هێشتا ئاریشا فرۆتنا مریشكێن خۆمالى ل دهۆكێ هه‌یه
ئه‌ڤرۆ نیۆز،زنار تۆڤى:
نیشتیمان عارف سه‌رپه‌رشتیار و رێكخه‌رێ مینى كۆنفرانسێ په‌له‌وه‌ران ل پارێزگه‌ها دهۆكێ د دیداره‌كێدا بۆ رۆژناما ئه‌ڤرۆ دیاركر:د هه‌ر كۆنفرانس و روونشتنه‌كێ دا چه‌ند پێشنیار و راسپارده و خال ژێ ده‌ردكه‌ڤن،ئێك ژ وان راسپارده‌یێن مینى كۆنفرانسێ په‌له‌وه‌ران دووڤچوونا ئاریشا بازرگانیا مریشكان بوویه،وه‌ك فرۆتن ل پارێزگه‌ها دهۆكێ،كو هه‌تاكو نوكه مه ئاریشا فرۆتنا مریشكان هه‌یه ل ڤێ پارێزگه‌هێ،دیسا مه دیاركریه كو دووڤچون ل گه‌ل لایه‌نێن په‌یوه‌ندیدار بهێته كرن بۆ ڤه‌كرنا جهێن سه‌رژێكرنا مریشكان ل دهۆكێ،ژ پێخه‌مه‌ت بازرگانیا مریشكان بهێته خورتكرن،هه‌روه‌سا مه پێشنیاركریه كو بازاره‌كێ حه‌فتیانه ژى بۆ مریشكان بهێته ڤه‌كرن و رێك بهێته خۆشكرن بۆ ڤه‌كرنا سه‌ربرخانێن گه‌رۆك و دیاركر ژى:مه د كۆنفرانسى دا دیاركریه كو به‌رچاڤ وه‌رگرتنا ژینگه‌هێ ل جهێن سه‌ربرخانێن مریشكان بهێته وه‌رگرتن،دیسا یاسایێ پاراستنا به‌رهه‌مێ خۆمالى یێ مریشكان بهێته جێبه‌جێكرن و پشته‌ڤانى ل پرۆژان بهێته كرن ژ لایێ كه‌رتێ گشتى ڤه،ژ پێخه‌مه‌ت بهایێ مریشكێن خۆمالى بهێته خوار.
ناڤهاتى خویاكر ژى:پێدڤیه راگه‌هاندن پتر رۆلێ خوه ب بینیت بۆ ریكلامكرنا به‌رهه‌مێ خۆمالى،بۆ هاندانا به‌كاربه‌را ژبۆ كرینا مریشكێن خۆمالى،هه‌روه‌سا رۆتینى بۆ دانا مۆله‌تێن پرۆژێن مریشكێن خۆمالى بهێنه كێمكرن،دیسا دڤێت جێبه‌جێكرنا مه‌رجێن ساخله‌میێ وه‌ك خوه پاراستن ژبۆ كێمكرنا ئێشێن مریشكان بهێنه ئه‌نجامدان و ده‌ستهه‌لات ژى بهێنه خوارێ ژبۆ پارێزگه‌هان و گوت ژى:ئه‌ڤ راسپارده دێ هێنه بلندكرن بۆ جڤاتا پارێزگه‌ها دهۆكێ و رێڤه‌به‌ریا گشتى یا سامانێن ئاژه‌لى و فیته‌رنه‌رى ل پارێزگه‌ها دهۆكێ،هه‌روه‌سا دووڤچوون ژى دێ بۆ ڤان خالان هێنه ئه‌نجامدان.
