سوبەهی فەستیڤالا كۆلیژا هونەرێن جوان ل دهۆكێ دێ هێتە گێڕان
زنار تۆڤی
ل ژێر درۆشمێ (هونەر ئاڤاهیێ ئاشتیێ) یە، ل بەرە سوبەهی رۆژا چارشەمبی، رێكەفتی 20/5/2026 سێیەمین فەستیڤالا كۆلیژا هونەرێن جوان ل دهۆكێ بهێتە گێڕان، چالاكیێن وێ فەستیڤالێ ل سەنتەرێ كۆنفرانسان ل زانكۆیا دهۆك و ل هۆل و باخچێن كۆلیژا هونەرێن جوان ل سپێدە و ئێڤاران دێ هێنە ئەنجامدان.
رێبەر روشدی، هاریكارێ راگرێ كۆلیژا هونەرێن جوان ل دهۆكێ، بۆ رۆژنامەیا ئەڤرۆ دیاركر كو بەرهەمێن قوتابیان یێن هەرسێ پشكان دێ هێنە نیشادان و هەتا 23 هەیڤێ دێ یا بەردەوام بیت، د وان چار رۆژان دا هژمارەكا كار و چالاكیێن هونەری دێ هێنە ئەنجامدان، ژوانا رۆژا ئێكێ دێ كۆنسێرتا پشكا مۆزیكێ هێتە گێڕان، ل گەل ڤەكرنا پێشانگەها پرۆژە و بەرهەمێن قوتابیێن پشكا شێوەكاری، ل گەل پێشكێشكرنا شانۆگەریا (دینێن هەڤچەرخ) رۆژا دویێ دێ چەندین چالاكی هێنە ئەنجامدان و شانۆگەریا (دەریاڤانێن خۆلیسەر) دێ هێتە پێشكێشكرن، رۆژا سێیێ پێشانگەها شێوەكاری دێ یا بەردەوام بیت و شانۆگەریا (مرنا رێكەفت یا ئانار شیستەكی دێ هێتە پێشكێشكرن ل هۆلا خانی كۆلیژا هونەرێن جوان، ل رۆژا چارێ و دووماهیێ دێ شانۆگەریا (بەخیل) هێتە پێشكێشكرن، ل گەل بەردەوامیا پیشانگەها شێوەكاری یا قوتابیان، دیسا پەنەلەك ژی دێ هێتە پێشێشكرن و ل دووڤ دا و ل دانێ ئێڤاری رێورەسمێن ب دووماهی هاتنا فەستیڤالێ ل باخچێن كۆلیژا هونەرێن جوان ل دهۆكێ دێ هێنە گێڕان.