پێدڤیە كچ بۆ خۆ جورئەتێ چێكەن
سندس سالح سلێڤانەیی
جیلان شەرەفانی، كچەكا خەلكا دهۆكێ یە، بۆ دەمێ شەش سالانە سەنتەرەكێ جوانكاریێ ل دهۆكێ ڤەكریە، كو پێك دهێت ژ گەلەك پشكان و ژبەر خەمخۆریا وێ بۆ كاری، بەردەوام بزاڤكرینە داهێنانێ بكەت و هەتا گەهشتیە وی رادەی كو وێ براندەكێ جیهانی یێ مكیاجی دانایە.
ناڤهاتیێ، د دیدارەكێ دا بۆ رۆژنامەیا ئەڤرۆ گۆت: دژیەكێ بچووك دا من حەزژ تشتێ جیاواز و كارێ سەربەخۆ دكر و من گەلەك خەون هەبوون، لەورا پشتی دەلیڤە هاتی بەری (14) سالان من دەستپێكر، كو ل وی دەمێ ئەز ل وەلاتێ (نەرویج) بووم، لێ بەری شەش سالان ئەز زڤریمە دهۆكێ و من ئەڤ سەنتەرە ل ڤێرە ڤەكر و هەر ژ دەستپێكێ من گەلەك خەم ژ كارێ خۆ خار دا كو بشێم باوەریا خەلكەكی ب دەستخۆڤە بینم و سوپاس بۆ خودێ خەونا من بجه هات و هەتا رادەیەكێ باش ئەز دكارێ خۆدا ب سەركەفتم، هەروەسا ئەز هەردەم دبێژم، بۆ ب دەستڤەئینانا كاری پێدڤیە كچ ب خۆ بۆ خۆ جۆرئەتێ چێكەت، ئانكو خۆ ژوان وان هەڤالان دووربكەن یێن كو ب هزرێن مرۆڤی دكەنە كەنی، هەروەسا دڤێت باوەریەكا باش ب كارێ خۆ هەروەسا ب كەسایەتیا خۆ هەبیت دا بشێت بەردەوام داهێنانێ بكەت و دكارێ خۆ دا یا سەركەفتی بیت، بۆ زانین من ب خۆ گەلەك جۆرێن كەرەستەیێن جوانكاریێ چێكرینە و نوكە ل سەر ناڤێ من دهێنە نیاسین و دێ بەردەوامبم د داهێنانێن خۆ دا.
