلبژارتیەکێ خودان شیان و یاریزانێن بەرنیاس ل سەر ئاستێ ئورۆپا ھەنە و مێژویا یاریێن ھەردو ھەلبژارتیا بتنێ دو جاران ھەمبەری ئێک کری یە ئەوژی ھەر ھەلبژارتیەکی سەرکەفتنەک ھەیە .
فەرەنسا ئەلبانیا
یاریا سیێ و دووماھیێ ژ رۆژا شەشێ ژ قارەمانیێ دێ دناڤبەرا مێڤانداریا قارەمانیێ ھەلبژارتیێ فەرەنسا و ئەلبانیا ھێتەکرن کو مێڤاندارا قارەمانیێ دھێتە ھژمارتن ئێک ژ بەربژارێن ب ھێز بۆ برنا ناسناڤی لێ ئاستێ وێ د یاریا ئێکێ دا نە ل دیڤ ئارمانج و حەزا جەماوەرێ فەرەنسی بوون، بۆ یاریا ئەڤرۆ ئەڤ شەڤە راھێنەرێ وێ دیدی دیشامپ دیارکری یە فەرەنسا بۆ یاریا ئەڤ شەڤە دێ یا چیاواز بیت ژ یاریا ئێکێ ل ھەر قارەمانیەکێ دا یاریا ئێکێ ژ یاریێن ب ھێز دھێتە ھژمارتن و ب رس یاری ھێنەکرن لەورا بۆ یاریا ئەلبانیا ئەوان شێوازەکێ باش و ھەیە، بەرامبەر راھێنەرێ ئەلبانیا دیارکریە ئەو گەلەک شانازی ب ھەلبژارتیێ خوە بەت سەرارای خوسارەتیا ئێکێ د قارەمانیێ دا و سەرکەفتن ل یاریا ئەڤ شەڤە بەرامبەر فەرەنسا یا ب زحمەت نەبیت و ئەوان بەری نوکە ژی ل دو سالێن بوری دو یاری ھەمبەری فەرەنسا کری نە د ھەردو یاریێن خوە دا توشی خوسارەتیێ نەبووینە ل سالا ٢٠١٤ وەکھەڤ بوون ل یاریا دووماھیێ ل سالا بوری شیابوون سەرکەفتنێ ل سەر فەرەنسا توماربکەن .

نيشاندان 1...1,000 2,000 2,9902,9912,992 3,990...4,558 زێده‌تر

لاپه‌ر 2,991 ژ 4,558