ماكرۆن بۆ ئه‌ردۆغانی:پێشێلكرنا مافێن مرۆڤی ناهێلن هوون بهێنە ناڤ ئێکەتیا ئورۆپی دا
ئەڤرۆ نیۆز ، زنار تۆڤی:
سه‌رۆكێ فرنسا گوتیە سه‌رۆكێ توركیا، ئه‌و گوهۆرینێن دوماهیێ یێن د وارێ مافێ مرۆڤی دا ب ته‌مامی توركیا ژ هه‌ر پێشڤه‌چوونەکێ بۆ دانوستاندنێن هاتنا ناڤ ئێکەتیا ئورۆپا دوور دئێخیت.
ل باژێرێ پاریس پایته‌ختێ فرنسا،پشتی ته‌مامبوونا كۆمبوونا دناڤبەرا ئیمانوێل ماكرۆن سه‌رۆكێ فرنسا و ره‌جه‌ب ته‌یب ئه‌ردۆغانێ سه‌رۆكێ توركیا،د كۆنگره‌کێ رۆژنامه‌ڤانیدا ماكرۆنی گوت، سه‌باره‌ت ب پەیوه‌ندیێن توركیا ل گه‌ل ئورۆپا دڤێت بزانن، پێشهاتێن ڤێ دوماهیێ یێن توركیا ل سه‌ر مافێ مرۆڤی هیچ ئارمانجەک و پێشڤه‌چوونەک بۆ کریارێن وی وەلاتی بۆ هاتنا ناڤ ئێکەتیا ئورۆپا نائینیت، پێدڤیە تورکیا وان خالان چاره‌سه‌ر بكه‌ت.
هه‌روه‌سا گوتیە:دڤێت وەلاتێن دیموكراتی رێزێ ل ده‌وله‌تا یاسایێ بگرن ب شێوه‌کێ ته‌مام، هه‌ر ل سەر ڤێ رەوشێ مە ئاخفتن لسه‌ر رۆژنامه‌نڤیسێن زیندانکری ل گەل ئەردۆغانی کریە،کو ب ئەگەرێ ئازادیا بیرورایان هاتینە گرتن.
ماكرۆنی گوتیە ژی،د كۆمبوونا مەدا من پێشنیازێن هەڤبه‌ش ل گەل ئێکەتیا ئورۆپا خستینه به‌رده‌م ئه‌ردۆغانی،ل جهێ هندێ کو ئەو داخوازا هاتنا ناڤ ئێکەتیا ئورۆپا بکەن، چونكی ئەڤە یا ب زەحمەتە بۆ تورکیا،د به‌رامبه‌ر دا سه‌رۆكێ توركیا دبێژیت،براستی ئەز ماندی بووم هندی داخواز کریە،کو تورکیا بهێتە ناڤ ئێکەتیا ئورۆپا دا.
