بەشێ رەوشەنبیری و راگەهاندنا پارتی دیمۆكراتی كوردستان رێز ل هەلبەستڤان (محسن قۆچان)ی گرت
شاكر ئەتروشی و سندس سالح:
بەشێ رەوشەنبیری و راگەهاندنا پارتی دیمۆكراتی كوردستان، دوهی رۆژا ئێكشەمبی، رێكەفتی 7/6/2026 د دئاهەنگەكا تایبەتدا رێز ل هوزانڤانێ ناڤدارێ كوردستانێ (محسن قۆچان) هاتە گرتن و هژمارەكا بڕگەیان هاتنە پێشكێشكرن، هەروەسا دووماهی دیوانا وی یا شعری ئەوا ل ژێر ناڤێ (گژلۆك كچەكا قشتالی یە) كو ژ ژ( 35) شعر و (112) بەرپەران پێك دهێت و ژلایێ بەشێ رەوشەنبیری و راگەهاندنا پارتی دیمۆكراتی كوردستان ڤە هاتیە چاپكرن، ل سەر بەرهەڤبوویان هاتە بەلاڤكرن، ئەو چالاكی ل دەمژمێر (6) ئێڤارێ ل باغچێ ئێكەتیا نڤیسەرێن كورد/لقێ دهۆكێ هاتە گێڕان.
ل دەستپێكێ بەرێز(د. سالارعوسمان) بەرپرسێ بەشێ رەوشەنبیری و راگەهاندنا پارتی دیمۆكراتی كوردستان، د پەیڤەكێ دا گۆت: ل رۆژا 1/3 یا ئەڤ سالە من و هندەك هەڤالان سەرەدانا مالا هوزانڤانێ ناڤدارێ كوردستانێ (محس قۆچان) و ژ نێزیك گوهداریا وی كری، چنكو وەك بەشێ رەوشەنبیری و راگەهاندنا پارتی ئەم ب ئەركێ خۆ دبینین سەرەدانا كەسێن داهێنەر بكەین چ وەكو هەلبەستڤان یانژی هونەرمەند و رۆژنامەڤان و ماموستا (محسن) ژی ئێك ژ وان هەلەستڤانانە كو هەتا نوكە (17) پەرتووك چاپكرین و هژمارەكا دی ژی ل بەر چاپێ نە و ئەركێ مە یە ئەم خزمەتا وان بكەین، هەروەسا دوێ سەرەدانێ دا مە سۆز دا بوویێ كو پەرتووكا وی چاپ بكەین و ئەڤە مە سۆزا خۆ بجه ئینا وی و پەرتووكا وی یا هەلبەستان (گژلوك كچەكا قشتالی) یە هاتە چاپكرن و ب دیاری دێ پێشكێشی هەوە كەین.
د دووڤدا هەلبەستڤانێ ناڤدارێ كوردستانێ (موئەیەد تەیب) كو ئێك ژ هەڤالێن نێزیكێن (محسن قوچان) چەندەكێ ل سەر كەسایەتی و هەلبەستێن قۆچانی ئاخفتن، د دووڤدا دو ستران كو ژ پەیڤێن (محس قۆچان) بوون، ژلایێ هونەرمەند (جەگەرخوین ئامێدی) وەك ستران هاتنە گۆتن.
پاشان هەلبەستڤان (محسن قۆچان) پەیڤەك خواند و د ئێكەم ئاخفتن دا گۆت (هەكە پەڕ ب منڤە هەبان دا ئەڤرۆ ژ كەیفادا فڕم) و سوپاسیا بەشێ رەوشەنبیری و راگەهاندنا پارتی كر بو رێكخستنا ڤێ رێزلێنانێ و گۆت (پارتی سەلماند كو هەردەم خۆ ل كەسێن خۆ دكەتە خودان).
د برگا دووماهیێ ژی دا چەند خەلات و قەفتێن گولان پێشكێشی قۆچانی هاتنە كرن، ل بەراهیێ ژی خەلاتێ (د.سالار عوسمان) بەرپرسێ بەشێ رەوشەنبیری و راگەهاندنا پارتی و خەلاتێن ( مەكتەبا رێكخستنا پارتی ل دهۆكێ، تەحسین دۆلەمەری ئەندامێ بەشێ رەوشەنبیری و راگەهاندنا پارتی و ناڤەندا خانی یا رەوشەنبیری و راگەهاندنێ و د. ئیبراهیم ئەحمەد سمۆ ئەندامێ بەشێ رەوشەنبیری و راگەهاندنا پارتی و دهۆك تیڤی و گۆڤارا مەتین و ئێكەتیا نڤیسەرێن كورد و سەندیكایێن هونەرمەند و رۆژنامەڤانان و ئنستیۆتا كەلەپۆرێ كوردی، بورهان زێباری، شەعبان سلێمان و بنەمالا (محسن قۆچانی) پاشی ئیمزا ل سەر پەرتووكا وی هاتە كرن و ب دیاری دا بەرهەڤبوویان.
