بەلگە فلمەكێ كوردی خەلاتەك ل ئەمریكا وەرگرت
زنار تۆڤی
بەلگە فلمێ (باسكێن سترانبێژان) كو ژ دەرهێنانا (هێمن خالد) ییە، د ناڤبەرا پتر ژ هزار و 100 فلمێن پشكدار د فەستیڤالا بناڤودەنگا فول فرێم دا ل وەلاتێ ئەمریكا خەلاتێ باشترین ئێكەم فلمێ درێژ بدەستڤە ئینا، كو پێشتر ئەڤی بەرهەمی خەلاتێ باشترین بەلگە فلمێ ئاسیای د فەستیڤالا نیڤدەولەتییا (بوسان) دا بربوو، كو ب (ئۆسكارا ئاسیا) دهێتە نیاسین، ب ڤێ سەركەفتنێ ژی ئەو بەلگە فلمە شیا سەرنجا رەخنەگر و فەستیڤالێن جیهانی بۆ خۆ رابكیشێت.
دەرهێنەر (هێمن خالد) دبێژیت: ئەڤ سەركەفتنە بوویە ئەگەر كو ئەز وەك دەرهێنەرەكێ گەنج و سەركەفتی د سینەمایا جیهانی دا بهێمە نیاسین، هەروەسا ئەڤ فلمە شیا دەرگەهەكێ فەرهەنگی یێ نوو ل كوردستانێ بەرەف جیهانێ ڤەكەت و تێدا مرۆڤێ كورد، ب تایبەتی ژنا كورد، وەك كەسەكا هشیار و هەستیار بەرامبەر ژینگەهێ نیشان بدەت، روودانێن وی بەلگە فلمی ل گوندێ (دەرەتفێ) یێ سەر ب باژێرێ مەریوان ڤە رووداینە، كو خەلكێ وی گوندی ل گەل هژمارەكا زۆرا حاجی لەقلەقێن سپی پێكڤە دژین و چیرۆكا ڤی بەلگە فلمی بەحسێ ژیانا پیرا خەجێ دكەت، كو ژنەكا دانعەمرە و ئەڤ 64 سالە د ژیانا هەڤژینیێ دا ل گەل هەڤژینێ خۆ یێ 100 سالی دژیت، هەروەسا مژوولی چارەسەركرنا ملێ حاجی لەقلەقەكا بریندارە داكو زوو ساخ ببیت و ل گەل هەڤالێن دی كۆچ بكەت، هەڤدەم (پیرا خەجێ) یا دلگرانە ژ كچا خۆ كو وێ بڕیاردایە بەرەڤ ئورۆپا كۆچ بكەت و بچیتە ل دەڤ هەڤژینێ خۆ، ئەڤ فلمە بزاڤەكا مرۆڤانە و بێی پیشوەخت حوكمدانە بۆ نیشاندانا پرسا كۆچكرنێ و ژیانا گوندی، كو بەرهەمئینانا ڤی بەلگە فلمی چار سالان ڤەكێشایە، هەروەسا باسكێن سترانبێژا ئێكە ژ فلمێن دیار یێن ئەڤ سالە یێن فەستیڤالێن مەزن یێن جیهانی، كو دەرفەتەكا نوو بۆ بینەرێن جیهانی پەیداكریە داكو شارەزایی دیتنێن جودا بۆ بابەتێ كۆچكرنێ و مانێ ببن.
