تایبه‌تمه‌نده‌كا نه‌خوشیێن ده‌روونی: درامایا بیانی كارتێكرن ل ده‌روونێ تاكێ كورد كریه
ئه‌ڤرو، ئاواز یوسف:
جڤاك ب گشتی سه‌ح دكه‌نه درامایێن بیانی و ئه‌ڤه بویه دیارده‌كا به‌ربه‌لاڤ د ڤی ده‌رباری دا ڤه‌كوله‌ره‌كێ جڤاكی دیار كر كو ئه‌گه‌رێ ڤێ چه‌ندێ ڤه‌دگه‌ریت بو نه‌بونا درامایا ناڤخویی یا پێشكه‌فتی و ئارمانجدار كو ئاریشێن خه‌لكه‌كی چاره‌سه‌ر بكه‌ن، ژبه‌ر هندێ جڤاك په‌نایێ بو درامایێن بیانی دبه‌ت.
سه‌باره‌ت كارتێكرنا درامایێن بیانی ل سه‌ر جڤاكی ئێحسان دێركی ڤه‌كوله‌رێ جڤاكی دا زانین كو هه‌كه ئه‌م درامایان پولین بكه‌ین مه درامایێن باش و خراب هه‌نه درامایا باش ئارمانجا وێ چاره‌سه‌ركرنا ئاریشه‌كا جڤاكیه یان نیشتیمانی و ب رێیا وێ درامایێ ئارمانجا خوه گه‌هاندیه و گۆت: (هه‌روه‌سا گه‌له‌ك جاران درامایا بیانی ڤیانا وه‌لاتێ خوه دیار كریه دناڤ جڤاكه‌كی دا ئه‌گه‌ر مه ڤیانا درامایه‌كا بیانی دیت بیت پێگیری كرنا وان ب ئاخا وان یان ب داب و نه‌ریتێن وان خوه گوریكرنا وه‌لاتێ وان بو مه دبیته هاندانه‌ك كو ئه‌م ژی مفایه‌كی ژێ ببینین كو ئه‌م بێژین ئه‌ڤه درامایه‌كا مفاداره).
ڤه‌كوله‌رێ جڤاكی ئه‌و چه‌نده ژی دیار كر كو د به‌رامبه‌ر دا مه درامایا باش هه‌یه و دراما هه‌نه ژی خرابیێن خوه هه‌نه وه‌كی درامایێن توركی، عه‌ره‌بی، هندی، لوبنانی.. و گۆت: (مه درامایا باش و ناڤنجی و خراب هه‌یه سه‌ره‌رای كو درامایا خراب ل گه‌ل جڤاك و كه‌لتورێ مه ناگونجیت، ژبه‌ر داب و نه‌ریتێن وان یێن سه‌یر و سه‌مه‌ر دناڤ درامایێ دا و نیشاندانا وان دیمه‌نێن نه جوان یێن دناڤ درامایێ دا و كریارێن وان ل گه‌ل جڤاكێ مه دا ناگونجن و كارتێكرنه‌كا خراب ل سه‌ر هه‌یه).
دێركی ئه‌و چه‌نده ژی دیار كر كو گه‌له‌ك كه‌س هه‌نه چاڤلێكرنا درامایێن خراب دكه‌ن چ دیاردا خوه كوشتنێ یان كوشتنێ بیت یان ژی مه‌ی ڤه‌خوارن و بكارئینانا ماددێن هوشبه‌ر و ئه‌ڤه دبیته ئه‌گه‌رێ كارتێكرنه‌كا خراب د جڤاكی دا و گۆت: (هه‌كه مه درامایا ناڤخویی و پێشكه‌فتی و ئارمانجدار یا كو بینه‌ری بخوه‌ڤه گرێ دده‌ت و ئاریشێن جڤاكی چاره‌سه‌ر دكه‌ت هه‌با، خه‌لكه‌كی په‌نا بو درامایا بیانی نه‌دبر د جڤاكێ مه دا گه‌له‌ك خێزان هه‌نه سه‌ح دكه‌نه سێ هه‌تا چار درامایان د ئێك رۆژ دا).
د. وارژین یاسین تایبه‌تمه‌ندا نه‌خوشیێن ده‌روونی سه‌باره‌ت بابه‌تی دیار كر كو درامایا بیانی یا بویه ئه‌گه‌رێ تێكچونا ده‌روونێ تاكێ جڤاكی كورد و رێژه‌كا زور یا خه‌لكی یێن ب درامایان ڤه هاتینه گرێدان و هه‌ستێن نه‌خوش ل ده‌ڤ بینه‌ری په‌یدا دبن، بیرا وان ل هنده‌ك كاران دئینن كو د ژیانا وان یا راستی دا روودا بیت).
دكتورایێ نمونه‌ك ئینا و دیار كر، بو نمونه ئاریشێن خوینداریێ یان ئاریشێن خوه كوشتنێ یان خیانه‌تێ نابیت بهێنه نیشان دان، هه‌روه‌سا نابیت ده‌زگه‌هێن مه یێن راگه‌هاندنێ د درامایان دا دیمه‌نێن توندوتیژیێ و زولم زورداریێ و دیمه‌نێن نه‌جوان په‌خش بكه‌ن و گوت: (ژبه‌ر داب و نه‌ریتێن جڤاكی نابیت هه‌موو جورێن درامایان بهێنه نمایشكرن ل سه‌ر كه‌نالێن كوردی گه‌له‌ك كه‌سێن دانعه‌مر هه‌نه وه‌سا هزر دكه‌ن كو دراما راستیه‌كه و ده‌مێ دبینیت كه‌سه‌ك د درامایێ دا دهێته كوشتن هه‌ستێن نه‌خوش ل ده‌ڤ په‌یدا دبن و ژلایێ ده‌روونیڤه تێك دچن
د. وارژینێ هنده‌ك رێیه چاره‌سه‌ری پشنیار كرن و گۆت: (دڤێت ده‌زگه‌هێن مه یێن راگه‌هاندنێ درامایه‌كا خێزانی په‌خش بكه‌ن كو خێزان هه‌موو سه‌خ بكه‌تێ و مه گه‌له‌ك خێزان هه‌نه د جڤاكێ دا ژ زاروكی هه‌تا مه‌زنی سه‌ح دكه‌نه درامایێن بیانی، ئه‌ڤجا چ درامایا توركی بیت یان یا عه‌ره‌بی و گه‌له‌ك دیمه‌نێن نه ژ هه‌ژی د درامایێ دا هه‌نه و نابیت نه زارۆك نه مه‌زن سه‌ح بكه‌نه ڤێ جوره درامایێ داكو چ هه‌ستێن نه‌خوش ل ده‌ف په‌یدا نه‌بن و چاڤ لێكرنا درامایێن بیانی یا بویه دیارده‌كا به‌ربه‌لاڤ د جڤاكی دا).
