گه‌نجه‌ك: نابیت مه‌زاختیێ خێزانێ ژ داهاتیێ وان پتر بیت
ئاكرێ، گوهدار سلێمان:
بێگومان چ خێزان د بێ ئاریشه نینن، لێ ئه‌و ئاریشا دناڤ پتریا خێزانێن جڤاكی دا هه‌ی بێ پلانی و زۆریا پێدڤیێن خێزانێ یه، گه‌نجه‌ك كو ده‌رچویێ كولیژا ئابوریه دبێژیت: مه‌زاختن و بێ پلانیا خێزانێ ئه‌ڤرۆ دهێته هژمارتن ئێك ژ گرفتێن مه‌زن كو جڤاك تووش دبنێ، له‌ورا نابیت مه‌زاختیێ خێزانێ ژ داهاتیێ وان پتر بیت.
بێوار حسێن ده‌رچویێ كولیژا ئابوری و سه‌رنڤیسه‌رێ گوڤارا زێ بادینان ل ئاكرێ دیار كر كو خێزان پارچه‌كه ژ جڤاكی و هه‌ر خێزانه‌ك خودان یاسا و سیسته‌مێن خوه یێن تایبه‌ته، ب بورینا ده‌می خێزان تووشی چه‌ندین ئاریشا دبن و ئێك ژ گرنگترین ئاریشه‌یان ژی نه‌زانینا چاوانیا ب رێڤه‌برنا خێزانێ یه و نه‌بوونا چ پلانایه و گوت: (نه‌بوونا پلانا دبیته ئه‌گه‌رێ په‌یدابونا قه‌یرانێن دارایی دناڤ خێزانێ و جڤاكی دا، خێزان وه‌كی هه‌ر ده‌زگه‌هه‌كی پێدڤی ب ریڤه‌برنێ و رێڤه‌به‌ره‌كی یه داكو خێزانێ ب رێڤه ببه‌ت و تووشی چ ئاریشه‌یان نه‌بیت، هه‌كه خێزان یا بێ رێڤه‌بر بیت ل وی ده‌می چاڤه‌رێی كه‌فتن و ژناڤچونا ئه‌وێ خێزانێ بكه، له‌ورا پێدڤیه ل سه‌ر هه‌ر تاكه‌كێ خێزانێ خوه به‌رپرس ببینیت د رێڤه‌برنا خێزانێ دا ول گه‌ل ئێك د هاریكار بن و ل ئێكدو بگه‌هن) .
بێوار دیار كر ژی كو مووچێ خێزانێ رێیه‌كه بۆ ب رێڤه‌برنا ژیانا رۆژانه و پركرنا پێدڤیێن خێزانێ و ئه‌و داهاتێ دهێته د ده‌ستێ خێزانێ دا گه‌له‌ك گرنگه پلان بۆ بهێته دانان، ب تایبه‌تی بۆ ئه‌وان خێزانێن ژبلی مووچه‌ی چ داهاتێ دی د ده‌ستی دا نه‌بیت و گۆت: (له‌ورا یا فه‌ره پلان بۆ مه‌زاختنا ئه‌ڤی داهاتی بهێته دانان، چونكی هه‌كه درۆست سه‌ره‌ده‌ری ل گه‌ل داهاتی نه‌هێته كرن ل وی ده‌می خێزان دێ تووشی ئاریشێن دارایی بیت).
سه‌رنڤیسه‌رێ گوڤارا زێ بادینان زێده‌تر گۆت: (ئه‌ڤجا پێدڤیه ل سه‌ر هه‌ر خێزانه‌كێ كو به‌لانسه‌كی بێخنه دناڤبه‌را داهات و پیدڤیێن خێزانێ، چونكی هه‌ر ده‌مه‌كی پێدڤیێن تاكه كه‌سی و خێزانێ پتر بوون ژ وی داهاتێ وه‌ردگرن ل وی ده‌می ئه‌و خێزان دێ تووشی قه‌یرانا داریی بیت و په‌نایێ به‌ته به‌ر ده‌ینا و هه‌تا هه‌كه داهاتێ وێ خێزانێ گه‌له‌ك ژی بیت) .
د به‌رده‌وامیا ئاخفتنێن خوه‌دا بێوار دیار كر كو چاره‌سه‌ركرنا ئه‌ڤان جوره ئاریشان یا ب زه‌حمه‌ته هه‌كه خێزان رێیێن درۆست بكار نه‌ئینیت، تایبه‌ت د جڤاكێ كوردی دا، ژبه‌ركو بێكاری و ب ده‌ستڤه‌ئینانا داهاته‌كی و ئاریشێن دارایی د زۆرن، ئه‌ڤجا ئه‌ڤ ئاریشێن خێزانی هینگێ دێ چاره‌سه‌ر بن ده‌مێ خێزان خودان پلان بیت و گۆت: (ل سه‌ر خێزانێ پێدڤیه كه‌سه‌ك بهێته راسپاردن بۆ چاڤدێریا داهات و مه‌زاختیێن خێزانێ و یا باشتر ئه‌وه شاره‌زاییه‌ك لده‌ف هه‌بیت ژلایێ پلان و رێڤه‌برنا مالێ).
بێوار گۆتژی: (دڤێت خێزانێ توماره‌ك هه‌بیت و هه‌موو داهات و مه‌زاختیێن هه‌یڤانه یێن خێزانێ تێدا تومار بكه‌ن و نه‌هێلێن مه‌زاختیێن وان پتر ژ داهاتی لێ بهێن، ب شێوه‌یه‌كێ درۆست سه‌ره‌ده‌ریێ ل گه‌ل داهاتێ خوه دا بكه‌ن و دڤێت داهاتێ خوه بكه‌ته پشك پشك ئانكو پشكه‌ك بۆ پێدڤیێن خێزانێ و پشكه‌ك ژی بۆ مه‌زاختنێن مالێ و پشكه‌كێ ژی راكه‌ن بو ده‌مێن پێدڤی) .
