پرۆژه‌یێن نیڤه‌رو یێن ئاكرێ دێ هێنه تمامكرن
ئه‌ڤرۆ، ره‌مه‌زان زه‌كه‌ریا
ل سنوورێ ده‌ڤه‌رداریا ئاكرێ هژماره‌كا پرۆژه‌یێن خزمه‌تگوزاری ل سه‌ر پلانا تایبه‌تا سالا 2022 یا پارێزگه‌ها دهۆكێ دهێنه ئه‌نجامدان و هژماره‌كا وان پرۆژه‌یێن نیڤه‌رو ماین و چه‌ندین ساله هاتینه راگرتن دێ هێنه تمامكرن.
زێره‌ڤان ته‌مو، په‌یڤدارێ باژێرڤانیا ئاكرێ بۆ ئه‌ڤرۆ دیار كر، ل سنوورێ باژێرڤانیا ئاكرێ هژماره‌كا پرۆژه‌یان ب كوژمێ دوو ملیار و 132 ملیون دیناران دێ هێنه ئه‌نجامدان و ئه‌و پرۆژه ژی ڤه‌كرن و تێكه‌له‌كرنا سایده‌كێ جادا 40 مه‌تری به‌رامبه‌ر كۆلیژا په‌روه‌ردا ئاكرێ، هه‌تا جادا ئاله‌ره‌شێ یا كه‌ڤن. هه‌روه‌سا سه‌خبێركرن و قێركرنا جادێن ده‌ڤه‌را كارگه‌هێن سڤك و وێستگه‌ها به‌رامبه‌ر ترافیكا سوسنا نێزیك وێستگه‌ها كاره‌بێ یا سه‌ره‌كی و كارگه‌هێن ئار و به‌فرێ سه‌خبێركرن و قێركرنا هژماركا جادان بۆ چه‌ند قوتابخانا و مزگه‌فتا ل سنوورێ باژێرڤانیا ئاكرێ.
ناڤهاتی گۆت ژی: ل سه‌ر ئه‌ركێ وه‌زاره‌تا باژێرڤانی و گه‌شت گوزارا حكومه‌تا هه‌رێما كوردستانێ كار لسه‌ر دروستكرنا پرۆژێ (ڤه‌كرن و قێركرن و كۆنكریتكرنا جادێن تاخێن شه‌هیدان و فه‌وجێ و چوسته‌یا و كانی مامكرۆكێ ، بیوكێ) دهێته‌كرن ب كوژمێ ئێك ملیار و 738 ملیۆن 400 هزار دیناران، ئه‌ڤ پرۆژه‌یه یێ سالا 2014 بوویه كو 85٪ هاتییه ته‌مامكرن و نوكه كار ل سه‌ر ته‌مامكرنا پرۆژێ ناڤهاتی دهێته‌كرن ب ئاوایه‌كێ رێكخستی.
په‌یڤدارێ باژێرڤانیا ئاكرێ ئاشكراكر ژی: پرۆژێ (سه‌خبێركرن و رایێخستنا چه‌ند جادێن نافخۆیی ئاكرێ ب قێرێ باینده‌ر) دهێته ئه‌نجامدان ئه‌ڤ پرۆژه ب كۆژمێ 477 ملیۆن 237 هزار 500 دیناران دهێته بجهكرن، سایدێ هاتن و چوونێ جادا سه‌ره‌كی ئاكرێ – دهوك ، جادا خزمه‌تگوزاری ئازادی، جادێن ترافیكێن شورش و ئاڤیستا، جادا سه‌ره‌كی ئاكرێ قه‌ندیل، جادا خرگا بۆ باشقال، جادا كۆمه‌لگه‌ها دارایی، تاخێ خه‌بات، جادا تاخێ سه‌رهلدان، جادا كانی مام كرۆكێ، جادا ره‌زا ، میسكا.
زێره‌ڤان خویا كر: جادێن ده‌ڤه‌رێ ب رووبه‌رێ 33700م2 دێ هێته داپوشین و قێركرن و ب رووبه‌رێ 9800م2 دهێته سه‌خبێركرن، هه‌روه‌سا ب رووبه‌رێ 7955 م2 دهێته قه‌شتكرن و راكرنا رگلێن جادان دگه‌ل كۆنكریتكرنا هژماره‌كا جوكێن ڤه‌كری و بلندكرنا قه‌پاغ مه‌نهولان، ئه‌ڤ پرۆژه ل سه‌ر داهاتێ باژێرڤانیێ 100٪ ژ فرۆتنا پارچه زه‌ڤیان دهێته بجهكرن.
ناڤبری گۆت: پرۆژێ سه‌خبێركرن و قێركرنا چه‌ند جادێن ناڤخۆیی دهێته‌كرن ل تاخێن نوی ب كوژمێ 918 ملیون و 535 هزار و 250 دیناران، ژ وان هژماره‌كا تاخێن 11 ئادارێ ب درێژاهیا 1260 م كو نوكه ل ژێر ئه‌نجامدانێ نه.
