پارێزەرێ یانەیا دهۆكێ: دێ تانێ ل بڕیارێن فدراسیۆنێ دەین و فۆكسا مە ل سەر ڕاكرنا سزایێن پشتەڤانانە
د دداخویانیەكێ دا زنار زوبێر پارێزەرێ یانەیا دهۆك دیار كر ئەوا دەست ب ڕێكارێن یاسایی كرینە ژبۆ تانەدان ب بڕیارێن لژنەیا دەستپیلینێ ل فدراسیۆنا فوتبۆلا ئیراقێ ئەوێن پشتی روودانا یارییا تیما دهۆكێ بەرانبەر تیما یانەیا مووسل ژ چارچووڤەیێ گەڕا 35ێ ژ خولا ستێرێن ئیراقێ، ئەوا ل یاریگەها یانەیا دهۆك هاتیە كرن، تێدا توندوتیژی پشتی یاریێ هاتە كرن.
زێدەتر ناڤهاتی بۆ رۆژنامەیا ئەڤرۆ گۆت: وەكو پارێزەرێن یانەیا دهۆك دەست ب ڕێكارێن یاسایی بەرانبەر ئەوان بڕیارێن هاتینە كرن دژی جەماوەری و سەرۆك یانە، سكرتێر و ئەندامێ كارگێریێ هاتیە سەپاندن، سزایێن گرانن و هندەك ژ وان ژ قەبارێ وێ زێدەترن، وەكو پارێزەرێن یانەیێ ل سەر هەموو بەندێن سزایێ ئەم روونشتینە و گەنگەشە هاتیە كرن ژبۆ چاوانییا بەرگریێ و كێمكرنا ئەوان سزایان و دێ تانێ ل سەر هەموو بڕیاران دەین تایبەتی دێ فۆكسا مە ل سەر ڕاكرنا سزایێن جەماوەری بن.
ژلایەكێ دووڤە زنار زوبێری ئەوچەندە ژی دیار كر دبیت فدراسیۆنا فوتبۆلا ئیراقێ لێبۆرینێ ل سەر سزایێن یانەیا دهۆك و زاخۆ پشتی ئەوان روودانێن یارییا فینالا كۆپا ئیراقێ دا ل وەرزێ بۆری پایتەختێ ئیراقێ بەغدا هاتیە كرن و گۆت: فدارسیۆنا فوتبۆلا ئیراقێ پرۆژەیەك هەیە پشتی ب دووماهی هاتنا هەلبژارتنێن گشتی یێن دەستەیا گشتی یا فدراسیۆنێ بڕیارا لێبۆرینێ ل سەر ئەوان سزایێن وەرزێ بۆری بهێتە دان ژ وانا سزایێن كۆپا ئیراقێ دا، ئەڤە وەكو پرۆژەیە و هێشتا نە بوویە بڕیار، لێ د نوكە دا ئەم مژویلی ڕیكارێن یاسایی نە بۆ ڕاكرن یان كێمكرنا سزایێن یارییا بۆری بەرانبەر مووسلێ.
سزایێن فدراسیۆنێ د گرانن
لژنەیا دەستپیلینێ پشتی ڕاپۆرتا سەرپەرشتێ یاریێ و ڕێكخەرێ ئێمناهییا یاریگەهێ و دادڤانێ یاریێ وەرگرتین چەند بڕیارێن گران دەركرن و بڤی شێوەیی.
1- سزادانا یانەیا دهۆك ب 25 ملیۆن دیناران.
2- سزادانا د. عەبدوللا جەلال سەركێ یانەیێ دووركرن ژ تیمێ و یاریگەهێ بۆ ئێك مەهـ و سزایێ دارایی پێنچ ملیۆن دینارا.
3- بێبەهركرنا پشتەڤانێن دهۆك ب شەش یارییان د ناڤ یاریگەها خوە دا.
4- سزادانا خالد موشیر سەرپەرشتێ تیمێ بۆ دو یارییان و سزایێ دارایی دو ملیۆن دیناران.
5- سزادانا زانا جۆزەل گۆلپارێزێ یانەیا دهۆكێ بۆ دو یارییان و سزایێ دارایی پێنج ملیۆن دیناران.
6- سزادانا یاریزانێ مووسل هوستێن فرینی دو یارییان و سزایێ دارایی پێنج ملیۆن دیناران.
7- سزادانا ئەحمەد سلێڤانەی ئەندامێ دەستەیا پشتەڤانێن دهۆكێ بۆ سالەكێ ژ یاریگەهێ دووركەڤیت.
8- سزادانا ئۆسامە حسێن پشتەڤانێ یانەیێ بۆ سالەكێ ژ یاریگەهێ دووركەڤیت.
