بادین و نامۆ سمبۆلێن پەیاما نەتەوەیی نە
ئیحسان حەسەن
سەركەڤتنا هەر دو قارەمانێن كورد بادین حەسۆ دمەیدانا پیشەكاریا بۆكسانێ دا و نامۆ فازل دجیهانا وەرزشا بەرگیری و شەرێ تێكەل دا(MMA)، لسەر ئاستێ ئەوروپا و جیهانێ، ئەو ناڤودەنگییا ڤێ داویێ وەرگرتین، تنێ دەربرینێ ژ دەستكەڤتەكا وەرزشی ناكەن، بەلكو گرنگییا ڤان سەركەڤتنان دچەند رەهەندێن جیواز یێن سیاسی و كومەلایەتی و نەتەوەییدا بۆ گەلێ كورد نەتنێ ل هەرێما كوردستانێ بەلكو لسەر ئاستێ جیهانێ دیاردكەن ژبەر ڤان هۆكاران، یا ئێكێ و سەرەكی پێدڤی یە هەر كوردەكێ ل جیهانێ شانازیێ پێ بكەت ئەوە، بابەتێ بلندكرنا ئالایێ پیرۆزێ كوردستانێ و ژەنینا سرۆدا نەتەویی ئەی رەقیبە، ئەوا ئەڤ هەردو قارەمانە ب وی مۆرالا مەزن ددیدارێن خوە دا دڤان رەنگە یاریاندا دیاردكەن، ئەڤە دبیتە رەنگدانەڤەیا ناسنامەیا مللەتێ مە، كو ناسنامەیەكا زیندییە و چ جاران چۆكی بۆ چ بەربەست و ئاستەنگان دانانن و بێ هیڤی نابن، یا دویێ پێشكێشكرنا دۆزا رەوایا گەلێ كورد و ناڤێ كوردستانێ دخول و قارەمانیێن جیهانی یێن مەزندا، دیسان دمیدیایێن جیهانی بلند دكەت، ئەڤە ژی كاریگەرترین دیبلۆماسیەتا وەرزشی یە، یا سێیێ دێ بیتە هۆكارەك كو نێریا گشتی یا جڤاكێن ئۆرۆپایێ بەرامبەر ڕەڤەندا كوردی و شیانێن كوردان دمەیدانێن وەرزشی بكوهۆریت، یا چارێ دێ دبیتە پالدەرەكێ دەروونی بۆ گەنج ولاوێن مە دناڤا كوردستانێ دا كو هەست ب شانازیێ و باوەری بخۆبوونێ بكەن، بۆ هندێ ئەوژی ل پاشەرۆژێ بگەهنە پلێن سەرفەرازیی و ئارمانجێن خوە یێن وەرزش لسەر ئاستێ دەولەتی بجهبینن، یا پێنجێ سەركەڤتنا وەرزشڤانێن كورد دێ بیتە رێكخوشكەر كو ل پاشەرۆژێ سەرنجا رێكخراوێن دەولەتی و كومپانیان بگێشن كو بهێنە كوردستانێ و پتر باوەریێ ب هێز و شیانێن وەرزشڤانێن كوردستانێ بینن، ئەڤ چەندە دێ بیتە دەرگەهەكێ باش بۆ پشتگیریا داراییا نافخۆ، یا شەشێ ژهەمییا گرنكتر ئەڤان دەستكەڤتان وەكریە كو پووتەدان و پێشگێریا بەردەوام یا سەركردێن هەرێما كوردستانێ یێن حكومی و حزبی دریێا پەیامێن فەرمی یێن پیرۆزباهییێ و پێشوازیا شاهانە لڤان قارەمانان ل فرۆكخانە و دیوانێن فەرمی یێن هەرێمێ بكەن، وەكو كێمترین وەفاداری بۆ ڕەنج و ماندیبوونا وان دمەیدانێن وەرزشیدا، بێگۆمان ئەڤە ژی هاندەرەكێ هەرە مەزنە و پەیامەكە بۆ وان كو ئەو ب تنێ نینن و مللەتێ وان ب هەموو تەخ و توێژێن خوە ڤە ل پشت وانن، یا من دڤێت بیژم ئەوا ڤان هەردو قارەمان دناڤا جەركێ وەلاتێن ئۆرۆپایێ دا كری و دكەن، راستتیەكێ دیاردكەت كو شیان و پێچێبوونێن تاكێ كورد د بێ سنۆرن، نە پشتەڤانیا كێم و نەژی رەوشا دژوار نابنە رێگر بەرامبەر بجهئینانا هیڤیان و گەهشتنا وان ب گوپیتكێ، ئەڤرۆ ب ڕێیا وەرزشێ شیاینە بهێز دەرگەهێن جیهانێ بقوتن، ببنە نموونێ وەرزشڤانێن چەلەنك و زیرەك و ناڤێ مللەتێ خوە لسەر بەرپەرێن دیرۆكێ تۆماربكەن.
