تۆندوتيژيا سكسى ل هه‌رێما كوردستانێ د زێده‌بوونێ دايه
ئه‌ڤرۆ نيوز:
ده‌سته‌يا مافێن مرۆڤى ل هه‌رێما كوردستانێ راگه‌هاند كو ل شه‌ش هه‌يڤێن بۆرى يێن ئه‌ڤ ساله 268 ژن ل هه‌رێما كوردستانێ بووينه قوربانى تۆندوتيژيێ.
ده‌سته‌يا مافێن مرۆڤى ل هه‌رێما كوردستانێ ئاشكه‌را كر كو ب گۆره‌ى ئامارێن ئافره‌تێن قوربانى د شه‌ش هه‌يڤێن ئێكێ يێن سالا 2015ێ دا ل پارێزگه‌ها دهۆك و هه‌ولێر و سلێمانى و ئيدارا گه‌رميان 268 ئافره‌ت بووينه قوربانى.
ده‌سته‌يا مافێن مرۆڤى ئه‌و ئێك ژى ئاشكه‌را كريه كو ب گۆره‌ى ئامارێن رێڤه‌به‌ريا دوڤچوونا توندوتيژيێ دژى ئافره‌تان، رێژا توندوتيژيێ و ژمارا قوربانيێن تۆندوتيژيێ د شه‌ش هه‌يڤێن ئێكێ يێن سالا 2015ێ دا ب هه‌ڤبه‌ركى ل گه‌ل هه‌مان ماوه ل سالا 2014ێ ل هه‌رێما كوردستانێ زێده كريه.
هه‌ر ب گۆره‌يى ئامارا رێڤه‌به‌ريا دووڤچوونا تۆندوتيژيێ رێژا ده‌ستدرێژيا سكسى ب ره‌نگه‌كێ به‌رچاڤ زێده‌بوويه كو ل پارێزگه‌ها سلێمانێ 29 حاله‌ت و دهۆكێ 21 حاله‌ت و گه‌رميان 12 حاله‌ت و هه‌ولێر سێ حاله‌ت هاتينه تۆماركرن.
ل دۆر كوشتنێ ژى دايه زانين كو ل هه‌ولێر 12 حاله‌ت و هه‌ر ئێك ژ سلێمانى و گه‌رميان شه‌ش حاله‌ت و ل دهۆكێ ژى چار حاله‌ت هاتينه تۆماركرن، 33 ژنان ژى ل هه‌رێما كوردستانێ ب ده‌ستێن خوه، خوه‌كوشتينه.
ل دۆر رێژا سۆتن و خوه‌سۆتنێ ژى ئاشكه‌را كريه كو ل هه‌ولێرێ 63 حاله‌ت و سلێمانيێ 41 حاله‌ت و گه‌رميان 15 حاله‌ت و دهۆك 23 حاله‌ت هاتينه تۆماركرن.
