پێزانينێن نوو ل دۆر پێشمه‌رگێن ديلكرى دده‌ستێ داعشێ دا ئاشكرا دبن
ئه‌ڤرۆنيوز:
ئه‌ندامه‌كا جڤاتا نوونه‌رێن عيراقێ ل سه‌ر زارێ ده‌سته‌سه‌ركريه‌كێ داعشێ كو نوكه دئێك ژ زيندانێن به‌غدا ڤه‌يه، چه‌ند پێزانينان ل دۆر پێشمه‌رگێن ديلكرى دده‌ستێ داعشێ دا ئاشكرا دكه‌ت.
ئه‌شواق جاف، ئه‌نداما جڤاتا نوونه‌رێن عيراقێ ژفراكسيۆنا پارتى ديموكراتى كوردستان گۆت” ده‌مه‌كه مژوولى دووڤچوونێ مه بۆ كه‌يسا پێشمه‌رگێن ديلكرى دده‌ستێ داعشێ دا، پشتى دوهى ئێكشه‌مبى 4/2/2018، من سه‌ره‌دانا زيندانا موسه‌نا ل به‌غدا كرى، ل وێرێ ده‌مێ ل گه‌ل ده‌سته‌سه‌ركريه‌كێ داعشێ ئاخڤتيم، چه‌ند پێزانين وسه‌ره‌داڤێن نوو ل دۆر پێشمه‌رگێن ديلكى دده‌ستێ داعشێ دا ب ده‌ست من كه‌فتن”.
وێ په‌رله‌مانتارێ بۆ باس ئاماژه كر كو ئه‌و داعشێ ده‌سته‌سه‌ركرى به‌رى نوكه سه‌رپه‌رشتێ زيندانه‌كا تايبه‌ت ب ديلێن پێشمه‌رگه ڤه دده‌ستێ داعشێ دا بوو وگۆت” ل دووڤ ئاخڤتنێن وى ده‌سته‌سه‌ركريێ داعشێ، چو پێشمه‌رگێن دشه‌رێن ده‌ڤه‌رێن به‌شير وره‌شاد ل پارێزگه‌ها كه‌ركووكێ كه‌فتينه ده‌ستێ داعشێ كو هژمارا وان 21 پێشمه‌رگه‌نه، دشه‌رێ ئازادكرنا حه‌ويجه دا شه‌هيد نه‌بووينه”.
ئه‌شواقێ زێده‌تر گۆت” وى داعشى ئاشكراكر كو ب نڤيساره‌كا فه‌رمى يا ئه‌ميرێ داعشێ ل حه‌ويجه، هه‌ر ئه‌و 21 پێشمه‌رگه‌يێن ديلكرى هاتينه هنارتن بۆ زيندانا گه‌ياره وراده‌ستى دادوه‌ريێ شه‌رعيێ داعشێ ل گه‌ياره هاتينه كرن”.
ئاماژه دا”ل سه‌ر بنه‌مايێ وان پێزانينێن وى چه‌كدارێ داعشێ، دووڤچوونێن مه دێ دبه‌رده‌وام بن بۆ وێ چه‌ندێ پێزانينێن تمام ل دۆر چاره‌نڤيسێ هه‌موو پێشمه‌رگێن ديلكرى دده‌ستێ داعشێ دا ب ده‌ست مه بكه‌ڤن”.
