مۆندیال و هیڤیێن هەلبژارتییێ ئیراقێ
ئیحسان حەسەن
ل گەل دەستپێكرنا هەڤڕكیێن مۆندیالا 2026ێ یا فوتبۆلێ ئەوا هاتیە رێكخستن ژلایێ وەلاتێ ئەمریكا ب هەڤپشكی ل گەل هەر ئێك ژ كەندا و مەكسیك، نها چاڤێ جەماوەر و حەزژێكەرێن فوتبۆلا ئیراقێ و كوردستانێ دێ بەر ب هەلبژارتییێ ئیراقێ چن، دەمێ یاریێن خوە د مۆندیالێ دا ئەنجامددەت، بێ كۆمان ئەركێ وان هند یێ ب ساناهی نابیت، پشتی كەڤتینە د كۆمەكا ئاگرین و بهێز دا دگەل هەرئێك ژ هەلبژارتیێن فرەنسا و نەرویج و سینگال، ئەڤ پشكدارییا دیرۆكی ئەوا پشتی 40 سالێن چاڤەرێ بوونێ هاتیە پێش، دێ بیتە تاقیكرنەكا ڕاستەقینە بۆ شیانێن یاریزانێن ئیراقێ ل هەمبەر قۆتابخانەیێن جودا یێن فوتبۆلێ ژ ئۆیرۆپا و ئەفریكایێ، لڤێرە ڕەنگە پرسیارا ژ هەموویان گرنكتر ئەو بیت، ئەرێ هەلبژارتییێ ئیراقی دێ چەوا یاریێن خوە د مۆندیالێ دا ئەنجامدەت؟ ئەرێ دێ پشت بەستنێ لسەر وان دیداران كەت یێن كو دڤاڤارتنان دا، یان دیاریێن هەڤالینی دا كرین؟ یان دێ لسەر پلان و تەكتیكا بەرگیریێ كەت، كو ب كێمترین زیان ژڤان یاریان دەركەڤیت؟ یان دێ بیتە جهێ حێبەتییا هەموو جیهانێ؟ ئەز دبێژم ئەگەر راهێنەرێ ئیراقێ یێ ئوسترالی گراهام ئارنۆلدی بڤێت دلیڤەیا خوە د ڤێ كۆمێ دا بینیت، پێدڤییە چەند پێنگاڤان پاڤێژیت، یا ژ هەموویان گرنكتر یاریێ ب پلانا بەرگێریا تۆند ژ دەڤەرا خوە بكەت، دگەل نەدانا بوشاتییان بۆ تیمێن هەڤرك، ژبەر كو هەر شاشییەك بەرامبەر رووبرووبوونا هێرشبەرێن وەكو ئیمپاپی و هالاند و سادیو مانی دێ ب گرانی لسەر راوەستیت، یا دیتر رێكخستنا هێلا ناڤین داكو بشێت هێزا هێرشبەرییا تیمێن بەرامبەر راوەستینیت و ئەو پەیوەندییا د ناڤبەرا هێلا بەرگیریێ و هێرشبەریێ دا ڕابگریت، بەلێ هەر دێ مینیت پشت بەستن لسەر هێرشێن هەڤدژ و مفا وەرگرتن ژ لەزاتییا هەر دو لایێن تیمێ چەكێ هەرە بەرچاڤێ ئیراقێ دڤان دیداران دا، هەر چەند سیستەمێ نوو یێ مۆندیالێ بڤێ شێوێ تا رادەیەكێ چەنسی ددەتە ئیراقێ كو پتر بچیت و بگەهیتە قۆناغا 32ێ، ئەگەر شیا هەر چ نەبیت سێ خالان ژ دیدارێن خوە كوم بكەت، ژبلی هندێ چەكێ راستەقینە یێ ئیراقێ شیانێن ستێرێن وانن ب هەبوونا هەر ئێك ژیاریزانێن كورد مێرخاس دوسكی، ئاكام هاشم، ماركو فەرەج و یوسف ئەلەمین دگەل هەر ئێك ژ ئەیمەن حسێن ، زێدان ئیقبال ، عەلی جاسم ، ئەمیر ئەلعەماری و عەلی ئەلحمادی، ئەڤ ناڤە دشێن هەڤسەنگییێ و گیانێ شەركرنێ دناڤا یاریگەهێ دا بدەنە تیمێ، دناڤبەرا هێزا جەستەیێ و تەكنیكێ دا جوداهییێ دروست بكەن، یامن دڤێت بێژم هەر چەندە رێكا دەربازبوونا ئیراقێ یا بزحمەتە، بەلێ جیهانا فوتبۆلێ هووسا نیشا مە دایە كو هەردەم تیمێن مەزن و خودان ناڤ و ناسناڤ ب سەرناكەڤن، لەوما ئەگەر ئیراقێ بڤێت بگەهیتە ئارمانجا خوە و دیرۆكەكێ تۆماربكەت، پێدڤییە هەر یارییەكا مۆندیالێ وەكو فینالەكێ بخوە بدانیت، ب گیانێ فینالێ شەری بۆ سێ خالێن یاریێن خوە بكەت، ئەگەر بڤێت بەرب وێ پێگەهی بچیت یێ كو جەماوەرێ ئیراقێ ل ئەسمانێ بلند یێ مۆندیالێ چاڤەرێ دكەت.
