ره‌وشه‌نبیریا ده‌روونی د جڤاكی دا نینه
ئه‌ڤرۆ، هه‌رهین محه‌مه‌د:
شاره‌زایه‌كێ ده‌روونی: خێزان د تووشبویێ نه‌خوشیا ده‌روونی ناگه‌هیت
شاره‌زایه‌كێ ده‌روونی دیار كر كو پێدڤیه جڤاك ب چاڤه‌كێ نورمال سه‌ح كه‌نه نه‌خوشێن تووشی نه‌خوشیا ده‌روونی بوین، و نه‌خوشیێن ده‌روونی ژی وه‌كو یێن له‌شی ببینن و گۆت: لێ مخابن د جڤاكێ كوردی دا ئه‌و كه‌سێن تووشی نه‌خوشیێن ده‌روونی دبن ده‌وروبه‌ر ب چاڤه‌كێ كێم و ب شه‌رم سه‌ح دكه‌نێ.
شاره‌زایێ ده‌روونی ره‌یان یوسف، د دیداره‌كێ دا بۆ ئه‌ڤرۆ دیار كر كو گه‌له‌ك جاران ده‌مێ كه‌سه‌ك تووشی نه‌خوشیه‌كا ده‌روونی دبیت خێزان و ده‌وروبه‌رێن وی د وی ناگه‌هن كو ئه‌ڤ كه‌سه یێ تووشی نه‌خوشیا ده‌روونی بووی و دبێژن ئه‌ڤ كه‌سه یێ هاتیه گوهورین و گۆت: (ب دیتنا من ئه‌ڤ چه‌نده دزڤریت بۆ ئاستێ هشیاریا جڤاكی، ژبه‌ركو نه‌خوشیا ده‌روونی وه‌كو شه‌رمه‌كێ دبینن هه‌تا تاك نه‌شێت بێژیت من نه‌خوشیا ده‌روونی هه‌یه ژبه‌ركو ده‌وروبه‌ر دێ ب چاڤه‌كێ كێم سه‌ح كه‌نێ).
ره‌یان گوتژی: (بدیتنا من هه‌كه نه‌خوش سه‌ره‌دانا بسپورێن ده‌روونی بكه‌ت چو كێماسی نینه و گه‌له‌ك گرنگه جڤاكێ مه بهێته گوهورین و نه‌خوشیا ده‌روونی وه‌كو هه‌ر نه‌خوشیه‌كا دی یا جه‌سته‌یی بهێته هژمارتن، هه‌روه‌سان گرنگه ئه‌م ژلایێ ئایدلوژیڤه ژی خوه ب گوهورین و هه‌كه توشبوویه‌كێ ده‌روونی دمال دا هه‌بیت ب زووترین ده‌م ببه‌ینه ده‌ڤ بسپوره‌كێ ده‌روونی داكو ئاریشا وی بهێته چاره‌سه‌ركرن).
شاره‌زایێ ده‌روونی به‌رده‌وامی ب ئاخفتنێن خوه دا و دیار كر كو دڤێت ده‌زگه‌هێن راگه‌هاندنێ پتر رولێ خوه ببینن و جڤاكی هشیار بكه‌ن و بو دیار كه‌ن كا دێ چاوا خوه ژ نه‌خوشێن ده‌روونی قورتال كه‌ن، دیسان قوتابخانه زانكو و په‌یمانگه‌ه قوتابیان هشیار بكه‌ن و ره‌وشه‌نبیریا ده‌روونی لده‌ف په‌یدا بكه‌ن.
ره‌یان ئاماژه پێ كر كو تێگه‌هشتنا خێزانێ و ده‌وروبه‌را یا هاریكاره بو كه‌سێ تووشی نه‌خوشیا ده‌روونی بوی، ئانكو رولێ خوه یێ هه‌ی ل سه‌ر گوهورین و ساخله‌میا وی كه‌سی كو باشتر لێ بهێت، ژبه‌ركو تێگه‌هشتنا ده‌ورۆبه‌را دێ گه‌له‌ك ئاریشێن وی یێن ده‌روونی كێم كه‌ت.
شاره‌زایێ ده‌روونی ئه‌و چه‌نده ژی گۆت: (ره‌وشه‌نبیریا ده‌روونی دێ هاریكاریا مه كه‌ت ژیانا خۆه دروست ب رێڤه به‌ین و ئه‌و ئاریشێن رۆژانه ئه‌م توش دبینێ چاره‌سه‌ر بكه‌ین ئه‌ڤجا هه‌ر چ جورێ ئاریشان بیت).
ره‌یان دا زانین ژی كو مرۆڤ ژ سێ تشتان پێك دهێت وه‌كو (هه‌ست، هزر، ره‌فتار)، ئه‌ڤان هه‌رسێ تشتان گرنگی و گرێدان یا پێكڤه هه‌ی، ئانكو مرۆڤ د به‌رده‌وام د گوهورینان دایه و گه‌له‌ك قوناغێن ژیانێ دبورینیت و گۆت: (له‌ورا هه‌رده‌ما هزرێن مرۆڤی هاتنه گوهارتن ل وی ده‌می هه‌ست و ره‌فتارێن مرۆڤی ژی دێ هێنه گوهورین).
