كوردەك دێ پشكداریێ د ئۆلۆمپیادا هونەری دا كەت
زنار تۆڤی
ئەحمەد نەبەز، وەك ئێكەم هونەرمەندێ كورد و عیراقی ب فەرمی هاتیە داخوازكرن بۆ چارەمین پێشانگەها نێڤدەولەتیا (ئارتیاد) ئەوا ب (ئۆلۆمپیادا هونەری) هاتیە نیاسین و بڕیارە ل چریا دویێ یا ئەڤ سالە ل ڤالنسیا ل ئیسپانیا بهێتە ئەنجامدان و ب سێ ڤیدیۆێن ئارتان دێ پشكدار بیت.
ناڤهاتی دبێژیت: ئەز هاتیمە ئاگەهداركرن كو سێ كارێن من یێن ڤیدیۆ ئارت هاتینە وەرگرتن و دێ ب داخوازنامەكا فەرمی پشكدار بم و ڤیدیۆ ئارت، ژلایێ ڤەگوهاستنێ ڤە ب ساناهیترە و پێدڤی ب چ تێچوونێ ناكەت، دیسان ب رێكا ڤیدیۆ ئارتان ژی پەیاما من دێ زوو گەهیتە جهێن پێدڤی و وەك هونەرمەندەكێ كورد، گەلەكا گرنگە كارێن خۆ بگەهینمە جیهانا دەرڤە، ئارمانجا من ئەوە ئەز هونەرێ هەڤچەرخێ كوردی ب ئاستەكێ جیهانی پێشكێش بكەم و ئەز دێ ئەز دێ ب نوونەراتیا كوردستانێ پشكدار بم.
ناڤهاتی، ل سالا 1986 ل باژێرێ هەولێرێ ژ دایكبوویە، باوەرناما بەكالۆریۆسێ د هونەرێ دا هەیە، وەك هونەرمەندەكێ هەڤچەرخ یێ هونەری د بۆارێن (نیگاركێشان، ئینستێلاسیۆن، نیشاندان، ڤیدیۆ، فۆتۆگرافی و هونەرێ دیجیتالی) دا كار دكەت، ل سالا (2015) ێ ب كارێن خۆ یێن هونەری ناڤودەنگەكێ نێڤدەولەتی ب دەستڤە ئینایە.
