زورترین رێژه‌یا ئاكنجیێن پارێزگه‌ها دهۆكێ ته‌خا ناڤنجی نه
دهۆك، نه‌وزاد هلۆری:
هه‌رچه‌نده پرانیا تاكێن جڤاكی و ته‌خێن وێ ل سنورێ پارێزگه‌ها دهۆكێ گه‌نجن و گه‌نج هێزا كاری پێكدئینن، به‌لێ د نوكه دا پرانیا وان د ره‌وشا بێ كاریێ دا دبورن ب تایبه‌تی ته‌خا ده‌رچویان و ئه‌و گه‌نجێن دكه‌ڤنه سه‌ر ژیێ 18 بۆ 25 سالیێ، ماموستایه‌ك ژی دبێژیت: ب هه‌ر رێیه‌كا هه‌بیت دڤێت ره‌وشا دارایی یا گه‌نجان بهێته خوشكرن.
جیهاد مسته‌فا، ماموستایه سه‌باره‌ت بابه‌تی دیار كر كو خه‌ون و هیڤیا هه‌ر تاكه‌كێ جڤاكیه ل كوردستانێ و جیهانێ كو ل په‌ی ئه‌و بسپوری و شاره‌زایا هه‌یی كار بكه‌ت، داكو ژ روویێ ئابووری و جڤاكی ڤه بشێت ژیانا خوه گه‌رنتی بكه‌ت و ب ئارامی و دلخوشی بژیت و گۆت: (ژبه‌ركو نه‌بوونا كاری دێ هه‌ژاریێ زێده كه‌ت و د ئه‌نجام دا كارتێكرنێن خراب ل سه‌ر ره‌وشا جڤاكی كه‌ت و د ئاینده‌ی دا دێ وان كه‌سان پالده‌ت كو كریارێن خراب بكه‌ن، ئه‌ڤه زێده‌باری كو نه‌شێت ژیانا خوه ب ئاسایی ببورینیت و ژیانا هه‌ڤژینیێ پێك بینیت، له‌وا ب هه‌ر رێیه‌كا هه‌بیت ئالیێن شوله‌ژێ دڤێت ب جدی كار بكه‌ن كو ده‌لیڤێن كاری بۆ وه‌لاتیان ب گشتی و ته‌خا گه‌نجان ب تایبه‌تی په‌یدا بكه‌ن).
ل گوره‌ی راپرسیه‌كێ كو ماموستایه‌كێ زانكویا دهۆكێ ل دوو سالێن بوری دا ئه‌نجام دایه، پشكه‌ك ژ وێ هاتیه به‌لاڤكرن، دیار دبیت كو زورترین رێژا ئاكنجیێن پارێزگه‌ها دهۆكێ ته‌خا ناڤنجینه، ئانكو ئه‌و كه‌سێن دكه‌ڤنه د ناڤبه‌را ژیێ 15 سالی بۆ 59 سالی، بڤی ره‌نگی، ته‌خا زاروك و سنێلا كو ژیێ سفر سالی بۆ 14 سالی بخوڤه دگریت رێژا 39.7% ژ جڤاكی بخوڤه دگرن و هژمارا وان دبیته 654 هزار و 967 كه‌س، دیسان ته‌خا ناڤنجی كو ل ژیێ 15 سالی بۆ 59 سالی بخوڤه دگریت رێژا 55.4% ژ هژمارا گشتی یا ئاكنجیێن پارێزگه‌ها دهۆكێ بخوڤه دگریت كو هژمارا وان دبیته 914 هزار و 482 كه‌س، ته‌خا بناڤ سالڤه چونان ژی كو ژیێ 60 سالی بۆ سه‌ری بخوڤه دگریت دبیته رێژا 3.2% ژ ئاكنجیێن پارێزگه‌ها دهۆكێ و هژمارا وان ژی دبیته 52 هزار و 43 كه‌س، هژمارا دانعه‌مران كو ل گوره‌ی قانونا عیراقی كه‌سێن ژیێ 60 سالی بۆ سه‌ری بخوڤه دگریت دبنه 79 هزار و 162 كه‌س، ژ وانان پتر ژ 13 هزار كه‌س دكه‌ڤنه سه‌ر ژیێ 80ێ سالیێ، ژبلی دایكبویێن سالا 2021 و 2022ێ، دده‌ما 10 سالێن بوری دا پتری 436 هزار كه‌سا ل پارێزگه‌ها دهۆكێ زێده بوینه.
ماموستا جیهاد زێده‌تر گۆت: (هه‌ر چه‌نده ره‌وشا دارایی یا كوردستانێ هه‌تا راده‌یه‌كێ باشه و خراپ نینه، به‌لێ ل گه‌ل ڤێ یه‌كێ ژی هزاران ده‌رچویێن زانكو و په‌یمانگه‌هان د بێكارن و ماینه ل كولانان و چاڤێ وان ل وێ یه‌كێ یه كو كار بكه‌ن هه‌تا هه‌كه چه‌ند كێم و چ كار ژی بیت، دیسان ب نه‌چاری هزاران كه‌سان قه‌ستا ژ ده‌رڤه كریه و سه‌حا ژیانه‌كا باشتر دكه‌ن، ئالیێن شوله‌ژێ ب هه‌ڤكاریا كه‌رتێ تایبه‌ت دڤێت ژیانا جڤاكی و ئابوری یا وه‌لاتیان و گه‌نجان باشتر بكه‌ن، داكو ئه‌و ژی بشێن خزمه‌تا وه‌لاتێ خوه بكه‌ن).
د راپرسیێ دا زێده‌تر هاتیه، هێزا كاری ل پارێزگه‌ها دهۆكێ 57.11% پێك دئینیت و ده‌رڤه‌یێ هێزا كاری ژی دبیته 42.89%،دیسان پشكداریا ئابووری دبیته 39.8% و رێژا بێكاریێ ژی هه‌تا سالا 2020ێ دبیته 13.8%، ژ وان كه‌سێن كو ل پارێزگه‌ها دهۆكێ كار دكه‌ن ژیانا وان ل سه‌ر كرێكاریێ یه ریژا 69.2% بخوڤه دگریت.
