یارییا زاخۆ و نەورۆزێ دیدارا كلاسیكۆیی و شەڕێ رێزبەندیێ یە
قەیس وەیس:
بڕیارە ئەڤرۆ پێنچ یاریێن مایی ژ هەڤڕكیێن گەڕا 36ێ یا خولا ستێرێن ئیراقێ بۆ یارییا فوتبۆلێ بهێنە كرن كو دهێتە چاڤەڕێ كرن یاریێن ئەڤرۆ ب كلاسیكۆ، دێربیی و شەڕێ پلێتا ئاسایی بهێنە ناڤكرن.
زاخۆ و نەورۆز د ناڤبەرا تۆلڤەكرنێ و ئاشتكرنێ دا
چاڤەڕێ یە ئەڤرۆ ل دەمژمێر 5:30 ئێڤاری تیما یانەیا زاخۆ ل باژێرێ سلێمانیێ ببیتە مێڤانا یانەیا نەورۆز د یارییەكا ب هێز و كلاسیكۆیا كوردستانی دا، كوڕێن خابۆری خودان 52 خالن ل ڕێزا هەشتێ دهێن ژ 14 سەركەڤتنان، 10 وەكهەڤی و 10 خوسارەتی هەنە، د بەرانبەر دا یانەیا نەورۆز هەڤڕكا وێ یا ڕێزبەندیێ یە ئەوا كێمترییا دو خالا ب 50 خالان ل ڕێزا نەهێ دهێت ژ 15 سەركەڤتن، پێنج وەكهەڤی و 15 خوسارەتییان، ئانكو ژبلی هەڤڕكییا كلاسیكۆیێ دێ هەڤڕكییا ڕێزبەندیێ دناڤبەرا خودا هەبن.
دیدارێن پێشتر د بەرژوەندییا كێ دا بوون؟
ل دووڤ دووماهی 10 دیدارێن پێشتر یێن هەردو تیمان د خولێ دا، ڕیژەیا پێنچ یارییان سەركەڤتن بۆ زاخۆ بووینە، سێ بۆ نەورۆز بووینە و دو یارییان وەكهەڤی هاتیە، مەزنترین سەركەڤتن د ڤی وەرزی دا ل قووناغا ئێكێ بوو ئەوا ل زاخۆ هاتیە كرن و ب چار گۆلێن پاقژ ب سەركەڤتی، لێ دڤێ یاریێ دێ گوهۆڕینێن هەبن ئەرێ زاخۆ دێ شێن سەركەڤتنا قووناغا بۆری دوبارەكەن یان نەورۆز دێ تولێن خوە ڤەكەت؟
كاپتنێ تیمێ دیتنەكا جودا هەیە
د پرێس كۆنفرانس دا ئەمجەدد عتوان كاپتنێ تیما یانەیا زاخۆ گۆت: هەرچەندە مە هیڤی و ئارمانجێن خوە بۆ ڕیزین پیشیێ ژ دەست داینە لێ ئەم داخوازكرینە ژبۆ ئاشتكرنا جەماوەرێ خوە و ڤەگەڕاندنا سەركەڤتنا و گرنژینێ بۆ دەمێ وان، یاری بەرانبەر نەورۆز ب سانەهی نابیت ژبەركو تیمەكا ڕێكخستیە و شیاییە د یاریێم بۆری دا ئەنجامێن باش بینن، دڤێت یاریێن مایی ب ئەنجامێن باش و سەركەڤتین ژبۆ دووماهییەكا باش بەری پەردە ل سەر خولێ بهێتە دانان وەرز ب دووماهی بهێت، دێ بزاڤێن سەركەڤتنێ كەین ژبۆ ڕێزبەندیەكا باشتر و ئاشتكرنا جەماوەری و ڕژدین بۆ ڤێ هیڤیێ.
هەولێر د دەلیڤەیا دووماهیێ دا
ژلایێ خوەڤە یانەیا هەولێر دێ ل پایتەختێ ئیراقێ بەغدا بیتە مێڤانا یانەیا شورتە ئێك ژ یاریێن ب هێز و ئێكلاكەر بۆ هەولێریان و دەلیڤەیا دووماهێ ژبۆ دەستڤە ئینانا هیڤیێن پلێتەكا ئاسایی ئەوا دێ ل دەمژمێر هەشتی شەڤ ل یاریگەها شورتە هێتە كرن كوڕێن كەلهە و منارە ب70 خالان ل ڕێزا سێیێ دهێت ژ 23 سەركەڤتن، حەفت وەكهەڤی و پێنج خوسارەتیان، د بەرانبەر دا یانەیا شورتە خودانا ڕێزا دویێ یە ب كۆمكرنا 76 خالان، ئانكو دەلیڤەیە بۆ هەولێرێ سەركەڤتنێ بینیت دا جووداهیێ كێمتر بكەت ژبۆ پتر نێزیكبوون بۆ ڕیزبەندییا دویێ.
ڕاهێنەرێ هەولێرێ یاری
ب سانەهی نابینت
د پرێس كۆنفرانس دا باسم قاسم ڕاهێنەرێ تیما یانەیا هەولێرێ ئەركێ تیما خوە د ڤێ یاریێ دا ب سانەهی نابینیت بەرانبەر تیمەكێ هەڤڕكا ناسناڤێ خولێ یە و جووداهییا چار خالان ئانكو دێ شەڕی بۆ دو مەرەمان كەت بۆ سەرێ لیستێ و پاراستنا ڕێزبەندییا خوە، لەوما ژی دێ یاری یا پری هەڤڕكی بیت، یارییا ئەڤرۆ وەكو فینالێ یە ژبلی سەركەڤتنێ دێ ئارمانجەكا مەزن ژ دەست دەین، لێ چوونا گۆلكەرێ خولێ و تیما مە شیرزۆد و ڤەگەڕیانا وی ژ نشكەكێ ڤە دێ كارتیكرنەكا نەرێنی ل سەر تیمێ كەت، ب هیڤی نە سێ خالان و سەركەڤتن ڤەگەڕینە هەولێرێ.
خودانا سەرێ لیستێ شەڕێ
پاراستنێ هەیە
ژلایەكێ دووڤە تیما یانەیا جەویە خودانا سەرێ لیستا خولێ دێ شەڕی و بەرگریێ ژ جهێ خوە كەت دەمێ ئەڤرۆ ل دەمژمێر هەشتی شەڤ مێڤاندارییا یانەیا زەورا ل یاریگەها ئەلمەدینە دكەت، جەوییە ب80 خالان سەرێ لیستێ دهێت، زەورا ب 66 خالان ل ڕێزا چارێ دهێت و شەرێ ڕێزا سێیێ دكەت، ژلایەكێ دووڤە نەجەف دێ مێڤاندارییا كەرخێ كەت و مووسل بیتە مێڤانا یانەیا مینا ل باژێرێ بەسرا.
