وەعەد شنگالی: مەلەڤانیکرن نە ب تنێ وەرزشە بەلکو هەڤسەنگییا لەشی و دەروونییە
هەرهین محەمەد:
د دیدارەکا کورت دا ڕاهێنەرێ مەلەڤانیان وەعەد شنگالی بۆ ئەڤرۆ گۆت: مەلەڤانی بتنێ یارییەکا وەرزشی نینە، بەلکو ئێکە ژ گرنگترین ڕێکان بۆ پاراستنا هەڤسەنگییا لەشی و دەروونی، دیسان پێدڤییە هەر ڕاهێنەرەک ل بەر چاڤ بگریت و سەرکەفتنا هەر پرۆسەیەکا فێربوونێ ب ڕاهێنەری ڤە گرێدایە و ڕاهێنەرێ سەرکەفتی ئەو لایەنە یێ کو پێدڤیە 100٪ باوەری ب شیانێن خۆ یێن پراکتیکی هەبیت و هەروەسا دشێت ب هویری چاڤدێریێ بکەت و شاشییێن فێرخوازان د ناڤ ئاڤێ دا ئاشکرا بکەت و دشێت باوەریەکا مەزن د ناڤبەرا خۆ و یاریزانان دا دروست بکەت، چونکو باوەری بنەمایێ فێربوونێ یە.
ناڤهاتی ئەوچەندەژی گۆت: وەرزشا مەلەڤانیێ ب وێ چەندێ یا ناڤدارە کو هەموو ماسولکەیان ب ئێکجار دکێشیتە کار و مەلەڤانی گڤاشتنەکا زێدە نا ئێخیتە سەر جومگەیان، لەورا بۆ هەموو ژییەکێ گونجایە و ژ لایێ دەروونی ڤە ژی ئەڤ وەرزشە دبیتە ئەگەرێ کێمکرنا دڵتەنگی و فشارێ و هەستێ باوەری ب خۆبوونێ ل دەف مرۆڤی بەرهەم دئینیت.
وەعد شنگالی گۆت ژی: پسپۆڕ هەردەم دبێژن کو باشترین ژیی بۆ دەستپێکرن و فێربوونا بنەمایێن دروست، د ناڤبەرا چار هەتا حەفت سالیێ دایە و هەرچەندە مرۆڤێن مەزن ژی دشێن فێرببن، لێ ڕەنگە ژبەر هەبوونا ترسێ پێدڤی ب دەمەکێ درێژتر و سەبرەکا پتر هەبیت.
