فیستەڤالا پەیمانگەها هونەرێن جوان ل دهۆكێ دەستپێكر
شاكر ئەتروشی
ب چاڤدێریا (د. عەلی تەتەر) پارێزگەرێ دهۆكێ و ل ژێر دروشمێ (ئافراندن ب سیمایێن ئازاداییێ) پەیمانگەها هونەرێن جوان ل دهۆكێ، دوهی رۆژا شەمبی رێكەفتی 6/6 ب گێڕانا كۆنسێرتەكا مۆزیكێ دەست ب فیستەڤالا خۆ یا (27) كر و دێ هەتا (9) ڤێ هەیڤێ یا بەردەوام بیت و قوتابیێن هەرسێ پشكێن (شێوەكاری، شانۆ، مۆزیكێ) دێ بەرهەمێن خۆ د فیستەڤالێ دا نیشادەن.
شڤان مستەفا، رێڤەبەرێ پەیمانگەها هونەرێن جوان ل دهۆكێ، بۆ رۆژنامەیا ئەڤرۆ گۆت: مە بەرهەڤیێن باش بو ئەنجامدانا ڤێ فیستەڤالێ كرینە و ل رۆژا ئێكێ كۆنسێرتەكا مۆزیكی كو ژلایێ پشكا مۆزیكی ل پەیمانگەهێ هاتبوو ئامادەكرن، هاتە گێڕان و بەرنامەیێ سوبەهی رۆژا دویێ ل دەمژمێر (10) سپێدی دێ پێشانگەها شێوەكاری ل ئاڤاهیێ پەیمانگەهێ هێتە ڤەكرن و بەرهەمێن قوتابێن پشكا شێوەكاری دێ هێنە نیشادان و هەر لڤێ رۆژێ ل دەمژمێر (6) ئێڤاری دێ شانۆگەریا (نهێنیا نەورەسێ دەریایی) كو ژبەرهەمێ پشكا شانۆیێ یە، دێ هێتە نیشادان و پێشانگەها شێوەكاری ژی دێ یا ڤەكری بیت هەتا رۆژا 9/6/2026 دەربارەی بەرنامەیێ رۆژا سێیێ رێكەفتی 8/6 شڤان مستەفا، رێڤەبەرێ پەیمانگەها هونەرێن جوان ل دهۆكێ، گۆت: ل دەمژمێر (6) ئێڤاری شانۆگەریا (كی ل وێرێ یە؟) دێ هێتە نیشادان، ل رۆژا چارێ و دووماهیێ 9/6 هەر ل دەمژمێر (6) ئێڤاری شانۆگەریا ( ئاوازەك د دەریایدا) ل پەیمانگەهێ دێ هێتە نیشادان و هەر كەسەكی/كا حەزا دیتنا ڤان چالاكیان هەبیت ب دلخۆشی ڤە دشێت بهێت پشكدار ببیت.