پایسكلڤانێن دهۆكێ ناسناڤێ كۆپا ئیراقێ ب دەستڤە ئینا
تیما یانەیا دهۆكێ ل سەر ئاستێ لاوان ناسناڤێ قارەمانییا كۆپا ئیراقێ یا پایسكلڤانان ب دەستڤە ئینان پشتی شیایین ل سەر ئاستێ كۆم دژی دەمژمێرێ ڕێزا ئێكێ هاتین، د هەڤڕكییێن واندا ئەوا دوهی ل پایتەختێ ئیراقێ بەغدا هاتیە كرن، ژلایەكێ دووڤە یاریزانێن دهۆكێ ژی ل سەر ئاستێ كت بۆ گشت یاریزانان ڕێزێن ئێكێ و سێیێ هاتن.
لدۆر ڤێ یەكێ هشیار فەریق ئەندامێ كارگێرییا یانەیێ و سەرپەرشتێ تیمێ گۆت: تیما مە ل سەر ئاستێ لاوان ب پشكدارییا پێنج یاریزانان و سەرپەرشتیا هۆنەری یا ڕاهێنەر تارق سەعید شیان ل سەر ئاستێ گشتی ڕێزا ئێكێ بهێن د بەریكانەیا 20كم گشت یانە دژی دەمژمێری دا و پێشكەفت ل سەر یانەیا سیناعە ب جووداهییەكا باش یا دەمژمێری و بفەرمی ناسناڤێ قارەمانییا كۆپا ئیراقێ ل سەر ئاستێ لاوان ب دەستڤە بینن.
هەروەسان ناڤهاتی گۆت: ل سەر ئاستێ یاریزانان بۆ 80كم كت دژی دەمژمێرێ، یاریزانێ مە مۆبین مورتەزا ل ڕێزا ئێكێ هات و ئاڤەند هشیار ل ڕێزا سێیێ هاتن، هەروەسان یوسف جیهاد و عیسام عەلی ل ڕێزێن پێنجێ و شەشێ بدەستڤە ئینان، ئەوا ب پشكدارییا 56 یاریزانان ژ یانەیێن جودا پشكداربووین كو دهێتە هژمارتن جارا ئێكێ یە ئەڤ كۆپا یە بڤی شێوەیی بهێتە ڕێكخستن وەكو پێگكهۆڕ بۆ ئەنجامنەدانا قارەمانییا خولا ئیراقێ یا چار قووناغی، ژبەر كاودانێن دارایی یێن فدراسیۆنێ.
هشیار فەریقی ئەوچەندە ژی گۆت: پشكدارییا تیما مە هەتا خولەكێن دووماهییێ ژی دا یا پشتراست نەبوو، لێ ژبەركو یاریزانان گەلەك حەز دكر پشكداربن، هەروەسان سەرۆكێ یانەیێ پشتەڤانییا تەمام بۆ تیمێ دیاركر، سەرەرایی هەر ئاستەنگەكێ ئەڤ قارەمانییە بشێوەیەكێ باش بڕێڤەچوو و هەڤڕكییەكا بهێز دهاتە كرن.
