ل 16ی تەباخێ بەرێ بنیاتی بۆ دەولەتا كوردی هاتیە دانان
غەریب یوسف مزووری
هەلبەت ئەڤرۆ 16/8/2026 رۆژەكا دیرۆكی یە د مێژژوویا گەلێ مەدا، چنكو د ڤێ رۆژێ دا مە دو بیرهاتنێن گەلەك گرنگ هەنە كو هەتا كورد مابن ژبیرناكەن و دێ شانازیێ پێ كەن، یا ئێكێ سالرۆژا دامەزراندنا پارتی دیمۆكراتی كوردستانە كو بەری (80) سالان ل سەر دەستێ رێبەرێ مللەتێ كورد (مەلا مستەفا بارزانی) هاتیە دانان و یا دویێ ژی رۆژا ژدایكبوونا سەرۆك و مەرجەعێ كوردان (مەسعود بارزانی) یە و ژیێ وی ژی بوو(80) سال، چنكو دوێ رۆژا پارتی هاتیە دامەزراندن، هەر ل وێ رۆژێ سەرۆك (مەسعود بارزانی) ژی ژ دایكبوویە، لەورا ژدایكبوونا سەرۆكی و دامەزراندنا پارتی دوێ رۆژێ دا گەلەك گرنگیا خۆ هەیە و كوردێن دلسۆز سالانە دێ ڤان هەردو بیرهاتنان پێكڤە ساخكەن.
دامەزراندنا پارتی دیمۆكراتی كوردستان ل (16) تەباخا سالا (1946) ئێك ژ پێدڤیێن گرنگ بوو كو بهێتە هەبوونێ، چنكو نەمر مستەفا بارزانی ل وی دەمی هەست پێ دكر كو زۆری یا ل كوردان دهێتەكرن و دوژمن یێن بزاڤێ دكەن ناسنامەیا كوردی نەهێلن، لەورا بارزانی هزر د دامەزراندنا پارتی دا كر و د كاودانەكێ سەخت و دژوار دا پارتی دامەزراندن و ئەم دشێن بێژین، هەر ژ رۆژا دامەزراندنا پارتی بەرێ بنیاتی بۆ دامەزراندنا دەولەتا كوردی ژی هاتیە دانان، لەورا د (80) سالێن بۆری دا دوژمن و نەحەزان دژایەتییا پارتی كریە دا دەولەتبوون بجه نەهێت، لێ خەم و خەیالا وان یا خاڤە، چنكو پارتی یا ل دویڤ نەخشە و پلانێن رێكخستی كاردكەت و هەر پارتی بوو رێبەریا شۆڕشا مەزنا ئیلۆنێ، پاشی شۆڕشا 26 گولانێ كری كو وان هەردو شۆِرشان رێخۆشكرن پەیداكر كو سەرهلدانا بهارا سالا 1991 بهێتە كرن و د دووڤدا پەرلەمان و حوكمەتا هەرێما كوردستانێ هاتنە پێك ئینان و ئەڤە هەموو بەرهەمێ خوین و خەباتا پارتی دیمۆكراتی كوردستانە، ب تایبەت ژی شەهیدێن سەربلند كو ئەڤرۆ ئەم هەموو ل بن سایا خوینا وان پا پیرۆز ب ئازادی دژین، لەورا ئەز یێ گەشبینم كو دەولەتبوون یا نێزیكە و ئەڤ چەندە دێ ل سەر دەستێن پیرۆزێن سەرۆك بارزانی هێتە ئەنجامدان و ئەم هەموو دزانین هەكە خیانەتا (16) ئوكتۆبەرێ و فرۆتنا كەركووكا دلێ كوردستانێ نە با كو ژلایێ ئێكەتیێ و هندەك نەحەزێن دی ڤە پلان بۆ هاتبوو دانان نوكە بەری چەندین سالان ئەم دەولەت بووین.
ل دووماهیێ ب هەلكەفتا بۆرینا (80) سالان ل دامەزراندنا پارتی دیمۆكراتی كوردستان، هەروەسا (80) سالیا ژ دایكبوونا سەرۆك بارزانی ئەم سەرێ رێز و نەوازشێ بۆ هەموو شەهیدێن كورد و كوردستانێ و سەروەرێ وان بارزانیێ نەمر و ئدریسێ هەردەم ساخ دچەمینین و داخوازا ژیەكێ درێژ و ساخلەمیەكا باش بۆ سەرۆك بارزانی دكەین، بژیت كورد بژیت پارتی مرن و شەرمزاری بۆ دوژمن و خاكفرۆشان.
