شـەڕێ كـۆلانـێ باشترە ژ شـەڕێ ل سـەر بێدەرێ
محەمەد مراد
مێژوو ب روودانێن خۆڤە، یێن پڕی سەربۆڕ و گۆتنێن مەزنانن و دڤێت مرۆڤ بۆ خۆ مفای ژێ وەربگریت، چونكو ژ ڤالاتیێ نەهاتینە و سەربۆرێَن كوردان هەیین، یا گۆتی بلا شەڕێ كۆلانێ بیت نەكو شەڕێ ل سەر بێدەرێ بیت. راستە مرۆڤ ل كۆلانێ شەڕی بكەت باشترە، دەرفەت یا هەی پۆلیس د هەوارا مرۆڤی بهێن كو ئاریشێ ب رێكێن قانوونی چارەسەر بكەت یان دەر و جیران د هەوارا مرۆڤی، بهێن مرۆڤی ژ ئێك ڤەبكەن و ب رێكا كەسایەتێن جڤاكی یێن مەزن وەك ریهسپیان پێكبینن، بەری بچین سەر بێدەران دویر دەست و شەڕی ل سەر بێدەرێ بكەین، دێ ڤەرێژا وێ زۆر خراب بیت و ئێك ژ مە هەردویان دێ بێدەرێ ژ كەربا دا سۆژیت. ئەڤا نوكە ژی نابینم چ خێر تێدا هەبیت دەرگەهێ پەرلەمانی ڤەكەن و كاڕا كەن، ئەو كەرب و كینا ئەڤە دو سالە یا سیاسی و جڤاكی و یا مەدیایی و یا سۆشیال میدیا و هەمی دێ چیتە هۆلا پەرلەمانی، دێ زۆر خراپتر لێ هێت، فەرە و یا گرنگترە بەری كاڕاكرنا پەرلەمانی ب كێماتێ روینشتن یان رێكەفتنەكا سیاسی بهێتە كرن د ناڤبەرا پارتی و ئێكەتی و لایەنێن دی دا بۆ هێوركرن و ئارامكرنا توند و تیژیا ڤان دو سالان د ناڤ لایەنێن سیاسی دا پەیدابووی و پشتی هنگێ دەرگەهێ پەرلەمانی ڤەكەن و كاڕا بكەن. كا دێ چ بریار دەن بلا بدەن. چ خۆ بهەلوەشینن یان دەست ب كۆمبوونێن ئاسایی یێن پەرلەمانی بكەن، ل دویڤ قانوونێن هەیین. نابینم كو پەرلەمان بهێتە كاڕاكرن و ئەنجامێن باش هەبن و ئەز دبینم خراپتر لێ بهێت، چونكو ئەندام پەرلەمانێن كوردستانێ، ئەندام پەرلەمانێن حزبینە، نەك یێن كورد و كوردستانینە و چ فراكسیۆن و ئەندام پەرلەمان بێ راوێژكاریا حزبا خۆ هیچ بڕیارەكێ نادەن یان هەتا نەشێن دەستێ خۆ ژی بلند بكەن.
