رەنگ ب تنێ بۆ جوانكاریێ نەهاتینە بكارئینان
زنار تۆڤی:
هونەرمەندێ شێوەكار (عەلی حسێن) د دیدارەكێ دا بۆ رۆژنامەیا ئەڤرۆ گۆت: ئەو پێشانگەها لڤێ دووماهیێ من ل هەولێرێ ڤەكری، ب تنێ كۆمەكا كەڤالان نەبوو، بەلكو بزاڤەكە بوو بۆ ڤەگوهاستنا هەست و رەوشا دەروونی یا مرۆڤی ب زمانەكێ بێ پەیڤ، زمانەكێ پر ژ رەنگ و لڤینان، ئەز ب رێكا ڤان كەڤالان بزاڤێ دكەم بینەری ژ چارچووڤێ وێنێ كلاسیكی دووربێخم و ببەمە د ناڤ جیهانەكا ڤەكری یا هەست و خەیالان دا.
هەروەسا گۆت: د ناڤەرۆكا كارێن خۆ دا، رەنگ ب تنێ بۆ جوانكاریێ نە هاتینە بكارئینان، بەلكو هەر رەنگەك مانا و هەستەكێ تایبەت یێ هەی، شیناتییا بەرفرەهـ د ناڤ كەڤالان دا هەستێ ئارامی، كوراتی و ئاڤا ژیانێ ددەت، د دەمەكی دا كو رەنگێ سۆر هێمایێ تورەیی و ژیانێ یە، زەر ژی وەكی تیژكا هیڤیێ یە كو د ناڤ تاریاتیێ دا دیار دبیت، ئەڤ تێكەلبوونا رەنگان وە دكەت بینەر هەستپێ بكەت یێ ل هەمبەر بارانەكا هەست و هزركرنێ راوەستیای و شێوازێ ئەبستراكت د ڤێ پێشانگەها من دا گرنگیەكا مەزن یا هەی، چونكی ئەز تشتان ب روونی و راستەوخۆ وێنە ناكەم، بەلكو بینەری ئازاد دكەم كو مانا تایبەتا خۆ تێدا ببینیت، ژ بەر هندێ هەر كەسەكێ تەماشەیی كەڤالێن من بكەت، دێ هەست و چیرۆكەكا جودا خو ینیت، ئێك دێ وەكی ئاگری دینیت، كەسەكێ دی چێدبیت وەكی بارانێ یان هەڤڕكیا ناڤخۆی بخوینیت.