كارگەهەكا ڕیسایكلینككرنا پلاستیكی ل كواشێ هاتـە ڤەكـرن
ب ئامادەبوونا د. عەلی تەتەر، پارێزگارێ دهۆكێ و قونسلێ گشتی یێ هۆلەندا ل هەرێما كوردستانێ و هژمارەكا بەرپرسێن دام و دەزگەهێن جودا، دوهی 14/10/2026 كارگەهەكا تایبەت یا ڤەگەڕاندنا پلاستیكی بۆ دوبارە بەرهەمئینانا هندەك كەرەستەیێن جودا ل سنۆرێ دەڤەردارییا سێمێلێ ل ڕێڤەبەرییا كارگەها جوداكرنا بەرمایكان ل كواشێ هاتە ڤەكرن.
د كۆنگرەكێ رۆژنامەڤانی دا پارێزگارێ دهوكێ و قونسلێ گشتی یێ هۆلەندا و ڕێڤەبەرێ گشتی یێ باژێرڤانییان و ڕێڤەبەرێ پڕۆژەیێ ناڤبری بەحس ل گرنگییا ڤێ كارگەهێ بۆ بەرهەمئینانا بەرهەمێن جودا و بهێزكرنا رەوشا ئابووری و دابینكرنا دەلیڤەیێن كاری و باشتركرنا خزمەتگوزاریێن باژێرڤانیێ و پاراستنا ژینگەهێ و مفا وەرگرتنێ ژ بەرمایكان كر و دەستخۆشی ل ڕێكخەرێن دانانا كارگەهێ هاتە كرن.
د چارچۆڤەیێ ڤەكرنا كارگەها ناڤبری دا ئامادەبوویان سەرا كارگەها چێكرنا كۆمپوستی دا، كو ئێكە ژ كارگەهێن گرنگێن پارێزگەها دهۆكێ بۆ پاقژڕاگرتنا ژینگەهێ و مفا وەرگرتنێ ژ بەرمایكێن كەسكاتی و هشك و چێكرنا كۆمپوستەكێ باش بۆ پێكهاتەكا زەنگینا ئاخێ و كەرتێ چاندنێ.
