فلمەكێ كوردی ل جەزائیر دێ پشكداریێ د بەریكانەیا وەرگرتنا خەلاتان دا دكەت
رەمەزان زەكەریا
كورتە فلمێ كوردی یێ ب ناڤێ (زەوی قەڵەڕەشەكان/ئەردێ قەلەڕەشكان) ژ دەرهێنانا محەمەد حوسێن، هاتییە هەلبژارتن بۆ پشكداریكردنێ د فەستیڤاللا سینەمایا هەڤچەرخ دا ل وەلاتێ جەزائیر، ئەڤ فەستیڤالە ل ژێر ناڤێ (دەمێ وێنە دئاخڤیت) ل هەرێما عەلمە ل پارێزگەها ستیف دێ هێتە گێڕان.
دەرهێنەرێ فلمی (محەمەد حوسێن) د دیدارەكێ دا بۆ رۆژنامەیا ئەڤرۆ گۆت: كو فلمێ وان ژلایێ لژنەیا فەستیڤالێ ڤە هاتییە پەسندكرن و نوكە د پشكا بەریكانێ دایە بۆ ب دەستڤەئینانا خەلاتێن سەرەكی، ئەڤ كورتە فلمە هەلگڕێ چیرۆكەكا كوور یا دەروونی و جڤاكی یە كو تێدا مرۆڤ دگەل ڕابردوویێ خۆ یێ تژی ژ ترس و نهێنی دجەنگیت.
ناڤبری گۆت: ناڤەڕۆكا فلمی بەحسێ زەلامەكێ دكەت كو پشتی سالانەكا درێژ دزڤرڕیتە گوندێ خۆ و دگەڕیێت ل دووڤ ڕاستییا ڕوودانەكا خوێناوی یان بەرەزەبوونا كەسەكێ خێزانا خۆ كو د زارۆكینیێ دا كاریگەری ل سەر وی كرییە، قەلەڕەش د ڤی فلمی دا تنێ بالندە نینە هێمانە بۆ ویژدانا مرۆڤی و وێ بێدەنگییا جڤاكی یا كو ل سەر ستەم و خیانەتێ هاتییەكرن، د كورتە فلمێ زەوی قەڵەڕەشەكان دا، هەر ئێك ژ ئەكتەران (سامان محەمەد، سەركۆ فەتاح و بیلال محەمەد) ڕۆلێن سەرەكی دگێڕن بڕیارە ئەڤ فەستیڤالە ل ٦ێ خزیرانا ٢٠٢٦ێ دەستپێبكەت و بۆ دەمێ پێنج ڕۆژان یا بەردەوام بیت.
