نیڤا سێیێ … ئەی رەقیب و خەونەك د درێسێن بیانی دا
ئیحسان حەسەن
دگەل ب داوی هاتنا هەڤركیێن كەرا ئێكێ ژ مۆندیالا 2026ێ و كرنا هژمارەكا یاریێن گەرا دویێ، دوور ژ ئەنجامێن هەتا نها هاتینە تۆماركرن، وان هەموو دیمەنێن دناڤا یاریگەهێ دا، دیسان یێن دەرڤە مە دیتین، رەنگە پرسیارەكا ب ئێش و دیرۆكی دسەرێ هەر هاندەرەكێ كوردێ دلسۆز دا دروست بكەت بۆچی وەلاتەكێ خودان جوگرافییەكا بچووك وەكو كۆراساو خودان ماف و سروودا خوە یا فەرمی بیت، ئەڤرۆكە مافێ پشكداریێ دمۆندیالێ دا هەبیت، بەلێ مللەتێ مە یێ كورد یێ خودان پتر ژ 40 ملیۆن كەسان ژڤی مافی یێ بێ بەهر بیت؟ كەنگی دێ سرۆدا ئەی رەقیب وەكو پرۆتوكولەكا فەرمی دگەل هەموو سروودێن دی یێن جیهانێ ل بن چاڤدێریا ملیاران بینەران هێتە ژەنین؟ ئەگەر ئەم بزانین كو وەلاتێ كۆراكاو هژمارا ئاكنجیێن وێ ژ 150 هزار كەسان نابوریت، ئەڤرۆكە بوویە نموونەكا سەرنجراكێش دجیهانا فوتبۆلێ دا و شیایە ب زیرەكانە مفای ژ رێنمایێن یاسایی یێن فیفایێ وەرگریت، ئەوا رێ پێ ددەت كو هەر هەرێمەكا خودان حوكمەكێ زاتی كیانەكێ وەرزشی یێ سەربەخۆ ب دامەزرینیت، دیسان وێ مفا ژ یاسایا دوو رەگەزنامەیی وەرگرتیە و ب دەهان یالایزانێن پیشەكار دخولا هۆلەندی دا كومكرینە، داكو ژبێ دەولەت بوونێ مەزنەكارەكا وەرزشی دروست بكەت و ئالایێ خوە یێ نەتەوەیی بلند بكەت، ل هەمبەری ڤێ راستییێ مە وەكو كورد نێزیكی هەلبژارتییەكێ فوتبۆلێ دڤێ مۆندیالێ دا هەیە، بەلێ یێ بەلاڤكریە دناڤبەرا درێسێن وەلاتێن دی دا، سەرباری هەبوونا فیدراسیۆنەكا نافخویی و خولەكا بناڤێ خولا هەرێما كوردستانێ، تنێ پشكداریا وێ وەك ئەندامەك درێكخراوا كونیفایێ دا بۆ نەتەوەیێن بێ دەولەت بیت، ئەوا هەتا نها ژدەرڤەی سیبەرا فەرمی یا فیفایێ كارێ خوە دكەت، چونكو ناسنامەیا سیاسی یا دەولەتبوونێ یا كێمە، ئەڤێ بەرتەنگییا یاسایی وەكریە كو ستێرێن مەزن یێن كورد لبن سبیبەرا ئالایێن دی یاریێ بكەن و ل هیڤییا دەرفەتەكا دیرۆكی بن، د ڤێ مۆندیالێ دا، بۆ جارا ئێكێ ددیرۆكا فوتبۆلێ دا نێزیكی دەه یاریزانێن كورد لسەر چار هەلبژارتیێن جودا وەكو ئیراق ، ئیران ، توركیا و ئەلمانیا بەلاڤ بووینە، ب ئاستێ خوە یێ بلند بووینە ئالایێن زیندی یێن نەتەوەیەكێ بێ دەولەت، ئەڤرۆكە پشتەڤان و حەژێكەرێن وان ل پشت شاشیان ل دهۆك و هەولێر و سلێمانیێ تا دگەهیتە ئامەد و مەهابادێ ئێك خوزی هەیە، ئەوژی ئەوە كو رۆژەك بهێت ئەڤ هەلبژارتییێ نەدیار ل بن سیبەرا ئێك ئالا و ئێك كیانێ سەربەخوە كۆم ببیت، سرۆدا ئەی رەقیب ب فەرمی یاریگەهێن جیهانێ بهەژینیت و نیشان بدەت كو مافێ كوردان ژی یێ هەی وەكو هەر مللەتەكێ دڤێ جیهانێ دا یێ بەرز و بلند بیت، هەتا ئەڤ خەونە دبیتە راستی دێ كورد مۆندیالێ وەكو پێگەهەكێ پاقژ یێ گەهشتتنێ ب هیڤی و مافێن خوە یێن رەوا بینن، ب هیڤیا هندێ گۆلا یاریزانێ كورد یا دیرۆكی دەنیز ئونداڤ ئەوا ڤێ مۆندیالێ دگەل هەلبژارتیێ خوە ئەلمانیا دژی كۆراكاو تۆماركری، بوویە پشەك ژدیرۆكا نەمر یا فوتبۆلا جیهانی، پێنگاڤەك بیت بۆ دەستكەڤتێن مەزنتر یێن ستێرێن كورد دڤێ مۆندیالێ دا.
