ئۆسامە عەلی: نەبوونا گیانێ هەڤڕكیێ ئەگەرە بۆ ئەنجامێن لاواز یێن تیمێ
د دیدارەكێ دا هاریكارێ ڕاهێنەرێ یانەیا زاخۆ ئۆسامە عەلی دەستێ خوە دانا سەر برینا تیما فوتبۆلا یانەیێ د خولا ستێرێن ئیراقێ دا و دیاركر یاریزانی گیانێ هەڤڕكیی بۆ سەركەڤتنان نینە و ئەو هیڤی و ئۆمێد بۆ باشتركرنا ئاستێ خوە نەمایە.
زێدەتر ناڤهاتی گۆت: تیما زاخۆ ژ هەژی ڤان ئەنجامێن لاواز و ڕێزبەندییا خراب نینە، ژبەركو خودان جەماوەرەكێ مەزنە و پشتەڤانییەكا باش بۆ دهێتە كرن، ئەم داخوازا لێبۆرینێ ژ پشتەڤانان دكەین ژبەر ئەڤان ئەنجامێن لاواز، ب مخابنی ڤە یاریزانێ مە ئەو هیڤی و گیانێ هەڤڕكیێ دناڤ یاریگەهێ دا نینە كو تیما خوە بەر ب سەركەڤتنێ ببەت، لەوما ژی تیما مە كەڤتیە د حالەتەكێ نە جیگیر ژلایێ دەرۆنی و ئاست دا، سەرباری بزاڤێن مە و یێن كارگێریێ ژبۆ باشتكرنا سەقایێ تیمێ.
هەروەسان ئۆسامە عەلی گۆت: دبیت هندەك ئەگەرێن دی ژی هەبن كو ئاست و ئەنجامێن تیمێ د خراب بن ژوانا یاریزان ئەو هزر دكەن كو ڕێزبەندییا تیمێ یا چو گوهۆڕینان د پێشكەڤتنا وێ بۆ هەڤڕكییا ناسناڤی ناكەت تایبەت پشتی ژ دەستدانا كۆپا كەنداڤی، هەروەسان وەرگرتنا كارتێن سۆر ئێك ژ خالێن نەرێنی بوو دگەل تیمێ دا، ئەڤە ژی هزرەكا خەلەتە و چەندین جاران مە داخواز ژ یاریزانان كرییە بتنێ بۆ سەركەڤتنێ یاریێ بكەن و هزرا چو رێزبەندیا نەكەت ژبەركۆ پشتەڤانێن زاخۆ ژ هەژی سەركەڤتنانە.
ژلایەكێ دووڤە ناڤهاتی گۆت: بۆ یاریێن داهاتی دڤێت ئێدی پشت گەرمیێ ب كۆمەكا یاریزانێن گەنج ژی بهێتە دان وەكو دەلیڤەیەك بۆ وان ئەو رۆلێ خۆ ببینن بۆ یاریێن مایی، زاخۆ ژ هەژی ئەنجامێن سەركەڤتی و دەستكەڤتانە.
