هنگڤینێ كوردستانێ ل سەر ئاستێ جیهانێ باشترین و گرانترینە
شاكر ئەتروشی:
سەرۆكێ كۆمەلا هەنگەڤانێن پارێزگەها دهۆكێ (عەبدولغەفار ئیبراهیم حەسەن) كو ب (عەبدولغەفار لیناڤایی) یێ بەرنیاسە، د دیدارەكێ دا بۆ رۆژنامەیا ئەڤرۆ گۆت: نوكە نێزیكی (3500) هەنگاڤانان ئەندامن دگەل كۆمەلێ و (75) هزار مێشێن هنگڤینی كو ب شێوەیەكێ هەڤچەرخ و سەردەم دهێنە بخودانكرن مە هەنە، دگەل (25) هزارێن دی كو د هندەك سندوقان دا دهێنە بخودانكرن دبێژنێ (سەلەمێشك) و سالانە ل پارێزگەها دهۆكێ ژ (200) هەتا (250) تەنێن هنگڤینی دهێنە بەرهەمئینان و ئەز ب خۆ هنگڤینێ خۆ بو وەلاتێ (هولەندا) فرێدكەم و هندەك هەڤالێن مە ژی بۆ هژمارەكا وەلاتێن عەرەبی فرێدكەن، ژوانا وەلاتێ (دوبەی).
هەروەسا گۆت: مە وەك كۆمەلا هەنگەڤانێن پارێزگەها دهۆكێ پشكداری د هژمارەكا فەستیڤال و پێشانگەهان دا كریە ل ناڤخۆ و دەرڤەی هەرێما كوردستانێ و ئورۆپا و هەردەم هنگڤینێ مە یێ هەرێما كوردستانێ، ب تایبەت ژی یێ پارێزگەها دهۆكێ ل رێزا ئێكێ بوویە و داخوزیەكا باش ل سەر هەبوویە، ئانكو هنگڤینێ كوردستانێ ل فەستیڤالێن جیهانی یێ ئێكێ بوویە و هەردەم ب باشترین و گرانترین هنگڤین هاتیە نیاسین و كۆمەلا مە و هەنگەڤانێن مە هژمارەكا زۆڕا خەلات و مەدالیێن زێڕی وەرگرتینە.
سەبارەت بهایێ هنگڤینێ باش، یێ (ڕەسەن) عەبدولغەفار لیناڤایی گۆت: بهایێ كیلۆیا هنگڤینی دناڤبەرا (50) هەتا (60) هزار دیناران دهێتە فرۆتن و ئەوێن دبێژن هنگڤینێ مە یێ ڕەسەنە و بهایێ هەر كیلۆیەكێ (100) هزار دینار، یان (100) دۆلارن یان زێدەتر، چو ڕاستی بۆ نینە و هەر ئەو هنگڤینە یێ ب (50 ـ 60) هزاران دهێتە فرۆتن، لەورا داخوازێ ژ خەلكێ مە دكەم هنگڤینێ ژ ژێدەرێن دروست بكڕن، كو ئەو ژی هەنگاڤانن، بۆ زانین هندەك بارزرگان هەنە كیلۆیا هنگڤینی ب چار هەتا پێنج هزار دیناران دناڤ بەرمیلان دا ژ دەرڤەری وەلاتی دئینن و ل ڤێرە ب ناڤێ هنگڤینێ ڕەسەن كیلۆیێ ب (40) هەتا (50) هزاران دفرۆشنە خەلكی و ئەڤ هنگڤینە نەیێ دروستە و ئەو كەسێ هنگڤینی ل بەر دەرگەهێ مزگەفتێ یان سەر جادە و پشتا تڕۆمبێلا دكڕن، هەروەكو ئەو ب دەستێن خۆ ژەهرێ دبەتە دناڤ مالا خۆدا، لەورا داخوازێ ژ حكومەتا خۆ دكەین رێگریێ ل وێ چەندێ بكەن، هەروەسا پشتەڤانیێ ل هەنگەڤانێن كوردستانێ بكەن.
