من پێ باشبوو بهێمە دهۆك و زاخۆ سترانان ببێژم
شاكر ئەتروشی
سترانبێژ (هایا محەمەد) كو خەلكا رۆژهەلاتێ كوردستانێ یە، لێ ئەڤە چەند سالن ل پارێزگەها سلێمانیێ دژیت، د دیدارەكێ دا بۆ رۆژنامەیا ئەڤرۆ گۆت: هەتا نوكە من سێ ئەلبۆمێن سترانان بەلاڤكرینە، دو ئەلبۆم سترانێن منن و یا سێیێ ژی ئەلبۆمەكا سترانێن فولكلۆری بوون، بۆ پشتەڤانیێ ژی دایكا من، هەروەسا برایەكێ من پشتەڤانێن گەلەك بهێزن، ئانكو ئەو رێخۆشكەرێن هەموو سەكەفتنێن منن.
هەروەسا گۆت: د سالێن بۆری دا من پشكداری د هژمارەكا زۆرا كونسێرت و ئاهەنگان داكریە، ل ناڤ هەرێمێ هەروەسا ل چەند وەلاتێن ئورۆپی ژی كو بۆ چەندین ئاهەنگان هاتیمە داخوازكرن، ب تایبەت ژی بۆ ئاهەنگێن نەورۆزێ، سەبارەت دەڤەرا بەهدینان ژی هەتا نوكە من ل دهۆك و زاخۆ چو ئاهەنگ نەگێڕاینە، ئەو ژی چنكو ئەز كەسێ ل وێرێ نانیاسم، لەورا هەتا نوكە ئەز بۆ وان ئاهەنگان نە هاتیمە داخوازكرن، هەكە من پێ باشبوو بهێمە دهۆك و زاخۆ ئاهەنگان بگێڕم.
ل دووماهیێ گۆت: گەلەك حەز و هیڤی د دلێ مندا هەنە و هەتا ئێك دهێت ئێكا دی دهێتە جهێ وێ، لێ نوكە حەزا هەرە مەزن ئەوە ئاشتی و ئێمناهیی ل هەر چار پارچەیێن كوردستانێ بەرقەرار بیت.