ئەڤرۆ، ئەمیر ئەترووشی، لەزگین جوقی:

بەرپرسێ کەمپان ل پارێزگەھا دھۆکێ راگەھاند، نھا ١٦ کەمپ ل پارێزگەھا دھۆکێ بۆ ئاوارەیان دھێنە دانان و پتریا وان ل قەزا سێمێلێ نە و دو ژ وان کەمپا ھەتا نوکە ب دووماھی ھاتینە و ھندەک ژی پشتی جەژنێ و ھندەک ل ١/١١ دێ ب دووماھی ھێن و گۆت: ھەتا ئەڤ کەمپە ھەموو ب دووماھی دھێن دێ شێین نێزیکی ٤٠ ھزار ئاوارەیان حەوینین.

 ئاوارەیێن ل پارێزگەھا دھۆکێ دژین پتریا وان د ناڤ قوتابخانەیان دا دژین د رەوشەکا باش دا نینن، سەرەرای ھندێ کو نھا بۆ وان خۆشترە ژ وێ یەکێ ل بن خیڤەتا بژین، بەلێ پتریا وان ژی د بەرھەڤن بۆ بەردەوامیدانا خواندنا قوتابیان جھێن خوە بھێلن و بەر ب کەمپا بچن.

خدر حەمو، ئێک ژ ئاکنجیێن قەزا شنگالێ د ناڤ قوتابخانەکێ دا دژیت بۆ ئەڤرۆ دیار کر، نھا ئەو د ژوورا قوتابخانەکێ ڤە دژین و ئەو ١١ کەس د ئێک ژوور ڤەنە و رەوشا وان یا باش نینە، بەلێ د سەر ھندێ ری ژ بەر رەوشا خواندنێ د بەرھەڤن جھێ خوە نەخۆشتر لێ بکەن و بچن ل بن خیڤەتەکێ ڤە بژین و ژیانا خوە ببەنە سەر.

ئدریس نەبی، بەرپرسێ کەمپان ل پارێزگەھا دھۆکێ بۆ ئەڤرۆ دیار کر، بەری نوکە ١٤ کەمپ دھاتنە دانان، بەلێ نھا دو کەمپێن دی ژی زێدەبووینە و بووینە ١٦ کەمپ نھا دھێنە ئاڤاکرن و ھەتا نھا ب تنێ دو ژ وان ب دووماھی ھاتینە، پتریا ڤان کەمپان ل قەزا سێمێلێ کو شەش کەمپن نە و سێ ل زاخۆ و یێن دی ل دھۆکێ و دەوروبەران و گۆت: رەنگە ئەڤ ١٦ کەمپە بشێن دۆرێن ٤٠ ھزار خێزانان ب حەوینن.

بەرپرسێ کەمپان ل پارێزگەھا دھۆکێ نە ڤەشارت، ئەڤ ھەر ١٦ کەمپە تێرا ھەموو ئاوارەیان ناکەن و ئاوارە ژ ٤٠ ھزار خێزانان پترن، چونکو نێزیکی ٧٨ ھزار خێزانان ل دھۆکێ ھەنە، بەلێ ئەم ھوسا دبینن گەلەک ئاوارە ھەنە ل دەڤ ناسیارێن خوە نە یان ژی بۆ خوە شووقە و خانی کرێ گرتینە و گۆت: رەنگە ٥٠% ژ وان ئاوارەیان بچنە د ناڤ ڤان کەمپان دا و یێن دی بمیننە ل جھێ خوە.

ئدریس نەبی نەڤەشارت کو راستە ھەتا نوکە ب تنێ دو کەمپ ب دووماھی ھاتینە، بەلێ ھەتا پشتی جەژنێ دێ ھندەک کەمپێن دی ژی ب دووماھی ھێن و ھندەک کەمپا ژی کو پتریا وانە دێ ل دەستپێکا ھەیڤا ١١ ب دووماھی ھێن و ئاوارە چنە تێدا، کتەکا کێم نەبیت ژ کەمپان رەنگە ھەتا ١٥/١١ ب دووماھی بھێن و گۆت: ئەم ل وێ باوەرێ نە کو ل ١/١١ دێ پتریا قوتابخانان ھێنە ڤالاکرن و قوتابی چنە تێدا دخوینن.

ئاشکرا ژی کر کو پتریا ڤان کەمپان ب خیڤەتان دھێنە چێکرن و ب تنێ کەمپەک تێ نەبیت کو ب کەرەڤانێ دھێتە چێکرن و گۆت ژی: ھەر ل رۆژێن دەستپێکێ ژ ئاوارەبوونا خەلکی بۆ دھۆکێ، مە دەست ب چێکرنا کەمپا کریە، بەلێ چێکرنا وان یا ب ساناھی نینە، لەوما ھوسا دەمی ڤەدکێشیت.

خویاژی کر کو ئەڤ کەمپێن دھێنە چێکرن پتریا خزمەتگۆزاریا تێدا ھەنە و ئاڤ و کارەب و جادە ھەموو دێ ھێنە چێکرن.