ئه‌فسه‌ره‌كێ كورد بوو فه‌رماندێ له‌شكرێ عيراقێ ل كه‌ركووكێ
ئه‌ڤرۆنيوز:
ئه‌فسه‌ره‌كێ كورد بۆ فه‌رمانداريا فرقا 20 يا له‌شكرێ عيراقێ هاته ده‌ستنيشانكرن كو نوكه باده‌كا ئه‌منى ل سنورێ ده‌وروبه‌رێ كه‌ركووكێ دده‌ستێ وێ فرقێ دايه.
ب فه‌رمانا حه‌يده‌ر عه‌بادى سه‌رۆك وه‌زيران وفه‌رماندێ گشتيێ هيزێن چه‌كدار، عه‌ميد روكن( شێرزاد عه‌زيز) وه‌كو فه‌رماندێ فرقا 20 يا له‌شكرێ عيراقێ ده‌ست بكاربوو كو ئه‌ركێ به‌رپرسياره‌تيا وێ فرقا له‌شكرى ده‌وروبه‌رێ كه‌ركووكێ يه ودبن فه‌رمانا فه‌رمانده‌يا ئوپه‌راسيۆنێن كه‌ركووكێ دايه.
ل سالا 2014 ل ده‌مێ هاتنا داعشێ ، ئه‌و ئه‌فسه‌رێ كورد، فه‌رماندێ ليوايه‌كا له‌شكرى بوو وپاشى بوو جێگرێ فه‌رماندێ فرقا پێنج ل ديالا ودشه‌ره‌كێ دژى داعشێ دا ب گرانى بريندارببوو.
فرقا 20 يا له‌شكرێ عيراقێ ب فه‌رمانداريا عه‌ميد روكن( موعد بداى) پشكداربوو دهێرشا ل سه‌ر كه‌ركووكێ وپشتى روودانێن 16 ئوكتۆبه‌رێ هێزێن وێ فرقێ ل حه‌ويجه ودوبز وده‌وروبه‌رێن كه‌ركووكێ جهگير بوو.
پشتى ده‌ستنيشانكرنا عه‌ميد روكن (شێرزاد عه‌زيز) وه‌كو فه‌رماندێ فرقا 20 يا له‌شكرێ عيراقێ، به‌ره‌يێ توركمانى وليستا عه‌ره‌بى ل كه‌ركووكێ داخوازكر حه‌يده‌ر عه‌بادى ژ وێ بريارا خوه لێڤه‌ببيت وبه‌رپرسياره‌تيا وێ فرقا له‌شكرى راده‌ستى وى فه‌رماندێ كورد نه‌كه‌ت.
