كوره ئه‌نفاله‌كێ بارزانی: هه‌تا دمرین نه‌شێین رۆژا گرتنا كه‌س و كارێن خۆ ژبیربكه‌ین
ئه‌ڤرۆ، ره‌مه‌زان زه‌كه‌ریا
رۆژا 31/7/1983 رژێما به‌عسا ئیراقێ ده‌ست ب گرتن و ئه‌نفالكرنا بارزانیان كر و هه‌تا دووماهی رۆژا ئه‌نفالێ 8000هزار بارزانی هاتنه گرتن و بێ سه‌روشوین كرن. 39 سال ل سه‌ر وێ تاوانا ده‌رهه‌ق بارزانیان هاتیه كرن دره‌بازبوون و هه‌تا نۆكه 696 روفاتێن ئه‌نفالكریێن بارزاتی هاتینه زڤراندن و ل گورستانه‌كا تایبه‌ت ل بارزان هاتیه ڤه‌شارتن و سالانه ل هه‌مان رۆژ رێوره‌سمێن بیرئانینا ئه‌نفالكرنا بارزانیان دهێنه ساخكرن.
تاهر مه‌لا سالح، كوره ئه‌نفاله‌كێ بارزانیه چیرۆكا خۆ بۆ ئه‌ڤرۆ ڤه‌گێرا و گۆت: سالا 1983 سه‌ربازێن ئیراقێ دهاتنه ده‌ردوورێن مالێن مه، پشتی بوویه ده‌مژمێر یازدێ رۆژێ بۆ ده‌نگه ده‌نگا خه‌لكی دناڤ گه‌ره‌كێ دا پاشی ئاشكرا بوو رژێما به‌عس مال ب مال یا دگه‌رێت و زه‌لاما دگریت بێ بزانین بۆچی گرتن و دێ كیڤه به‌ن؟ ب تنێ ئه‌م ل مال بووین سه‌ربازێن ئیراقێ ب سه‌ر مالامه دا گرت و ئه‌وێن ژیێ وان مه‌زن ژ مال ده‌رئێخستن و گۆت بۆ كاره‌كێ فه‌ر دێ به‌ین، ئه‌ڤه بۆ 39 سال ئه‌م چاڤه‌رێ ڤه‌گه‌ریانا كه‌س و كارێن خوه دكه‌ین هه‌تا دمرین ژی دێ هه‌ر چاڤه‌رێ بین، رژێما به‌عس گه‌له‌ك غه‌در ل كه‌س و كارێن مه كر ده‌ما گرتی و هه‌تا ئه‌نفالكرنێ .
تاهر هێشتا گۆت: ده‌مێ ئه‌نفالێ كه‌سوكار و باب و خزمێن مه هه‌موو هاتینه گرتن ئه‌م ل خواندنێ ڤه‌قه‌تیان و ژیانا مه پشتی گرتنا كه‌س و كارێن مه بۆ جه‌هه‌نه‌م مه نه‌زانی چو بكه‌ین. ژ لایه‌كێ خه‌ما گرتن و ئه‌نفالكرنا كه‌س و كارا بۆ مه چو ل وان نه‌دزانی ژلایه‌كێ خه‌ما ژیانێ بوو هه‌موو ده‌ما مه خوزی ب مرنێ دخواستن مه زۆر نه‌خوشی ب چاڤێن خۆ دیتن هه‌تا مه قوناغا ئه‌نفالێ ده‌ربازكری .
وی كوره ئه‌نفالی زێده‌تر گۆت: هه‌ر جارا دبیته سال رۆژا گرتنا كه‌س و كارێن من هه‌ست دكه‌م وێ گاڤێ ل به‌ر چاڤێن من راكرینه و ئه‌نفال كرینه، چو جاران هه‌ست ب خوشیێ ناكه‌م دژیانا خودا من چو جارا ن هه‌ست ب خۆشیێ نه‌كریه پشتی كه‌س و كارێن من لبه‌ر چاڤێن گرتین و ئه‌نفالكرین، ژیان بۆ مه زۆرا نه‌خوشبوو، سالانه هه‌موو ده‌ما دچمه سه‌ر گورێن ئه‌نفالا سه‌برا خۆ پێ دئینم راسته سالانه رێوره‌سم دهێنه كرن، به‌لێ چو تشته‌ك نه‌شێت خه‌ما وان د دلێن مه دا بینیت ده‌رڤه رۆژا كۆ رووفاتێن ئه‌نفالكریا بۆ مه ئینایه ڤه بۆ من رۆژه‌كا زۆر ب ژان بوو مه زۆر نه‌خوشی دیتن.
سپێده‌هیا 31/7/1983، زێده‌تری 8000 هزار بارزانی هاتنه ئه‌نفالكرن هه‌تا نوكه رووفاتێن 696 ئه‌نفالان هاتینه زڤراندن ل سالا 2005 رووفاتێن 503 ئه‌نفالان و سالا 2014 رووفاتێن 93 ئه‌نفالان و سالا 2022 رووفاتێن 100 ئه‌نفالا و ل گۆرستانه‌كا تایبه‌ت ل بارزان هاتینه ڤه‌شارتن.
