مۆندیالا بازرگانی و دەركەڤتنا گران یا ئیراقێ
ئیحسان حەسەن
دەمێ فیفایێ هژمارا هەلبژارتیێن پشكدار د مۆندیالێ دا زێدەكرین بۆ 48 هەلبژارتییان، پتر ژ بووچونەكێ لدەف حەزژێكەر و پشتەڤانێن فوتبۆلێ لسەرانسەری جیهانێ لدۆر ئاستێ قارەمانییێ پەیدابوون، بۆچوونەك ئەو بوو كو ب زێدەكرنا وان دێ هەلبژارتیێن لاۆازتر ب سەركەڤن، بووچونەكا دی هەبوو ئەڤ زێدەكرنە دێ دبەرژوەندیا هەلبژارتیێن نوو دابیت یێن كو دێ دەلیڤەكێ وەرگرن خوە پتر دیاربكەن، دگەل بداوی هاتنا یاریێن خولا كومان هووسا دیاربوو، كو زێدەكرنا تیمان لسەر كیستێ ئاستی بوو، یاریێن ئێك لایەنی پەیدابوون و هەڤركییەكا بهێز كەڤتە د ناڤبەرا واندا كا كیژ تیم دێ كێمتر گۆل لسەر هێتە تۆماركرن، ب تایبەتی هەلبژارتیێن ئەرەبن ئاسیا یێن زێدەتری هەموویان گۆل لسەر هاتینە تۆماركرن، لسەرێ وان هەلبژارتییێ ئیراقێ، یێ كو لسەر جەمێ سێ یاریان 12 گۆل لسەر هاتینە تۆماركرن، ئەڤی ئەنجامی ڕیکوردا فراندین تیما موندیالێ ب دەستڤەئینا.راستە كەڤتبوو دكۆمەكا بزحمەت و بهێز دا دگەل هەر ئێك ژ هەلبژارتییێن فرەنسا، نەرویج و سینیگال، بەلێ وەلێ هات ئێدی جەماوەر ب كێمتر سێ گۆلان ژی یێ رازی بوو، ب تایبەت دیاریێن واندا دگەل تیمێن مەزنێن جیهانێ، هەر چەندە تیمێن ئەفریكا ژی وەكو تونس، هەروەسا هەلبژارتیێ كۆراساو ژ ئەمریكا باكوور دۆراندێن وان ژی دگران بوون، بەلێ دیار بوو كو فیفایی هووسا سەرەدەری دگەل ڤێ مۆندیالێ كریە، كا دێ چەند قازانجێ كەن، بێ كو گرنگییێ بدەنە كوالەتییا یاریان و جوداهییا ئاستێ تیمێن دەربازبووی، هەر چەندە بەری مۆندیالێ و دگەل وێ پێشكەڤتنێ ئەوا ئەڤرۆكە فوتبۆل بخوە دبینیت، ئەو پێشڤەچوونا دزانستێ راهێنانێ دا و رێكێن یاریان وپلان و تەكتیكێ دا پەیدابوون، دیسان شرۆڤەكرنا ئاستێ تیمان برێكا ڤیدیویێ ژلایێ راهێنەرێن بسپۆر ڤە، بۆ دیاركرنا خالێن هێزێ و لاۆازیی، بهێزكرنا سیستەمێ بەرگیریێ، كاركرن لسەر یاریا ب كۆم بۆ پتر بهێزكرنا هەماهەنگیێ دناڤبەرا یاریزانان دا، دیسان بكار ئینانا تەكنەلوژیایێ بۆ دابینكرنا داتایێن دروست بۆ هندێ هاریكاریا راهێنەران بكەن كو بشێن خوە دگەل یاریێن خوە ب گونجینن ب كێمترین زیان دەركەڤن، ژبلی كاركرن لسەر راهێنانێن دەروونی داكو بەرهەڤییا یاریزانان بۆ هەر یاریەكێ تمام بكەن، ئێدی یا ب زەحمەت بیت چ یاریزان ب تنێ بشێن جوداهییێ دروست بكەن، ئەو جوداهییا تەكنیكی یێن مەزن دناڤبەرا تیمان دا نەمینیت، بەلێ ئەڤ چەندە وەكو بووچون مان دقۆناغا ئێكێ یا مۆندیالێ دا، یاریزانێن مەزن شیان لسەر كیستێ ڤان، تیمان ژبلی كو تیمێن خوە بەرەب سەركەڤتنێن مەزن ببەن، هندەك ریكوردێن كەسوكی ژی بدەستڤە بینن، یا من دڤێت بێژم دگەل وان هەموو تێبینیێن هەتا نها هەین، لسەر رێكخستنا ڤێ روودانا جیهانی ل سێ وەلاتان، ئەو هەموو ئەنجامێن هاتینە تۆماركرن، هەتا یێن نەچاڤەرێكری ژی، ژمن وەرە دقۆناغا 32ێدا ژ نوو دێ مۆندیال دەستپێكەت، ژبەر كو ئێدی دەلیڤەیا قەربووكرنێ نەما، ب هیڤیا هندێ ئەڤ مۆندیالە سۆزا خوە بجه بینیت، نەتنێ ب ئامادەبوونا جوان و رێژەیا مەزنا پشتەڤانان و قەزانجا بازرگانێن فیفایێ، بەلكو ئەم پتر خۆشییێ ژهۆنەرێ فوتبۆلێ بینن، دگەل باوەریا مە كو هەموو جاران تیمێن مەزن و بەربژێر ب سەرناكەڤن
