پشتی (18) سالان پەیكەرێ (پانۆرامایا پێكڤە ژیانێ) ل دهۆكێ هاتە نووژەنكرن
شاكر ئەتروشی
پەیكەرێ (پانۆراما پێكڤە ژیانێ) ئەوێ بەری (18) سالان ژلایێ سێ هونەرمەندێن پەیكەرسازێن پارێزگەها دهۆكێ ڤە هاتیە چێكرن و ل سەر دیوارێ رێڤەبەریا ساخلەمیا دهۆكێ یا بەرێ، هاتیە دانان، بەری چەند رۆژان دوبارە ب شێوەیەكێ مۆدرن هاتە نووژەنكرن و جوانیەكا دی دا وێ رێكێ.
هونەرمەندێ پەیكەرساز(مەروان شوكری بەرواری) ل دۆر دوبارە نووژەنكرنا ڤی پەیكەری بۆ رۆژنامەیا ئەڤرۆ گۆت: ئەڤە پرۆژەیێ منە، ل دەستپێكێ وەك ستێجەك من د پێشانگەهەكا خۆدا نیشادا بوو، ل وی دەمی بەرێز (تەمەر رەمەزان) پارێزگەرێ دهۆكێ بوو، ب رێكا بەرێز (عادل حەسەن) رێڤەبەرێ گشتی یێ رەوشەنبیری و هونەری یێ وی سەردەمی، ژمە هاتە خواستن كو ئەم پرۆژەیەكێ هوسا بۆ دهۆكێ چێكەین و پارێزگاری پشتەڤانیا خۆ یا درایی بۆ چێكرنا پرۆژەی دیاركر، پشتی مە بەرهەڤیێن خۆ كرین ل دەستپێكێ مە دڤیا ئەڤ پەیكەرە ل سەر دیوارێ وێ رێكا دچیتە گەلیێ دهۆكێ دانیین، چنكو گەلەك گەشتیار دوێ رێكێ را هاتن و چوونێ دكەن، پاشان جه هاتە گوهاڕتن بۆ دیوارێ رێڤەبەریا گشتی یا ساخلەمیا دهۆكێ یا بەرێ، ئانكو ئەو جادەیا دچیتە فرۆشگەها مازی و هەتا نوكە ل وێرێ مابوو.
هەروەسا گۆت: دەمێ من دەست ب پرۆژەی كری، هەردو هونەرمەندێن پەیكەرساز ماموستا (رەشید عەلی و سەردار كێستەی) ژی هاتنە دگەل من، ئانكو وەك گرۆپەكێ سێقۆلی مە پێكڤە چێكر، بلنداهیا پەیكەری دو مەتر و (30) سەنتیمەترن و درێژاهیا وی (32) مەترن، كو دهێتە هژمارتن بلندترین و درێژترین پەیكەر ل سەر ئاستێ پارێزگەها دهۆكێ هەتا ڤێگاڤێ، لێ ل دووف ستاندارتێن جیهانی پێدڤیە هەر چار یان پێنج سالان بهێتە نووژەنكرن، چنكو سەرما و گەرما و گوهۆڕینێن سەقای كارتێكرن لێ دكەن، لێ ژبەر رەوشا دارایی ما وەسا هەتا بەری چەند رۆژەكان مە داخوازنامەیەك بۆ نووژەنكرنێ دا رێڤەبەریا گشتی یا رەوشەنبیری و هونەری، وانژی دا سەرۆكاتیا باژێڕڤانیا دهۆكێ و گۆژمێ پێدڤی بۆ نووژەنكرنا پەیكەری كو ئەو ژی (9) ملیۆن دینارن ژلایێ كارگێڕیا پارێزگەها دهۆكێ بۆ هاتە تەرخانكرن، لەورا من و ماموستا هونەرمەند (رەشید عەلی) دووبارە دەست ب نووژەنكرنێ كر، سەبارەت هونەرمەند(سەردار كێستەی) ژی نوكە ئەو یێ ل ئەمریكا دژیت.
