بزاڤ كرینە مۆزیكا رەسەن ل گەل شێوازێ نوو تێكەل بكەت
زنار تۆڤی
سترانبێژ (حەسەن غەریب) د دیدارەكێ دا بۆ رۆژنامەیا ئەڤرۆ گۆت: من مفا ژ تەكنولۆجیا نوو وەرگرتیە، بەلێ هەردەم من بزاڤكریە رەسەناتیا مۆزیكا جاران ل گەل شیوازێ نوو تێكەل بكەم، ل سالا 1985، ئێكەم ژڤانێ من یێ هونەری بوو، دەمێ من ل گەل مامۆستا (عارف ژەنیار) كار دكر، كو مامۆستایێ كەمانچێ و عودێ بوو، ئەو گەلەك پشتەڤانێ من بوو، هەروەسا ل وی سەردەمی تیپەكا شەرقی ب ناڤێ (قیسارە) هەبوو ب سەرپەرشتیا مامۆستا (محەمەد خزر) من چەندین ئاهەنگ ل گەل وان ئەنجام دان.
هەروەسا گۆت: سترانا بارگەی خەم كو ژ هۆزان و ئاوازا من بوو، ل سالا 2001 من بۆ هونەرمەند (ناسر رەزازی) فرێكر، پشتی زڤڕینا ناسری بۆ كوردستانێ، ل گەل هۆزانڤان ئەحمەد محەمەد رێككەفتن كو كۆپلا ئێكێ یا سترانێ بهێتە هەلبژارتن و دو كۆپلین دی بۆ بهێنە زێدەكرن، لەوما ئەو سترانە ب دەنگی وی بوویە ئێك ژ جوانترین سترانان، من مفا ژ تەكنولۆجیا نوو وەرگرتیە، بەلێ من بزاڤكریە رەسەناتیا مۆزیكا جاران ل گەل شێوازێ نوو تێكەل بكەم، هەروەسا مۆزیكا كوردی ل دەمێ بۆری تیپێن ب ناڤودەنگ وەك (مەولەوی، باوەجی، تیپا دهۆك) هەبوون، بەلێ ئەڤرۆ ژ ئەگەرێ كارتێكرنا مۆزیكا بیانی (توركی، فارسی، عەرەبی و ئازەری)، مۆزیكا كوردی بەر ب بەرزەبوونێ ڤە دچیت، هەروەسا هەلبەستا جوان ل هەر دەمەكی دشێت ببیتە هێڤێنێ سترانێ، ب مەرجەكی ئاواز و دەنگەكێ باش ل گەل بن، بۆ زانین من پرۆژەكێ نوو هەیە بۆ تۆماركرنا ئەلبۆمەكێ ب هاریكاریا هەڤالێن خۆ و (شاهۆیێ سازێ) كو دێ چەند بەرهەمێن كەڤن و نوو ب خۆڤە گریت.