حەسەن شەریفی كلیپا (سینگ و پۆستال) بەلاڤكر
شاكر ئەتروشی
نووترین بەرهەمێ هونەرمەندێ پێشمەرگە (حەسەن شەریف) كو ئەو ژی كلیپەك بوو ب ناڤێ (سینگ و پۆستال) دوهی 25/4/2026 ل هولەكا مۆلەكا دهۆكێ، بۆ جارا ئێكێ بۆ هژمارەكا هونەرمەند و مەدیاكار و دەرهێنەر و نڤیسەران، هاتە نیشادان و پشتی نیشادانێ كۆنگرەیەكێ رۆژنامەڤانی ل دۆر وێ كلیپێ هاتە گێڕان.
ل دەستپێكێ هەلبەستڤان (موئەیەد تەیب) كو پەیڤێن وێ سترانێ (ئەو سینگ بەری چاردە سالان) یێن وی نە، بەحسێ وی سەردەمی كر ئەو هەلبەست هاتیە نڤیسین و گۆت: جارەكێ ئەز ل بەر شاشەیا تەلەفزیۆنەکێ یێ روونشتی بووم من دیت هندەك دیمەنێن ڕەڤا ملیۆنی یا گەلێ كورد ل سالا (1991) هاتنە نیشادان و د دیمەنەكی دا وێنەیێ ژنەكا كورد هەبوو كو زارۆكەك ل سەر دەستێن وێ بوو، بێی هەبوونا هیچ بەهانەیەكێ جەندرمەكێ تۆرك ب پۆستالێ ئەو ژن دا بەر پێنا و گەلەك بێزار كر، لەورا هێڤێنێ ڤێ شعرێ بۆ من ژوی دیمەنی هات و من ناڤێ شعرا خۆ كرە ڕەڤا رەش.
د دووڤدا هەلبەستڤان (ئەمین بۆتانی) كو ئاوازا ڤێ سترانێ ژلایێ وی ڤە هاتیە دانان، گۆت: پشتی ئەڤ شعرە گەهشتیە بەردەستێن من و ب دەهان جاران من خواندی، ئەو هزر بۆ من چێبوو كو ڤێ شعرێ ئاواز بكەم و پشتی دەمەكی ئەز شیام ئاوازەكێ بۆ بدانم و ئەڤە ب دەنگێ هونەرمەند (حەسەن شەریف) هاتە گۆتن.
ژلایێ خۆڤە هونەرمەند(حەسەن شەریف) ژی، بەحسێ قوناغێن تۆماركرن و كلیپكرنا ڤێ سترانێ كر و گۆت: ئەز گەلەكێ خۆشحالم كو شیایم ب هاریكاریا ڤان ماموستایان ڤێ سترانێ تۆمار و كلیپ بكەم.
ل دووماهیێ دەرهێنەرێ گەنج (كەهی) كو ب كارێ دەرهێنانا ڤێ كلیپێ رابوویە بەحسێ چاوانیا وێنەكرنا ڤێ كلیپی كر و گۆت: من باوەری ب خۆ هەبوو، چنكو بابێ من مەدیاكار (ئەحمەد زاویتەیی) و ئەڤ هەردو ماموستایێن هێژا (موئەیەد تەیب و ئەمین بۆتانی) پشتەڤانێن من بوون.
