ژبەرچوونا زارۆکان، ئەگەر و نیشانێن مەترسیدار
بەرپەرێ ساخلەمیێ:
ژبەرچوونا زارۆکان ئێک ژ وان ئاریشێن ساخلەمی و دەروونی یێن دژوارە کو روی ب روی گەلەک ژنان دبیت د قۆناغێن جیاواز یێن دوگیانیێ دا.
د.زوزان عبدالرحمن فارس، تایبەتمەندا نەخۆشیێن ژنان و زارۆکبوونێ، دیارکر ئەگەرێ هەرە سەرەکی و ئێکەم بۆ ژبەرچوونا زارۆکی د سێ هەیڤێن دەستپێکێ دا، ڤەدگەڕیت بۆ ئاریشێن کرۆمۆسۆمی د پەیدابوونا کۆرپەلەی دا کو ئەڤە نێزیکی پێنجێ هەتا شێست سەدێ ژ حالەتان پێکدئینیت. سەرەڕای ئەگەرێن کرۆمۆسۆمی، چەندین ئەگەرێن دی ژی هەنە وەک نەدروستبوونا شێوەیێ مالبچووکی یان هەبوونا نەخۆشیێن دۆمدرێژ و بەرگریێ وەک ئێشێن هناڤا و ئاریشێن هەڤالبچووکی.
هەروەسا شێوازێ ژیانێ ژی کارتێکرنێ دکەت، ب تایبەت سترێسا زێدە، ڤەخوارنا زێدە یا کافایینێ کو پتر بیت ژ دو سەد میلیگرامان د ڕۆژەکێ دا، کێم نڤستن و زێدەبوونا کێشا لەشی یان قەلەوی.
نوژدارا تایبەتمەند ئاماژێ ب هندێ ژی ددەت کو تنێ ب ڕوودانا ئێک حالەتێ ژبەرچوونا زارۆکی، پێدڤی ب ئەنجامدانا پشکنینێن ئاڵۆز ناکەت، بەلێ هەکە ئەڤ ڕوودانە بۆ دو تا سێ جاران ل دووڤ ئێک دوبارە بوو، وی دەمی پێدڤییە پشکنینێن هوور یێن کرۆمۆسۆمی و بەرگریێ بهێنە ئەنجامدان.
د دەمێ ڕوودانا ژبەرچوونێ دا، هەبوونا ئێشان و خوینبەربوونێ تشتەکێ سروشتییە ژ بەر تێکچوونێن مالبچووکی. بەلێ هەبوونا هندەک نیشانان نیشانا مەترسیێ نە و پێدڤییە ئێکسەر ژن بهێتە گەهاندن ب نەخۆشخانا تەنگاڤیا یان نەخۆشخانا ژنان. ژ وان نیشانان بلندبوونا پلەیا گەرمیا لەشی یان تاکو بگەهیتە سیهـ و هەشت پلەیان یان پتر و لەرزین کو نیشانا هەودانەکا دژوارە، هەروەسا داکەفتنا لێدانا دلی و فشارا خوینێ و هەستکرن ب گێژبوونەکا دژوار، و دەرکەفتنا إفرازاتێن ب بێهن و کێمبوونا تەركیزێ.
ل دور دوبارە دوگیانبوونێ، دکتۆرە زوزان تەکەزێ ل سەر هندێ دکەت کو ژبەرچوونا ئێک زارۆک رامانا هندێ نادەت کو دێ هەمی جارێن دی ژی ڕوودەتەڤە و زۆربەیا ژنان پشتی ژبەرچوونێ دشێن دوبارە ب بنە خودان زارۆکێن ساخلەم و گۆت: نێزیکی چار تا شەش حەفتیان پشتی ژبەرچوونێ، دەورا هەیڤانە ئاسایی دبیتەڤە. هەکە ڕەوشا ساخلەمی و خورنا ژنێ یا باش بیت، دشێت پشتی دابڕینەکا کورت و ب وەرگرتنا ڤیتامینێن پێدڤی وەک فولیک ئەسید ل ژێر چاڤدێرییا نۆشداری، دیسان پلانێ بۆ دوگیانبوونەکا نوی دانیت.
